ਨਵੀਂ ਦਿੱਲੀ 23 ਸਤੰਬਰ 2026 (ਪੰਜਾਬੀ ਖਬਰਨਾਮਾ ਬਿਊਰੋ) : ਸੂਬਿਆਂ ’ਚ ਚੱਲ ਰਹੀ ਟੀ-20 ਕ੍ਰਿਕਟ ਲੀਗ ’ਚ ਮੈਚ ਫਿਕਸਿੰਗ ਦੀਆਂ ਕੋਸ਼ਿਸ਼ਾਂ ਸਿਖਰ ’ਤੇ ਪਹੁੰਚ ਗਈਆਂ ਹਨ। ਦਿੱਲੀ ਪ੍ਰੀਮੀਅਰ ਲੀਗ (ਡੀਪੀਐੱਲ) ’ਚ ਫਿਕਸਿੰਗ ਦੇ ਦੋਸ਼ਾਂ ਨੇ ਹੰਗਾਮਾ ਮਚਾ ਦਿੱਤਾ ਹੈ, ਜਦਕਿ ਉੱਤਰ ਪ੍ਰਦੇਸ਼ ਟੀ-20 ਲੀਗ ’ਚ ਵੀ ਇਕ ਖਿਡਾਰੀ ਦੀ ਸ਼ਿਕਾਇਤ ਐਂਟੀ ਕੁਰੱਪਸ਼ਨ ਯੂਨਿਟ ਨੂੰ ਦਿੱਤੀ ਗਈ ਸੀ, ਜਿਸ ਕਾਰਨ ਉਸ ਨੂੰ ਇਸ ਸਾਲ ਲੀਗ ਖ਼ਤਮ ਹੋਣ ਤੋਂ ਪਹਿਲਾਂ ਹੀ ਬਾਹਰ ਕੱਢ ਦਿੱਤਾ ਗਿਆ ਸੀ।
ਡੀਪੀਐੱਲ ’ਚ ਸੈਂਟਰਲ ਦਿੱਲੀ ਕਿੰਗਜ਼ ਦੇ ਖਿਡਾਰੀ ਵੰਸ਼ ਬੇਦੀ ਵੱਲੋਂ ਫਿਕਸਿੰਗ ਦੀ ਪੇਸ਼ਕਸ਼ ਦੀ ਸ਼ਿਕਾਇਤ ਤੇ ਸਾਬਕਾ ਰਣਜੀ ਖਿਡਾਰੀ ਰਚਿਤ ਭਾਟੀਆ ਦੇ ਸਟਿੰਗ ਆਪ੍ਰੇਸ਼ਨ ’ਚ ਕੀਤੇ ਗਏ ਦਾਅਵਿਆਂ ਨੇ ਡੀਡੀਸੀਏ ਦੀਆਂ ਮੁਸ਼ਕਲਾਂ ਵਧਾ ਦਿੱਤੀਆਂ ਹਨ। ਇਸ ਮਾਮਲੇ ’ਚ ਡੀਡੀਸੀਏ ਨੇ ਭਾਰਤੀ ਕ੍ਰਿਕਟ ਕੰਟਰੋਲ ਬੋਰਡ (ਬੀਸੀਸੀਆਈ) ਤੋਂ ਮਾਰਗਦਰਸ਼ਨ ਮੰਗਿਆ ਹੈ। ਹਾਲਾਂਕਿ, ਡੀਡੀਸੀਏ ਨੇ ਸਾਫ ਕੀਤਾ ਹੈ ਕਿ ਸਟਿੰਗ ’ਚ ਲਗਾਏ ਗਏ ਦੋਸ਼ ਅਜੇ ਤੱਕ ਸੱਚੇ ਨਹੀਂ ਸਾਬਤ ਹੋਏ ਤੇ ਕਿਸੇ ਖਿਡਾਰੀ ਜਾਂ ਫ੍ਰੈਂਚਾਈਜ਼ੀ ਨੂੰ ਦੋਸ਼ੀ ਨਹੀਂ ਮੰਨਿਆ ਜਾ ਸਕਦਾ।
ਉੱਤਰ ਪ੍ਰਦੇਸ਼ ਕ੍ਰਿਕਟ ਐਸੋਸੀਏਸ਼ਨ (ਯੂਪੀਸੀਏ) ਦੇ ਇਕ ਉੱਚ ਅਧਿਕਾਰੀ ਨੇ ਕਿਹਾ ਕਿ ਐਂਟੀ ਕੁਰੱਪਸ਼ਨ ਯੂਨਿਟ ਨੇ ਮੇਰਠ ਮੈਵਰਿਕਸ ਦੇ ਖਿਡਾਰੀ ਰਿਤਿਕ ਵਤਸ ਦੇ ਖ਼ਿਲਾਫ਼ ਸ਼ਿਕਾਇਤ ਕੀਤੀ ਸੀ। ਇਸ ਕਾਰਨ ਵਤਸ ਨੂੰ ਇਸ ਸਾਲ ਲੀਗ ਸ਼ੁਰੂ ਹੋਣ ਤੋਂ ਪਹਿਲਾਂ ਹੀ ਬਾਹਰ ਕੱਢ ਦਿੱਤਾ ਗਿਆ ਸੀ। ਰਿਤਿਕ ਕਈ ਸਾਲਾਂ ਤੱਕ ਮੇਰਠ ਟੀਮ ਦਾ ਮੈਂਬਰ ਰਿਹਾ ਹੈ। ਉਸਨੇ 14 ਸਤੰਬਰ 2024 ਨੂੰ ਮੇਰਠ ਮੈਵਰਿਕਸ ਲਈ ਆਖਰੀ ਮੈਚ ਖੇਡਿਆ ਸੀ। ਯੂਪੀਸੀਏ ਦੇ ਇਕ ਅਧਿਕਾਰੀ ਨੇ ‘ਦੈਨਿਕ ਜਾਗਰਣ’ ਨਾਲ ਗੱਲਬਾਤ ਕਰਦਿਆਂ ਕਿਹਾ ਕਿ ਅਸੀਂ ਬੀਸੀਸੀਆਈ ਦੇ ਐਂਟੀ ਕੁਰੱਪਸ਼ਨ ਦੇ ਅਧਿਕਾਰੀਆਂ ਨੂੰ ਲੀਗ ’ਚ ਲਗਾਇਆ ਹੈ। ਏਸੀਯੂ ਵੱਲੋਂ ਮਿਲੀ ਸ਼ਿਕਾਇਤ ’ਚ ਕਿਹਾ ਗਿਆ ਸੀ ਕਿ ਇਕ ਖਿਡਾਰੀ ਨੇ ਦਿੱਲੀ ਤੇ ਉੱਤਰ ਪ੍ਰਦੇਸ਼ ਦੇ ਖਿਡਾਰੀਆਂ ਨਾਲ ਸੰਪਰਕ ਕੀਤਾ ਸੀ। ਏਸੀਯੂ ਦੀ ਸ਼ਿਕਾਇਤ ‘ਤੇ ਯੂਪੀਸੀਏ ਨੇ ਤੁਰੰਤ ਕਾਰਵਾਈ ਕਰਦਿਆਂ ਵਤਸ ਨੂੰ ਬਾਹਰ ਦਾ ਰਸਤਾ ਦਿਖਾ ਦਿੱਤਾ। ਹਾਲਾਂਕਿ, ਉਸਨੇ ਇਹ ਨਹੀਂ ਦੱਸਿਆ ਕਿ ਇਸ ਖਿਡਾਰੀ ‘ਤੇ ਬੈਨ ਲਗਾਇਆ ਗਿਆ ਹੈ ਜਾਂ ਨਹੀਂ ਪਰ ਉਸਨੇ ਸੰਕੇਤ ਦਿੱਤਾ ਕਿ ਇਸ ਖਿਡਾਰੀ ਦੀ ਚੋਣ ਉੱਤਰ ਪ੍ਰਦੇਸ਼ ਦੀਆਂ ਟੀਮਾਂ ’ਚ ਨਹੀਂ ਹੋਵੇਗੀ।
ਫਿਕਸਿੰਗ ਦੀ ਆਹਟ : ਜਾਣਕਾਰੀ ਅਨੁਸਾਰ, ਇਸ ਤੋਂ ਪਹਿਲਾਂ ਤਹਿਲਕਾ ਵੈਬਸਾਈਟ ਦੀ ਅੰਡਰਕਵਰ ਜਾਂਚ ’ਚ ਸਾਬਕਾ ਰਣਜੀ ਖਿਡਾਰੀ ਰਚਿਤ ਭਾਟੀਆ ਨੇ ਦਾਅਵਾ ਕੀਤਾ ਸੀ ਕਿ ਉਸਨੇ ਆਈਪੀਐਲ-2025 ਦੌਰਾਨ ਚੇਨਈ ਸੁਪਰ ਕਿੰਗਜ਼ (ਸੀਐੱਸਕੇ) ਨਾਲ ਜੁੜੀ ਅੰਦਰੂਨੀ ਜਾਣਕਾਰੀ ਸੱਟੇਬਾਜ਼ਾਂ ਤੱਕ ਪਹੁੰਚਾਈ। ਉਸ ਅਨੁਸਾਰ, ਪੰਜ ਮੈਚਾਂ ਦੀ ਪਲੇਇੰਗ ਇਲੇਵਨ ਦੀ ਜਾਣਕਾਰੀ ਦੇਣ ਦੇ ਬਦਲੇ ਉਸ ਨੂੰ ਹਰ ਮੈਚ ਦੇ 60 ਲੱਖ ਰੁਪਏ ਮਿਲੇ ਤੇ ਕੁੱਲ ਤਿੰਨ ਕਰੋੜ ਰੁਪਏ ਕਮਾਏ। ਹਾਲਾਂਕਿ, ਜਿਸ ਖਿਡਾਰੀ ਰਾਹੀਂ ਉਸ ਨੂੰ ਇਹ ਜਾਣਕਾਰੀ ਮਿਲਣ ਦਾ ਦਾਅਵਾ ਕੀਤਾ ਗਿਆ, ਉਸ ਦੀ ਪਛਾਣ ਰਿਪੋਰਟ ’ਚ ਜਨਤਕ ਨਹੀਂ ਕੀਤੀ ਗਈ ਹੈ।
ਭਾਟੀਆ ਨੇ 2018-19 ਸਈਅਦ ਮੁਸ਼ਤਾਕ ਅਲੀ ਟਰਾਫੀ ’ਚ ਵੀ ਸਪਾਟ ਫਿਕਸਿੰਗ ਦਾ ਦਾਅਵਾ ਕੀਤਾ। ਉਸਨੇ ਕਿਹਾ ਕਿ ਉਸਨੇ ਜਾਣਬੁੱਝ ਕੇ ਦੋ ਵਾਈਡ ਗੇਂਦਾਂ ਸੁੱਟੀਆਂ ਤੇ ਹਰ ਇਕ ਲਈ ਆਠ ਲੱਖ ਰੁਪਏ ਮਿਲੇ। ਉਸਨੇ ਨਾਗਾਲੈਂਡ ਰਣਜੀ ਟੀਮ ’ਚ ਚੋਣ ਲਈ 15 ਲੱਖ ਰੁਪਏ ਦੇਣ ਦਾ ਵੀ ਦਾਅਵਾ ਕੀਤਾ। ਇਹ ਸਾਰੇ ਦਾਅਵੇ ਹਾਲੇ ਜਾਂਚ ਤੇ ਸੁਤੰਤਰ ਪੁਸ਼ਟੀ ਦੇ ਅਧੀਨ ਹਨ।
ਵੰਸ਼ ਬੇਦੀ ਨੇ ਸਮੇਂ ’ਤੇ ਏਸੀਯੂ ਨੂੰ ਦਿੱਤੀ ਜਾਣਕਾਰੀ : ਇਸ ਦੌਰਾਨ ਡੀਪੀਐੱਲ-2026 ’ਚ ਸੈਂਟਰਲ ਦਿੱਲੀ ਕਿੰਗਜ਼ ਦੇ ਵਿਕਟਕੀਪਰ-ਬੱਲੇਬਾਜ਼ ਵੰਸ਼ ਬੇਦੀ ਨੇ ਇਕ ਖਿਡਾਰੀ ਵੱਲੋਂ ਕੀਤੀ ਗਈ ਭ੍ਰਿਸ਼ਟ ਪੇਸ਼ਕਸ਼ ਦੀ ਜਾਣਕਾਰੀ ਐਂਟੀ ਕੁਰੱਪਸ਼ਨ ਯੂਨਿਟ (ਏਸੀਯੂ) ਨੂੰ ਦਿੱਤੀ। ਡੀਡੀਸੀਏ ਦੇ ਸਕੱਤਰ ਅਸ਼ੋਕ ਸ਼ਰਮਾ ਨੇ ਕਿਹਾ, “ਇਹ ਪੇਸ਼ਕਸ਼ ਉੱਤਰ ਪ੍ਰਦੇਸ਼ ਦੇ ਇਕ ਖਿਡਾਰੀ ਵੱਲੋਂ ਕੀਤੀ ਗਈ ਸੀ, ਜੋ ਯੂਪੀ ਟੀ-20 ਲੀਗ ’ਚ ਵੀ ਖੇਡ ਰਿਹਾ ਸੀ।” ਮਾਮਲੇ ਨੂੰ ਦਸਤਾਵੇਜ਼ ਦੇ ਰੂਪ ’ਚ ਦਰਜ ਕੀਤਾ ਗਿਆ ਹੈ। ਡੀਡੀਸੀਏ ਨੇ ਇਸ ਮਾਮਲੇ ’ਚ ਬੀਸੀਸੀਆਈ ਨੂੰ ਪੱਤਰ ਲਿਖ ਕੇ ਅਗਲੀ ਪ੍ਰਕਿਰਿਆ ‘ਤੇ ਮਾਰਗਦਰਸ਼ਨ ਮੰਗਿਆ ਹੈ।
