ਨਵੀਂ ਦਿੱਲੀ 04 ਮਈ 2026 (ਪੰਜਾਬੀ ਖਬਰਨਾਮਾ ਬਿਊਰੋ) : ਤਾਮਿਲਨਾਡੂ ਵਿਧਾਨ ਸਭਾ ਚੋਣਾਂ 2026 ਦੀ ਗਿਣਤੀ ਵਿੱਚ ਅਦਾਕਾਰ ਵਿਜੇ ਦੀ ਪਾਰਟੀ ਤਮਿਲਾਗ ਵੇਟਰੀ ਕਜ਼ਗਮ (TVK) ਨੂੰ ਜ਼ਬਰਦਸਤ ਬੜ੍ਹਤ ਮਿਲ ਰਹੀ ਹੈ। ਵੋਟਾਂ ਦੀ ਗਿਣਤੀ ਦੇ ਸ਼ੁਰੂਆਤੀ ਰੁਝਾਨਾਂ ਨੇ ਤਾਮਿਲਨਾਡੂ ਸਮੇਤ ਪੂਰੇ ਦੇਸ਼ ਨੂੰ ਹੈਰਾਨ ਕਰ ਦਿੱਤਾ ਹੈ। ਕਿਸ ਨੂੰ ਪਤਾ ਸੀ ਕਿ ਦੋ ਸਾਲ ਪਹਿਲਾਂ ਬਣੀ ਇਹ ਪਾਰਟੀ ਦਹਾਕਿਆਂ ਪੁਰਾਣੇ ਦ੍ਰਾਵਿੜ ਰਾਜਨੀਤੀ ਦੇ ਕਿਲ੍ਹਿਆਂ ਨੂੰ ਹਿਲਾ ਕੇ ਰੱਖ ਦੇਵੇਗੀ।
ਇਸ ਦੌਰਾਨ ਬਿਹਾਰ ਵਿੱਚ ‘ਜਨ ਸੂਰਾਜ’ ਦੇ ਮੁਖੀ ਅਤੇ ਰਾਜਨੀਤੀ ਦੇ ਮਾਹਿਰ ਮੰਨੇ ਜਾਣ ਵਾਲੇ ਪ੍ਰਸ਼ਾਂਤ ਕਿਸ਼ੋਰ (PK) ਦੀ ਵਿਜੇ ਨੂੰ ਲੈ ਕੇ ਕੀਤੀ ਗਈ ਇੱਕ ਭਵਿੱਖਬਾਣੀ ਖ਼ੂਬ ਚਰਚਾ ਵਿੱਚ ਹੈ। ਉਨ੍ਹਾਂ ਨੇ ਇੱਕ ਸਾਲ ਪਹਿਲਾਂ ਤਾਮਿਲਨਾਡੂ ਵਿੱਚ ਥਲਾਪਤੀ ਵਿਜੇ ਦੇ ਚੋਣ ਪ੍ਰੋਗਰਾਮ ਦੌਰਾਨ ਕਿਹਾ ਸੀ ਕਿ, “ਇੱਥੇ ਐਮਐਸ ਧੋਨੀ ਨੂੰ ਜਾਣਨ ਵਾਲੇ ਬਹੁਤ ਹਨ। ਉਹ ਇਕੱਲੇ ਅਜਿਹੇ ਬਿਹਾਰੀ ਹਨ, ਜਿਨ੍ਹਾਂ ਦੀ ਲੋਕਪ੍ਰਿਯਤਾ ਤਾਮਿਲਨਾਡੂ ਵਿੱਚ ਮੇਰੇ ਨਾਲੋਂ ਕਿਤੇ ਜ਼ਿਆਦਾ ਹੈ। ਪਰ ਯਾਦ ਰੱਖਿਓ, ਜਦੋਂ ਮੈਂ ਤੁਹਾਨੂੰ (TVK) ਜਿੱਤਣ ਵਿੱਚ ਮਦਦ ਕਰਾਂਗਾ, ਤਾਂ ਤਾਮਿਲਨਾਡੂ ਵਿੱਚ ਧੋਨੀ ਤੋਂ ਵੀ ਜ਼ਿਆਦਾ ਫੇਮਸ ਹੋ ਜਾਵਾਂਗਾ।”
234 ਵਿੱਚੋਂ 108 ਸੀਟਾਂ ‘ਤੇ TVK ਅੱਗੇ
ਹੁਣ TVK ਨੂੰ ਮਿਲ ਰਹੀ ਜ਼ਬਰਦਸਤ ਬੜ੍ਹਤ ਤੋਂ ਬਾਅਦ ਪ੍ਰਸ਼ਾਂਤ ਕਿਸ਼ੋਰ ਦੀ ਉਸ ਸਮੇਂ ਦੀ ਵੀਡੀਓ ਸੋਸ਼ਲ ਮੀਡੀਆ ‘ਤੇ ਤੇਜ਼ੀ ਨਾਲ ਵਾਇਰਲ ਹੋ ਰਹੀ ਹੈ। ਦੱਸ ਦੇਈਏ ਕਿ ਤਾਮਿਲਨਾਡੂ ਵਿਧਾਨ ਸਭਾ ਚੋਣਾਂ ਲਈ ਵੋਟਾਂ ਦੀ ਗਿਣਤੀ ਜਾਰੀ ਹੈ ਅਤੇ TVK 234 ਵਿੱਚੋਂ 108 ਸੀਟਾਂ ‘ਤੇ ਅੱਗੇ ਚੱਲ ਰਹੀ ਹੈ। ਤਾਮਿਲਨਾਡੂ ਵਿੱਚ ਥਲਾਪਤੀ ਵਿਜੇ ਦੀ ਪਾਰਟੀ TVK ਬੰਪਰ ਜਿੱਤ ਵੱਲ ਵੱਧ ਰਹੀ ਹੈ।
ਹਾਲਾਂਕਿ, ਇਹ ਵੀ ਦੱਸ ਦੇਈਏ ਕਿ ਪੀਕੇ ਹੁਣ IPAC (ਇੰਡੀਅਨ ਪੋਲੀਟੀਕਲ ਐਕਸ਼ਨ ਕਮੇਟੀ) ਤੋਂ ਵੱਖ ਹੋ ਚੁੱਕੇ ਹਨ। ਪ੍ਰਸ਼ਾਂਤ ਕਿਸ਼ੋਰ ਨੇ ਪਿਛਲੇ ਸਾਲ ਬਿਹਾਰ ਚੋਣਾਂ ਵਿੱਚ ਹਾਰ ਦਾ ਸਾਹਮਣਾ ਕਰਨ ਤੋਂ ਬਾਅਦ ਕਿਹਾ ਸੀ ਕਿ ਉਹ ਹੁਣ ਕਿਸੇ ਵੀ ਪਾਰਟੀ ਨੂੰ ਸਲਾਹ (Advise) ਨਹੀਂ ਦੇਣਗੇ।
