ਨਵੀਂ ਦਿੱਲੀ 11 ਨਵੰਬਰ 2026 (ਪੰਜਾਬੀ ਖਬਰਨਾਮਾ ਬਿਊਰੋ) : ਬਿੱਗ ਬੌਸ 20 ਵਿੱਚ ਇਸ ਸਮੇਂ ਜ਼ਬਰਦਸਤ ਹੰਗਾਮਾ ਦੇਖਣ ਨੂੰ ਮਿਲ ਰਿਹਾ ਹੈ। ਘਰ ਦੇ ਅੰਦਰ ਆਪਣੀ ਨਿੱਜੀ ਜ਼ਿੰਦਗੀ ਬਾਰੇ ਚਰਚਾ ਹੋਣ ‘ਤੇ ਮਾਹੀ ਵਿਜ ਰੋ ਪਈ।
ਭਾਵੁਕ ਹੁੰਦਿਆਂ ਮਾਹੀ ਨੇ ਲਵ ਗਿੱਲ ਨੂੰ ਚਿਤਾਵਨੀ ਦਿੱਤੀ ਅਤੇ ਕਿਹਾ, “ਮੇਰੇ ਪਤੀ ਨੂੰ ਕਦੇ ਵੀ ਵਿਚਕਾਰ ਨਾ ਲਿਆਈਂ।” ਕਾਫ਼ੀ ਪਰੇਸ਼ਾਨ ਨਜ਼ਰ ਆ ਰਹੀ ਮਾਹੀ ਨੇ ਲਵ ਨੂੰ ਇਹ ਵੀ ਬੇਨਤੀ ਕੀਤੀ ਕਿ ਉਹ ਸ਼ੋਅ ਵਿੱਚ ਉਨ੍ਹਾਂ ਦੇ ਤਲਾਕ ਦਾ ਜ਼ਿਕਰ ਨਾ ਕਰਨ।
ਇਹ ਬਹਿਸ ਉਸ ਸਮੇਂ ਸ਼ੁਰੂ ਹੋਈ, ਜਦੋਂ ਪਤਾ ਲੱਗਾ ਕਿ ਮਾਹੀ ਨੇ ਕਥਿਤ ਤੌਰ ‘ਤੇ ਲਵ ਨੂੰ ‘ਘਰ ਤੋੜਨ ਵਾਲੀ’ (ਹੋਮਬ੍ਰੇਕਰ) ਕਿਹਾ ਸੀ।
ਮਾਹੀ ਦੇ ਤਲਾਕ ਨੂੰ ਲੈ ਕੇ ਹੋਈ ਚਰਚਾ ਵਾਲੇ ਐਪੀਸੋਡ ਦੇ ਪ੍ਰੋਮੋ ਵਿੱਚ ਮਾਹੀ ਨੂੰ ਲਵ ਨੂੰ ਇਹ ਕਹਿੰਦੇ ਹੋਏ ਦੇਖਿਆ ਜਾ ਸਕਦਾ ਹੈ, “ਮੇਰੇ ਤਲਾਕ ਬਾਰੇ ਗੱਲ ਨਾ ਕਰੋ।”
ਆਪਣਾ ਬਚਾਅ ਕਰਦਿਆਂ ਲਵ ਬਾਕੀ ਘਰਵਾਲਿਆਂ ਦੇ ਸਾਹਮਣੇ ਕਹਿੰਦੀ ਹੈ ਕਿ ਜਿਵੇਂ ਇਨ੍ਹਾਂ ਨੇ ਮੇਰੇ ਲਈ ਇੱਕ ਸ਼ਬਦ ਵਰਤਿਆ ਸੀ – ‘ਹੋਮਬ੍ਰੇਕਰ’।
ਜਦੋਂ ਮਾਹੀ ਰੋਂਦੀ ਹੋਈ ਕਮਰੇ ਵਿੱਚੋਂ ਬਾਹਰ ਜਾਣ ਲੱਗਦੀ ਹੈ ਤਾਂ ਉਹ ਆਪਣੀ ਚਿਤਾਵਨੀ ਦੁਹਰਾਉਂਦਿਆਂ ਕਹਿੰਦੀ ਹੈ, “ਮੇਰੇ ਪਤੀ ਨੂੰ ਕਦੇ ਵੀ ਵਿਚਕਾਰ ਨਾ ਲਿਆਈਂ, ਨਹੀਂ ਤਾਂ ਇੱਥੇ ਹੀ ਵੱਢ ਕੇ ਰੱਖ ਦਿਆਂਗੀ।”
ਮਾਹੀ ‘ਤੇ ਘਰਵਾਲਿਆਂ ਨੇ ਕੀਤੇ ਨਿੱਜੀ ਤੌਰ ‘ਤੇ ਤਿੱਖੇ ਸਵਾਲ
ਪ੍ਰੋਮੋ ਵਿੱਚ ਅੱਗੇ ਦਿਖਾਇਆ ਗਿਆ ਹੈ ਕਿ ‘ਬਿੱਗ ਬੌਸ 20’ ਦੇ ਬਾਕੀ ਮੁਕਾਬਲੇਬਾਜ਼ ਮਾਹੀ ਵੱਲੋਂ ‘ਹੋਮਬ੍ਰੇਕਰ’ ਸ਼ਬਦ ਵਰਤਣ ਨੂੰ ਲੈ ਕੇ ਉਨ੍ਹਾਂ ਤੋਂ ਸਵਾਲ ਕਰਦੇ ਹਨ।
ਉਹ ਪੁੱਛਦੇ ਹਨ ਕਿ ਜਦੋਂ ਮਾਹੀ ਨੇ ਖੁਦ ਕਿਸੇ ਲਈ ਅਜਿਹਾ ਸ਼ਬਦ ਵਰਤਿਆ ਹੈ ਤਾਂ ਉਹ ਦੂਜਿਆਂ ਤੋਂ ਇਹ ਉਮੀਦ ਕਿਵੇਂ ਕਰ ਸਕਦੀ ਹੈ ਕਿ ਉਹ ਉਨ੍ਹਾਂ ਬਾਰੇ ਕੋਈ ਨਿੱਜੀ ਟਿੱਪਣੀ ਨਾ ਕਰਨ? ਅਜਿਹਾ ਲੱਗਦਾ ਹੈ ਕਿ ਇਹ ਬਹਿਸ ਕਿਸੇ ਟਾਸਕ ਦਾ ਹਿੱਸਾ ਹੈ, ਜਿਸ ਵਿੱਚ ਮੁਕਾਬਲੇਬਾਜ਼ ਵਾਰੀ-ਵਾਰੀ ਮਾਹੀ ਨੂੰ ਖਰੀਆਂ-ਖਰੀਆਂ ਸੁਣਾ ਰਹੇ ਹਨ। ਇਸ ਦੌਰਾਨ ਮਾਹੀ ਦੇ ਸਰੀਰ ‘ਤੇ ਕੁਝ ਯੰਤਰ ਲੱਗੇ ਹੋਏ ਵੀ ਦਿਖਾਈ ਦੇ ਰਹੇ ਹਨ, ਜੋ ਸ਼ਾਇਦ ਟਾਸਕ ਦਾ ਹਿੱਸਾ ਹਨ।
ਕਿੱਥੋਂ ਸ਼ੁਰੂ ਹੋਇਆ ਪੂਰਾ ਵਿਵਾਦ
ਬਿੱਗ ਬੌਸ 20 ਵਿੱਚ ਮਾਹੀ ਵਿਜ ਅਤੇ ਲਵ ਗਿੱਲ ਵਿਚਕਾਰ ਤਣਾਅ ਉਸ ਸਮੇਂ ਹੋਰ ਵਧ ਗਿਆ, ਜਦੋਂ ਲਵ ਨੇ ਮਾਹੀ ਤੋਂ ਉਸ ਟਿੱਪਣੀ ਬਾਰੇ ਸਵਾਲ ਕੀਤਾ, ਜਿਸ ਵਿੱਚ ਮਾਹੀ ਨੇ ਕਥਿਤ ਤੌਰ ‘ਤੇ ਉਨ੍ਹਾਂ ਨੂੰ ‘ਹੋਮਬ੍ਰੇਕਰ’ ਕਿਹਾ ਸੀ।
ਦੱਸਿਆ ਜਾਂਦਾ ਹੈ ਕਿ ਮਾਹੀ ਨੇ ਇਹ ਗੱਲ ਕਾਜ਼ੀ ਤੌਕੀਰ ਅਤੇ ਮਨੀਸ਼ ਗੋਇਲ ਨਾਲ ਗੱਲਬਾਤ ਦੌਰਾਨ ਕਹੀ ਸੀ, ਜਦੋਂ ਲਵ ਉੱਥੇ ਮੌਜੂਦ ਨਹੀਂ ਸੀ।
ਲਵ ਨੇ ਇਸ ਨਿੱਜੀ ਟਿੱਪਣੀ ਨੂੰ ਲੈ ਕੇ ਮਾਹੀ ਤੋਂ ਸਵਾਲ ਕੀਤਾ, ਜਿਸ ਕਾਰਨ ਦੋਵਾਂ ਵਿਚਕਾਰ ਚੱਲ ਰਿਹਾ ਤਣਾਅ ਹੁਣ ਸਾਰਿਆਂ ਦੇ ਸਾਹਮਣੇ ਆ ਗਿਆ ਹੈ।
