ਨਵੀਂ ਦਿੱਲੀ 06 ਅਗਸਤ 2026 (ਪੰਜਾਬੀ ਖਬਰਨਾਮਾ ਬਿਊਰੋ) : ਭਾਰਤ ਦੇ ਸਭ ਤੋਂ ਸਫਲ ਕਪਤਾਨ ਮਹਿੰਦਰ ਸਿੰਘ ਧੋਨੀ ਦੀ ਤਾਰੀਫ਼ ਲੰਬੇ ਸਮੇਂ ਤੋਂ ਨਾ ਸਿਰਫ਼ ਉਨ੍ਹਾਂ ਦੀ ਰਣਨੀਤਕ ਸਮਝ ਲਈ ਹੁੰਦੀ ਰਹੀ ਹੈ, ਸਗੋਂ ਇਸ ਲਈ ਵੀ ਕਿ ਉਹ ਆਪਣੇ ਸਾਥੀਆਂ ਦਾ ਕਿੰਨਾ ਖਿਆਲ ਰੱਖਦੇ ਹਨ। ਆਪਣੇ ਪੂਰੇ ਕਰੀਅਰ ਦੌਰਾਨ ਸਾਬਕਾ ਕਪਤਾਨ ਨੇ ਨੌਜਵਾਨ ਖਿਡਾਰੀਆਂ ਨੂੰ ਸਹਿਜ ਮਹਿਸੂਸ ਕਰਵਾਉਣ ਅਤੇ ਮੈਦਾਨ ਦੇ ਅੰਦਰ ਤੇ ਬਾਹਰ ਉਨ੍ਹਾਂ ਨੂੰ ਮਾਰਗਦਰਸ਼ਨ ਅਤੇ ਸਹਿਯੋਗ ਦੇਣ ਲਈ ਪਛਾਣ ਬਣਾਈ ਹੈ।
ਕਮਰਾ ਖੁੱਲ੍ਹਾ ਰਹਿੰਦਾ ਸੀ
ਭਾਰਤ ਅਤੇ ਚੇਨੱਈ ਸੁਪਰ ਕਿੰਗਜ਼ ਲਈ ਉਨ੍ਹਾਂ ਦੀ ਕਪਤਾਨੀ ’ਚ ਖੇਡਣ ਵਾਲੇ ਕਈ ਕ੍ਰਿਕਟਰਾਂ ਨੇ ਉਸ ਭਰੋਸੇ ਅਤੇ ਆਤਮਵਿਸ਼ਵਾਸ ਬਾਰੇ ਗੱਲ ਕੀਤੀ ਹੈ। ਇੱਕ ਕਿੱਸਾ ਜੋ ਅਕਸਰ ਸਾਹਮਣੇ ਆਉਂਦਾ ਹੈ, ਉਹ ਹੈ ਟੂਰ ਦੌਰਾਨ ਧੋਨੀ ਦੀ ‘ਓਪਨ-ਡੋਰ ਪਾਲਿਸੀ’। ਉਨ੍ਹਾਂ ਦਾ ਹੋਟਲ ਦਾ ਕਮਰਾ ਹਮੇਸ਼ਾ ਟੀਮ ਦੇ ਸਾਥੀਆਂ ਲਈ ਖੁੱਲ੍ਹਾ ਰਹਿੰਦਾ ਸੀ। ਉਹ ਉੱਥੇ ਗੱਲਬਾਤ ਕਰਨ, ਆਰਾਮ ਕਰਨ, ਮੋਬਾਈਲ ਜਾਂ ਵੀਡੀਓ ਗੇਮ ਖੇਡਣ ਅਤੇ ਖੇਡ ਦੇ ਦਬਾਅ ਤੋਂ ਦੂਰ ਇੱਕ ਸਕੂਨ ਭਰੇ ਮਾਹੌਲ ’ਚ ਨਾਲ ਸਮਾਂ ਬਿਤਾਉਣ ਆਉਂਦੇ ਸਨ।
ਧੋਨੀ ਨਾਲ ਡਰੈੱਸਿੰਗ ਰੂਮ ਸ਼ੇਅਰ ਕੀਤਾ
ਹਾਲ ਹੀ ਵਿੱਚ ਸਾਰੇ ਫਾਰਮੈਟਾਂ ਤੋਂ ਸੰਨਿਆਸ ਲੈਣ ਵਾਲੇ ਅਜਿੰਕਿਆ ਰਹਾਣੇ ਨੇ ਵੀ ਇਸ ‘ਤੇ ਗੱਲ ਕੀਤੀ। ਰਹਾਣੇ ਨੇ ਭਾਰਤ ਅਤੇ ਆਈ.ਪੀ.ਐੱਲ. ਟੀਮਾਂ ਸੀ.ਐੱਸ.ਕੇ. (CSK) ਅਤੇ ਆਰ.ਪੀ.ਐੱਸ.ਜੀ. ਲਈ ਧੋਨੀ ਨਾਲ ਡਰੈੱਸਿੰਗ ਰੂਮ ਸ਼ੇਅਰ ਕੀਤਾ। ਰਹਾਣੇ ਨੇ ਦੱਸਿਆ ਕਿ ਟੂਰ ਦੌਰਾਨ ਟੀਮ ਦੇ ਸਾਥੀ ਅਕਸਰ ਧੋਨੀ ਦੇ ਹੋਟਲ ਦੇ ਕਮਰੇ ਵਿੱਚ ਇਕੱਠੇ ਹੁੰਦੇ ਸਨ ਅਤੇ ਉਨ੍ਹਾਂ ਨੇ ਉਸ ਇੱਕ ਸਾਧਾਰਨ ਨਿਯਮ ਦਾ ਵੀ ਜ਼ਿਕਰ ਕੀਤਾ ਜਿਸ ਦਾ ਸਾਰੇ ਲੋਕ ਸਾਬਕਾ ਕਪਤਾਨ ਦੀ ਪਰਸਨਲ ਸਪੇਸ ਦੇ ਮਾਮਲੇ ਵਿੱਚ ਸਨਮਾਨ ਕਰਦੇ ਸਨ।
ਜਦੋਂ ਉਨ੍ਹਾਂ ਦਾ ਦਰਵਾਜ਼ਾ ਬੰਦ ਹੁੰਦਾ
‘ਓਵਰਲੈਪ ਕ੍ਰਿਕਟ’ ਯੂਟਿਊਬ ਚੈਨਲ ‘ਤੇ ਰਹਾਣੇ ਨੇ ਕਿਹਾ, “ਐੱਮ.ਐੱਸ. ਧੋਨੀ ਬਹੁਤ ਸ਼ਾਂਤ ਅਤੇ ਕੂਲ ਹਨ। ਬਾਕੀ ਲੋਕਾਂ ਦੀ ਤਰ੍ਹਾਂ ਹੀ ਇੱਕ ਬਹੁਤ ਆਮ ਇਨਸਾਨ ਹਨ। ਉਨ੍ਹਾਂ ਦਾ ਕਮਰਾ ਲਗਪਗ ਹਮੇਸ਼ਾ ਹਰ ਕਿਸੇ ਲਈ ਖੁੱਲ੍ਹਾ ਰਹਿੰਦਾ ਸੀ। ਕਈ ਵਾਰ 10-15 ਲੋਕ ਜਾਂ ਪੂਰੀ ਟੀਮ ਹੀ ਉਨ੍ਹਾਂ ਦੇ ਕਮਰੇ ਵਿੱਚ ਹੁੰਦੀ ਸੀ। ਜਦੋਂ ਉਨ੍ਹਾਂ ਦਾ ਦਰਵਾਜ਼ਾ ਬੰਦ ਹੁੰਦਾ ਸੀ ਤਾਂ ਕਿਸੇ ਨੂੰ ਵੀ ਅੰਦਰ ਆਉਣ ਦੀ ਇਜਾਜ਼ਤ ਨਹੀਂ ਹੁੰਦੀ ਸੀ।”
ਆਈ.ਪੀ.ਐੱਲ. 2026 ’ਚ ਨਹੀਂ ਖੇਡੇ ਧੋਨੀ
ਪੈਰ ਦੀ ਸੱਟ ਕਾਰਨ ਆਈ.ਪੀ.ਐੱਲ. 2026 ਦਾ ਪੂਰਾ ਸੀਜ਼ਨ ਨਾ ਖੇਡ ਪਾਉਣ ਤੋਂ ਬਾਅਦ ਖਿਡਾਰੀ ਵਜੋਂ ਧੋਨੀ ਦਾ ਭਵਿੱਖ ਅਨਿਸ਼ਚਿਤ ਬਣਿਆ ਹੋਇਆ ਹੈ। 44 ਸਾਲ ਦੇ ਧੋਨੀ ਚੇਨੱਈ ਸੁਪਰ ਕਿੰਗਜ਼ ਲਈ ਇੱਕ ਵੀ ਮੈਚ ਨਹੀਂ ਖੇਡੇ। ਉੱਥੇ ਹੀ ਰਹਾਣੇ ਨੇ 2011 ਤੋਂ 2023 ਦੇ ਵਿਚਕਾਰ ਭਾਰਤ ਲਈ 85 ਟੈਸਟ, 90 ਵਨਡੇ ਅਤੇ 20 ਟੀ-20 ਆਈ ਮੈਚ ਖੇਡੇ। ਇਸ ਦੌਰਾਨ ਉਨ੍ਹਾਂ ਨੇ ਦੇਸ਼ ਦੇ ਸਭ ਤੋਂ ਭਰੋਸੇਮੰਦ ਬੱਲੇਬਾਜ਼ਾਂ ’ਚੋਂ ਇੱਕ ਵਜੋਂ ਆਪਣੀ ਪਛਾਣ ਬਣਾਈ ਅਤੇ ਕਈ ਯਾਦਗਾਰ ਜਿੱਤਾਂ ’ਚ ਅਹਿਮ ਭੂਮਿਕਾ ਨਿਭਾਈ।
