ਆਗਰਾ 29 ਸਤੰਬਰ 2026 (ਪੰਜਾਬੀ ਖਬਰਨਾਮਾ ਬਿਊਰੋ) : ਸ਼ਨੀਵਾਰ ਨੂੰ ‘ਚਾਹਰ-ਦਾਵਰ ਗਰਾਊਂਡ’ ਤੋਂ ਭਾਰਤੀ ਕ੍ਰਿਕਟਰ ਦੀਪਕ ਚਾਹਰ ਦੇ ਤਿੰਨ ‘ਪਲੇਅਰ ਐਡੀਸ਼ਨ’ ਬੈਟ ਚੋਰੀ ਹੋ ਗਏ। ਇਸ ਘਟਨਾ ਤੋਂ ਬਾਅਦ ਦੀਪਕ ਨੇ ਇੰਸਟਾਗ੍ਰਾਮ ‘ਤੇ ਇੱਕ ਵੀਡੀਓ ਜਾਰੀ ਕਰਕੇ ਚੋਰ ਨੂੰ ਬੈਟ ਵਾਪਸ ਕਰਨ ਦੀ ਅਪੀਲ ਕੀਤੀ।
ਦੀਪਕ ਚਾਹਰ ਦੇ ਪਿਤਾ, ਲੋਕੇਂਦਰ ਚਾਹਰ, ‘ਚਾਹਰ-ਦਾਵਰ ਗਰਾਊਂਡ’ ਨਾਮਕ ਕ੍ਰਿਕਟ ਅਕੈਡਮੀ ਚਲਾਉਂਦੇ ਹਨ। ਦੀਪਕ ਸ਼ਨੀਵਾਰ ਸ਼ਾਮ ਨੂੰ ਅਭਿਆਸ ਲਈ ਅਕੈਡਮੀ ਪਹੁੰਚਿਆ ਸੀ। ਅਭਿਆਸ ਦੌਰਾਨ ਉਸਨੇ ਗੇਂਦਬਾਜ਼ੀ ਦੀ ਪ੍ਰੈਕਟਿਸ ਕਰਨ ਲਈ ਆਪਣਾ ਕਿੱਟ ਬੈਗ ਇੱਕ ਪਾਸੇ ਰੱਖ ਦਿੱਤਾ।
ਇੱਕ ਘੰਟੇ ਬਾਅਦ ਜਦੋਂ ਉਹ ਬੱਲੇਬਾਜ਼ੀ ਦੇ ਅਭਿਆਸ ਲਈ ਆਪਣੇ ਬੈਟ ਲੈਣ ਵਾਪਸ ਆਇਆ ਤਾਂ ਉਸਨੂੰ ਉਹ ਉੱਥੇ ਨਹੀਂ ਮਿਲੇ। ਸੋਸ਼ਲ ਮੀਡੀਆ ‘ਤੇ ਵਾਇਰਲ ਹੋ ਰਹੀ ਵੀਡੀਓ ਵਿੱਚ ਦੀਪਕ ਦੱਸਦਾ ਹੈ ਕਿ ਤਿੰਨਾਂ ਬੈਟਾਂ ਦੀ ਕੁੱਲ ਕੀਮਤ ਲਗਪਗ 1.5 ਲੱਖ ਰੁਪਏ ਹੈ। ਉਸਨੇ ਕਿਹਾ ਕਿ ਸ਼ਾਇਦ ਚੋਰ ਨੂੰ ਇਨ੍ਹਾਂ ਦੀ ਅਸਲ ਕੀਮਤ ਦਾ ਅੰਦਾਜ਼ਾ ਨਹੀਂ ਹੈ।
ਉਸਨੇ ਬੈਟ ਵਾਪਸ ਕੀਤੇ ਜਾਣ ‘ਤੇ ਉਨ੍ਹਾਂ ਦੀ ਕੀਮਤ ਅਦਾ ਕਰਨ ਦੀ ਇੱਛਾ ਵੀ ਪ੍ਰਗਟਾਈ। ਦੀਪਕ ਨੇ ਦੱਸਿਆ ਕਿ ਉਸ ਕੋਲ ਤਿੰਨ ਆਪਸ਼ਨ ਹਨ: ਪੁਲਿਸ ਕੋਲ ਸ਼ਿਕਾਇਤ ਦਰਜ ਕਰਵਾਉਣਾ, ਮੁੱਖ ਮੰਤਰੀ ਯੋਗੀ ਆਦਿਤਿਆਨਾਥ ਜਾਂ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਨੂੰ ਅਪੀਲ ਕਰਨਾ ਜਾਂ ਰੱਬ ਅੱਗੇ ਅਰਦਾਸ ਕਰਨਾ ਕਿ ਚੋਰ ਨੂੰ ਅਕਲ ਆਵੇ ਅਤੇ ਉਹ ਬੈਟ ਵਾਪਸ ਕਰ ਦੇਵੇ।
