ਨਵੀਂ ਦਿੱਲੀ 28 ਅਗਸਤ 2026 (ਪੰਜਾਬੀ ਖਬਰਨਾਮਾ ਬਿਊਰੋ) – ਲੱਦਾਖ ਦੇ ਉਪ ਰਾਜਪਾਲ ਵਿਨੈ ਕੁਮਾਰ ਸਕਸੈਨਾ ਨੇ ਵੀਰਵਾਰ ਨੂੰ ਕੁਦਰਤੀ ਗੈਸ (ਸੀ.ਐੱਨ.ਜੀ. ਅਤੇ ਪੀ.ਐੱਨ.ਜੀ.) ਉੱਤੇ ਮੁੱਲ ਵਰਧਿਤ ਟੈਕਸ (ਵੈਟ) ਘਟਾ ਦਿੱਤਾ ਹੈ। ਸੀ.ਐੱਨ.ਜੀ. ਅਤੇ ਪੀ.ਐੱਨ.ਜੀ. ‘ਤੇ ਵੈਟ ਨੂੰ 21 ਪ੍ਰਤੀਸ਼ਤ ਤੋਂ ਘਟਾ ਕੇ ਪੰਜ ਪ੍ਰਤੀਸ਼ਤ ਕਰ ਦਿੱਤਾ ਗਿਆ ਹੈ। ਇਸ ਫ਼ੈਸਲੇ ਦਾ ਉਦੇਸ਼ ਸਸਤੀ ਸਾਫ਼ ਊਰਜਾ ਨੂੰ ਹੱਲਾਸ਼ੇਰੀ ਦੇਣਾ ਅਤੇ ਕੇਂਦਰ ਸ਼ਾਸਿਤ ਪ੍ਰਦੇਸ਼ ਦੇ ਲੋਕਾਂ ਦਾ ਜੀਵਨ ਸੁਖਾਲਾ ਬਣਾਉਣਾ ਹੈ।
ਕੀਤਾ ਜਾਵੇਗਾ ਸਿਟੀ ਗੈਸ ਡਿਸਟ੍ਰੀਬਿਊਸ਼ਨ ਨੈੱਟਵਰਕ ਦਾ ਵਿਸਤਾਰ
ਸਕਸੈਨਾ ਮੁਤਾਬਕ ਇਸ ਕਦਮ ਨਾਲ ਕੇਂਦਰ ਦੀ ਉਸ ਵਿਆਪਕ ਯੋਜਨਾ ਨੂੰ ਬਲ ਮਿਲੇਗਾ, ਜਿਸ ਦਾ ਉਦੇਸ਼ ਪੂਰੇ ਲੱਦਾਖ ‘ਚ ਪਰਿਵਾਰਾਂ ਤੱਕ ਪਾਈਪ ਵਾਲੀ ਰਸੋਈ ਗੈਸ (ਪੀ.ਐੱਨ.ਜੀ.) ਪਹੁੰਚਾਉਣ ਲਈ ਸਿਟੀ ਗੈਸ ਡਿਸਟ੍ਰੀਬਿਊਸ਼ਨ ਨੈੱਟਵਰਕ ਦਾ ਵਿਸਤਾਰ ਕਰਨਾ ਹੈ। ਉਪ ਰਾਜਪਾਲ ਨੇ ਸੋਸ਼ਲ ਮੀਡੀਆ ‘ਤੇ ਇਸ ਫ਼ੈਸਲੇ ਦੀ ਜਾਣਕਾਰੀ ਦਿੱਤੀ।
ਲੋਕਾਂ ਦਾ ਜੀਵਨ ਹੋਵੇਗਾ ਸੁਖਾਲਾ
ਉਪ ਰਾਜਪਾਲ ਨੇ ਸੋਸ਼ਲ ਮੀਡੀਆ ਪਲੇਟਫਾਰਮ ‘ਐਕਸ’ (X) ‘ਤੇ ਕਿਹਾ, “ਇਹ ਸਾਂਝਾ ਕਰਦਿਆਂ ਖ਼ੁਸ਼ੀ ਹੋ ਰਹੀ ਹੈ ਕਿ ਲੱਦਾਖ ਨੇ ਕੁਦਰਤੀ ਗੈਸ (ਸੀ.ਐੱਨ.ਜੀ. ਅਤੇ ਪੀ.ਐੱਨ.ਜੀ.) ਉੱਤੇ ਵੈਟ ਨੂੰ 21 ਪ੍ਰਤੀਸ਼ਤ ਤੋਂ ਘਟਾ ਕੇ ਸਿਰਫ਼ ਪੰਜ ਪ੍ਰਤੀਸ਼ਤ ਕਰ ਦਿੱਤਾ ਹੈ। ਇਹ ਸਸਤੀ ਸਾਫ਼ ਊਰਜਾ ਨੂੰ ਉਤਸ਼ਾਹਿਤ ਕਰਨ ਅਤੇ ਲੱਦਾਖ ਦੇ ਲੋਕਾਂ ਦਾ ਜੀਵਨ ਆਸਾਨ ਬਣਾਉਣ ਦੀ ਦਿਸ਼ਾ ‘ਚ ਇੱਕ ਵੱਡਾ ਕਦਮ ਹੈ।”
ਸਾਫ਼ ਬਾਲਣ ਨੂੰ ਹੱਲਾਸ਼ੇਰੀ
ਸਕਸੈਨਾ ਨੇ ਕਿਹਾ ਕਿ ਵੈਟ ‘ਚ ਕਟੌਤੀ ਨਾਲ ਲੱਦਾਖ ਦੇ ਦੁਰਘਟਨਾ-ਭਰੇ ਅਤੇ ਔਖੇ ਮੌਸਮੀ ਹਾਲਾਤ ਕਾਰਨ ਊਰਜਾ ਦੀ ਵੱਡੀ ਆਵਾਜਾਈ ਲਾਗਤ ਦੀ ਭਰਪਾਈ ਕਰਨ ‘ਚ ਵੀ ਮਦਦ ਮਿਲੇਗੀ। ਇਸ ਤੋਂ ਇਲਾਵਾ, ਇਸ ਨਾਲ ਖ਼ਪਤਕਾਰਾਂ ‘ਚ ਸਾਫ਼ ਬਾਲਣ ਦੀ ਸਵੀਕਾਰਤਾ ਵੀ ਵਧੇਗੀ।
