ਏਪੀ 18 ਅਗਸਤ 2026 (ਪੰਜਾਬੀ ਖਬਰਨਾਮਾ ਬਿਊਰੋ) : ਟੋਰੰਟੋ ’ਚ ਵੀਰਵਾਰ ਨੂੰ ਖ਼ਿਤਾਬ ਜਿੱਤਣ ਤੋਂ ਬਾਅਦ ਘੱਟ ਸਮੇਂ ’ਚ ਸਿਨਸਿਨਾਟੀ ਪਹੁੰਚੀ ਸਵੀਆਤੇਕ ਨੇ ਐਤਵਾਰ ਨੂੰ ਸਿਨਸਿਨਾਟੀ ਓਪਨ ਦੇ ਸੈਂਟਰ ਕੋਰਟ ’ਤੇ ਕੋਲੰਬੀਆ ਦੀ ਐਮੀਲੀਆਨਾ ਅਰਾਂਗੋ ਨੂੰ 6-3, 6-0 ਨਾਲ ਹਰਾ ਕੇ ਆਪਣੀ ਮੁਹਿੰਮ ਦੀ ਸ਼ੁਰੂਆਤ ਜਿੱਤ ਨਾਲ ਕੀਤੀ। ਇਹ ਸਵੀਆਤੇਕ ਦੀ ਲਗਾਤਾਰ ਸੱਤਵੀਂ ਜਿੱਤ ਹੈ। ਉਸਨੇ ਪਿਛਲੇ ਸਾਲ ਸਿਨਸਿਨਾਟੀ ’ਚ ਖ਼ਿਤਾਬ ਜਿੱਤਿਆ ਸੀ। ਐਤਵਾਰ ਨੂੰ ਦੁਨੀਆ ਦੀ ਨੰਬਰ ਇਕ ਖਿਡਾਰਨ ਐਰੀਨਾ ਸਬਾਲੇਂਕਾ ਨੈ ਵੀ ਜਿੱਤ ਦਰਜ ਕੀਤੀ। 21 ਅਕਤੂਬਰ 2024 ਤੋਂ ਲਗਾਤਾਰ 95 ਹਫਤਿਆਂ ਤੱਕ ਸਿਖਰਲੀ ਰੈਂਕਿੰਗ ’ਤੇ ਕਾਬਜ਼ ਸਬਾਲੇਂਕਾ ਨੇ ਆਸਟ੍ਰੇਲੀਆ ਦੀ ਤਾਲੀਆ ਗਿਬਸਨ ਨੂੰ 6-2, 7-6 (2) ਨਾਲ ਹਰਾਇਆ। ਸਿਨਸਿਨਾਟੀ ’ਚ 2022 ਤੋਂ ਉਸਦਾ ਰਿਕਾਰਡ ਹੁਣ 15-3 ਹੋ ਗਿਆ ਹੈ। ਟੋਰੰਟੋ ਫਾਈਨਲ ’ਚ ਸਵੀਆਤੇਕ ਤੋਂ ਹਾਰਣ ਵਾਲੀ ਦੁਨੀਆ ਦੀ ਨੰਬਰ ਦੋ ਖਿਡਾਰਨ ਐਲੇਨਾ ਰਿਬਾਕਿਨਾ ਨੇ ਅਮਰੀਕਾ ਦੀ ਟੇਲਰ ਟਾਊਨਸੈਂਡ ਨੂੰ 6-3, 6-4 ਨਾਲ ਮਾਤ ਦਿੱਤੀ। ਪਿਛਲੇ ਸਾਲ ਸਿਨਸਿਨਾਟੀ ’ਚ ਸੈਮੀਫਾਈਨਲ ਤੱਕ ਪਹੁੰਚੀ ਰਿਬਾਕਿਨਾ ਹੁਣ ਆਪਣਾ 14ਵਾਂ ਹਾਰਡ ਕੋਰਟ ਖ਼ਿਤਾਬ ਜਿੱਤਣ ਦੀ ਭਾਲ ’ਚ ਹੈ। ਉਸਨੇ ਜਨਵਰੀ ’ਚ ਆਸਟ੍ਰੇਲੀਅਨ ਓਪਨ ਦਾ ਖ਼ਿਤਾਬ ਜਿੱਤਿਆ ਸੀ।
ਮਰਦ ਵਰਗ ’ਚ ਦੁਨੀਆ ਦੇ 10ਵੇਂ ਨੰਬਰ ਦੇ ਖਿਡਾਰੀ ਟੇਲਰ ਫ੍ਰਿਟਜ਼ ਨੇ ਹਮਵਤਨ ਐਲੇਕਸ ਮਾਈਕੇਲਸਨ ਨੂੰ 6-3, 6-4 ਨਾਲ ਹਰਾਇਆ। ਦੁਨੀਆ ਦੇ ਚੌਥੇ ਨੰਬਰ ਦੇ ਖਿਡਾਰੀ ਫੈਲਿਕਸ ਆਜੇ-ਅਲੀਆਸੀਮੇ ਨੇ ਸਟੈਫਾਨੋਸ ਸਿਤਸਿਪਾਸ ਨੂੰ ਸਿੱਧੇ ਸੈੱਟਾਂ ’ਚ 6-3, 7-5 ਨਾਲ ਹਰਾਇਆ। ਲੱਖ ਦੇ ਹੇਠਲੇ ਹਿੱਸੇ ’ਚ ਸੱਟ ਕਾਰਨ ਮਾਂਟ੍ਰੀਅਲ ਤੋਂ ਹਟਣ ਤੋਂ ਬਾਅਦ ਇਹ ਹਾਰਡ ਕੋਰਟ ’ਤੇ ਮਾਰਚ ਤੋਂ ਬਾਅਦ ਉਸਦਾ ਪਹਿਲਾ ਮੁਕਾਬਲਾ ਸੀ। ਸਿਤਸਿਪਾਸ ਵਿਰੁੱਧ 11 ਮੁਕਾਬਲਿਆਂ ’ਚ ਇਹ ਉਸਦੀ ਸੱਤਵੀਂ ਜਿੱਤ ਸੀ। ਅਮਰੀਕਾ ਦੀ ਮੈਡੀਸਨ ਕੀਜ਼ ਨੇ ਡਾਰੀਆ ਸਨਿਗੁਰ ਨੂੰ 4-6, 6-3, 6-3 ਨਾਲ ਹਰਾਇਆ।
