ਵਾਰਸਾ 04 ਸਤੰਬਰ 2026 (ਪੰਜਾਬੀ ਖਬਰਨਾਮਾ ਬਿਊਰੋ) : ਵੀਰਵਾਰ ਨੂੰ ਪੋਲੈਂਡ ਦੇ ਡਾਂਸਕ ’ਚ ਪਟੜੀਆਂ ‘ਤੇ ਫਸੇ ਇੱਕ ਟਰੱਕ ਨੂੰ ਤੇਜ਼ ਰਫ਼ਤਾਰ ਟ੍ਰੇਨ ਨੇ ਜ਼ੋਰਦਾਰ ਟੱਕਰ ਮਾਰ ਦਿੱਤੀ। ਇਸ ਟੱਕਰ ’ਚ ਟਰੱਕ ਪੂਰੀ ਤਰ੍ਹਾਂ ਚਕਨਾਚੂਰ ਹੋ ਗਿਆ। ਸਟੇਟ ਫਾਇਰ ਸਰਵਿਸ ਡਾਂਸਕ ਵੱਲੋਂ ਘਟਨਾ ਤੋਂ ਬਾਅਦ ਜਾਰੀ ਕੀਤੇ ਗਏ ਸੀਸੀਟੀਵੀ ਫੁਟੇਜ ’ਚ ਤਬਾਹੀ ਦਾ ਮੰਜ਼ਰ ਸਾਫ਼ ਦੇਖਿਆ ਜਾ ਸਕਦਾ ਹੈ। ਫੁਟੇਜ ਵਿੱਚ ਨੁਕਸਾਨੀ ਗਈ ਪੀ.ਕੇ.ਪੀ. ਇੰਟਰਸਿਟੀ ਟ੍ਰੇਨ ਤੇ ਬੁਰੀ ਤਰ੍ਹਾਂ ਪਿਚਕ ਚੁੱਕਾ ਟਰੱਕ ਡਾਂਸਕ ਲਿਪਸੇ ਸਟੇਸ਼ਨ ਦੇ ਨੇੜੇ ਖੜ੍ਹੇ ਦਿਖਾਈ ਦੇ ਰਹੇ ਹਨ। ਦਮਕਲ ਵਿਭਾਗ ਦੇ ਅਨੁਸਾਰ, ਉਨ੍ਹਾਂ ਨੂੰ ਇਸ ਭਿਆਨਕ ਹਾਦਸੇ ਦੀ ਸੂਚਨਾ ਦੁਪਹਿਰ ਲਗਭਗ 12:30 ਵਜੇ ਮਿਲੀ ਸੀ।
ਯਾਤਰੀਆਂ ਦਾ ਬਚਾਅ ਕਾਰਜ
ਦਮਕਲ ਵਿਭਾਗ ਨੇ ਦੱਸਿਆ ਕਿ ਗਿਡਨਿਆ ਤੋਂ ਜ਼ਿਲੋਨਾ ਗੋਰਾ ਜਾ ਰਹੀ ਇਸ ਟ੍ਰੇਨ ਵਿੱਚ ਹਾਦਸੇ ਵੇਲੇ ਲਗਭਗ 300 ਯਾਤਰੀ ਸਵਾਰ ਸਨ। ਰਾਹਤ ਦੀ ਗੱਲ ਇਹ ਰਹੀ ਕਿ ਘਟਨਾ ਤੋਂ ਬਾਅਦ ਸਾਰੇ ਯਾਤਰੀ ਸੁਰੱਖਿਅਤ ਢੰਗ ਨਾਲ ਆਪਣੇ ਆਪ ਹੀ ਟ੍ਰੇਨ ਤੋਂ ਬਾਹਰ ਨਿਕਲ ਆਏ। ਸੂਚਨਾ ਮਿਲਦਿਆਂ ਹੀ ਮੌਕੇ ‘ਤੇ ਪਹੁੰਚੀ ਮੈਡੀਕਲ ਬਚਾਅ ਟੀਮ ਨੇ ਚਾਰ ਲੋਕਾਂ ਦੀ ਮੈਡੀਕਲ ਜਾਂਚ ਕੀਤੀ, ਜਿਸ ਵਿੱਚ ਟਰੱਕ ਡਰਾਈਵਰ, ਟ੍ਰੇਨ ਕੰਡਕਟਰ ਅਤੇ ਦੋ ਯਾਤਰੀ ਸ਼ਾਮਲ ਹਨ।
ਸ਼ੁਰੂਆਤੀ ਜਾਂਚ ਤੋਂ ਬਾਅਦ ਜ਼ਖਮੀ ਟਰੱਕ ਡਰਾਈਵਰ ਨੂੰ ਇਲਾਜ ਲਈ ਹਸਪਤਾਲ ਵਿੱਚ ਭਰਤੀ ਕਰਵਾ ਦਿੱਤਾ ਗਿਆ। ਇਸ ਭਿਆਨਕ ਹਾਦਸੇ ਕਾਰਨ ਇਲਾਕੇ ਵਿੱਚ ਰੇਲਵੇ ਆਵਾਜਾਈ ਨੂੰ ਪੂਰੀ ਤਰ੍ਹਾਂ ਰੋਕਣਾ ਪਿਆ। ਫਸੇ ਹੋਏ ਯਾਤਰੀਆਂ ਨੂੰ ਉਨ੍ਹਾਂ ਦੀ ਮੰਜ਼ਿਲ ਤੱਕ ਪਹੁੰਚਾਉਣ ਲਈ ਬੱਸਾਂ ਦਾ ਪ੍ਰਬੰਧ ਕੀਤਾ ਗਿਆ, ਜਿਨ੍ਹਾਂ ਰਾਹੀਂ ਉਨ੍ਹਾਂ ਨੂੰ ਚਤੇਵ ਸ਼ਹਿਰ ਭੇਜਿਆ ਗਿਆ।
ਰੇਲਵੇ ਦੀ ਅਹਿਮ ਚੇਤਾਵਨੀ
ਪੋਲਿਸ਼ ਰੇਲਵੇ ਲਾਈਨਜ਼ ਐੱਸ.ਏ. ਨੇ ਵਾਹਨ ਚਾਲਕਾਂ ਨੂੰ ਭਵਿੱਖ ਵਿੱਚ ਅਜਿਹੀਆਂ ਘਟਨਾਵਾਂ ਤੋਂ ਬਚਣ ਲਈ ਜਾਗਰੂਕ ਕਰਨ ਦੇ ਉਦੇਸ਼ ਨਾਲ ਹਾਦਸੇ ਦਾ ਸੀਸੀਟੀਵੀ ਫੁਟੇਜ ਵੀ ਜਾਰੀ ਕੀਤਾ ਹੈ।ਰੇਲਵੇ ਨੇ ਮੋਟਰ ਚਾਲਕਾਂ ਨੂੰ ਇਹ ਯਾਦ ਦਿਵਾਉਣ ਲਈ ਫੁਟੇਜ ਸਾਂਝਾ ਕੀਤਾ ਕਿ ਜੇਕਰ ਉਨ੍ਹਾਂ ਦਾ ਵਾਹਨ ਕਦੇ ਵੀ ਰੇਲਵੇ ਕਰਾਸਿੰਗ ‘ਤੇ ਬੰਦ ਹੋ ਜਾਵੇ ਅਤੇ ਬੈਰੀਅਰਾਂ ਦੇ ਵਿਚਕਾਰ ਫਸ ਜਾਵੇ, ਤਾਂ ਟ੍ਰੇਨ ਦੇ ਲੰਘਣ ਦਾ ਇੰਤਜ਼ਾਰ ਬਿਲਕੁਲ ਨਾ ਕਰੋ।
