ਨਵੀਂ ਦਿੱਲੀ 29 ਅਪ੍ਰੈਲ 2026 (ਪੰਜਾਬੀ ਖਬਰਨਾਮਾ ਬਿਊਰੋ) : ਪੱਛਮੀ ਏਸ਼ੀਆ ‘ਚ ਜਾਰੀ ਤਣਾਅ ਕਾਰਨ ਕੱਚੇ ਤੇਲ ਦੀਆਂ ਕੀਮਤਾਂ ਉੱਚੀਆਂ ਰਹਿਣ ਦੀ ਸਥਿਤੀ ‘ਚ ਚਾਲੂ ਵਿੱਤੀ ਸਾਲ ‘ਚ ਭਾਰਤ ਦੀ ਆਰਥਿਕ ਵਿਕਾਸ ਦਰ ਘਟ ਕੇ ਕਰੀਬ ਛੇ ਫੀਸਦੀ ਰਹਿ ਸਕਦੀ ਹੈ, ਜਦਕਿ ਪ੍ਰਚੂਨ ਮਹਿੰਗਾਈ ਵਧ ਕੇ ਛੇ ਫੀਸਦੀ ਤਕ ਪਹੁੰਚ ਸਕਦੀ ਹੈ। ਈਵਾਈ (EY) ਇੰਡੀਆ ਨੇ ਬੁੱਧਵਾਰ ਨੂੰ ਇਹ ਅਨੁਮਾਨ ਜਾਰੀ ਕੀਤਾ। ਸਲਾਹਕਾਰ ਕੰਪਨੀ ਈਵਾਈ ਇੰਡੀਆ ਦੇ ਮੁੱਖ ਨੀਤੀ ਸਲਾਹਕਾਰ ਡੀਕੇ ਸ੍ਰੀਵਾਸਤਵ ਨੇ ਕਿਹਾ ਕਿ ਜੇਕਰ ਭਾਰਤੀ ਕੱਚੇ ਤੇਲ ‘ਬਾਸਕਟ’ ਦੀ ਔਸਤ ਕੀਮਤ ਵਿੱਤੀ ਸਾਲ 2026-27 ‘ਚ 120 ਡਾਲਰ ਪ੍ਰਤੀ ਬੈਰਲ ਰਹਿੰਦੀ ਹੈ ਤਾਂ ਅਸਲ GDP ਵਾਧਾ ਦਰ ਕਰੀਬ ਛੇ ਫੀਸਦੀ ਤੇ ਉਪਭੋਗਤਾ ਮੁੱਲ ਸੂਚਕ ਅੰਕ ‘ਤੇ ਅਧਾਰਤ ਪ੍ਰਚੂਨ ਮਹਿੰਗਾਈ ਛੇ ਫੀਸਦੀ ਤਕ ਵਧ ਸਕਦੀ ਹੈ।
‘ਤੇਲ ਦੀ ਸਪਲਾਈ ਆਮ ਹੋਣ ‘ਚ ਲੱਗੇਗਾ ਸਮਾਂ’
ਸ਼੍ਰੀਵਾਸਤਵ ਨੇ ਕਿਹਾ, “ਵਿੱਤੀ ਘਾਟੇ ‘ਤੇ ਦਬਾਅ ਘਟਾਉਣ ਲਈ ਵਧੀਆਂ ਊਰਜਾ ਕੀਮਤਾਂ ਦਾ ਅਸਰ ਕਾਫ਼ੀ ਹੱਦ ਤਕ ਖਪਤਕਾਰਾਂ ਤਕ ਪਹੁੰਚਾਉਣਾ ਹੋਵੇਗਾ।” ਈਵਾਈ ਦੀ ‘ਇਕਾਨਮੀ ਵਾਚ’ ਰਿਪੋਰਟ ਮੁਤਾਬਕ, ਨੀਤੀਗਤ ਦਖ਼ਲਅੰਦਾਜ਼ੀ ਦੀ ਗੁੰਜਾਇਸ਼ ਸੀਮਤ ਹੈ, ਪਰ ਹਾਲਾਤ ਨੂੰ ਦੇਖਦੇ ਹੋਏ ਰੈਪੋ ਦਰ ਵਿੱਚ ਵਾਧਾ ਅਤੇ ਕੱਚੇ ਤੇਲ ਦੀ ਸਪਲਾਈ ਦੇ ਸਰੋਤਾਂ ਵਿੱਚ ਤੇਜ਼ੀ ਨਾਲ ਵਿਭਿੰਨਤਾ ਲਿਆਉਣ ‘ਤੇ ਵਿਚਾਰ ਕੀਤਾ ਜਾਣਾ ਚਾਹੀਦਾ ਹੈ।
ਸ਼੍ਰੀਵਾਸਤਵ ਨੇ ਪੱਛਮੀ ਏਸ਼ੀਆ ਸੰਕਟ ਲੰਬਾ ਖਿੱਚਣ ਦਾ ਖ਼ਦਸ਼ਾ ਪ੍ਰਗਟਾਉਂਦਿਆਂ ਕਿਹਾ ਕਿ ਇਸ ਦਾ ਹੱਲ ਨਿਕਲ ਜਾਣ ‘ਤੇ ਵੀ ਕੱਚੇ ਤੇਲ ਦੀ ਵਿਸ਼ਵਵਿਆਪੀ ਸਪਲਾਈ ਨੂੰ ਆਮ ਹੋਣ ਵਿੱਚ ਕਾਫ਼ੀ ਸਮਾਂ ਲੱਗ ਸਕਦਾ ਹੈ।
ਕਿੱਥੋਂ ਤਕ ਜਾ ਸਕਦੀਆਂ ਹਨ ਕੀਮਤਾਂ?
ਅਮਰੀਕਾ ਦੇ ਐਨਰਜੀ ਇਨਫਰਮੇਸ਼ਨ ਐਡਮਿਨਿਸਟ੍ਰੇਸ਼ਨ (EIA) ਦੇ ਅਪ੍ਰੈਲ 2026 ਦੇ ‘ਅਲਪਕਾਲੀ ਊਰਜਾ ਪਰਿਦ੍ਰਿਸ਼’ ਅਨੁਸਾਰ, ਬ੍ਰੈਂਟ ਕਰੂਡ ਦੀਆਂ ਕੀਮਤਾਂ 2026 ਦੀ ਪਹਿਲੀ ਤਿਮਾਹੀ ਦੀ ਔਸਤ 81 ਡਾਲਰ ਪ੍ਰਤੀ ਬੈਰਲ ਤੋਂ ਵਧ ਕੇ ਦੂਜੀ ਤਿਮਾਹੀ ‘ਚ 115 ਡਾਲਰ ਪ੍ਰਤੀ ਬੈਰਲ ਤੱਕ ਪਹੁੰਚ ਸਕਦੀਆਂ ਹਨ। ਹਾਲਾਂਕਿ, ਸੰਕਟ ਦੀ ਦਿਸ਼ਾ ਬਦਲਣ ‘ਤੇ ਕੀਮਤਾਂ ਵਿੱਚ ਨਰਮੀ ਵੀ ਆ ਸਕਦੀ ਹੈ। ਵੈਸੇ, ਭਾਰਤ ਲਈ ਵੱਖ-ਵੱਖ ਵਿਸ਼ਵਵਿਆਪੀ ਸੰਸਥਾਵਾਂ ਦੇ ਅਨੁਮਾਨ ਇਸ ਤੋਂ ਕੁਝ ਜ਼ਿਆਦਾ ਆਸ਼ਾਵਾਦੀ ਹਨ।
ਕਿੰਨਾ ਹੈ GDP ਗਰੋਥ ਦਾ ਅਨੁਮਾਨ?
ਅੰਤਰਰਾਸ਼ਟਰੀ ਮੁਦਰਾ ਕੋਸ਼ (IMF) ਨੇ ਚਾਲੂ ਵਿੱਤੀ ਸਾਲ ਲਈ ਭਾਰਤ ਦੀ ਵਿਕਾਸ ਦਰ 6.5 ਫੀਸਦੀ ਰਹਿਣ ਦਾ ਅਨੁਮਾਨ ਜਤਾਇਆ ਹੈ, ਜਦਕਿ ਏਸ਼ੀਆਈ ਵਿਕਾਸ ਬੈਂਕ (ADB) ਅਤੇ ਵਿਸ਼ਵ ਬੈਂਕ ਨੇ ਕ੍ਰਮਵਾਰ 6.9 ਫੀਸਦੀ ਅਤੇ 6.6 ਫੀਸਦੀ ਦਾ ਅਨੁਮਾਨ ਲਗਾਇਆ ਹੈ। ਦੂਜੇ ਪਾਸੇ ਰਿਜ਼ਰਵ ਬੈਂਕ ਨੇ ਹਾਲ ਹੀ ਵਿੱਚ ਮੌਦਰਿਕ ਨੀਤੀ ਸਮੀਖਿਆ ਵਿੱਚ 2026-27 ਲਈ ਆਰਥਿਕ ਵਿਕਾਸ ਦਰ 6.9 ਫੀਸਦੀ ਅਤੇ ਔਸਤ ਮਹਿੰਗਾਈ 4.6 ਫੀਸਦੀ ਰਹਿਣ ਦਾ ਅਨੁਮਾਨ ਜਤਾਇਆ ਹੈ।
