ਨਵੀਂ ਦਿੱਲੀ 19 ਨਵੰਬਰ 2026 (ਪੰਜਾਬੀ ਖਬਰਨਾਮਾ ਬਿਊਰੋ) : ਭਾਰਤ ਦੇ ਦਿੱਗਜ ਲੈੱਗ ਸਪਿਨਰ ਯੁਜਵੇਂਦਰ ਚਾਹਲ ਨੇ ਇਤਿਹਾਸ ਦੇ ਪੰਨਿਆਂ ਵਿੱਚ ਆਪਣਾ ਨਾਮ ਦਰਜ ਕਰਵਾ ਲਿਆ ਹੈ। ਚਾਹਲ T20 ਕ੍ਰਿਕਟ ਵਿੱਚ 400 ਵਿਕਟਾਂ ਲੈਣ ਵਾਲੇ ਭਾਰਤ ਦੇ ਪਹਿਲੇ ਗੇਂਦਬਾਜ਼ ਬਣ ਗਏ ਹਨ। ਉਨ੍ਹਾਂ ਨੇ ਬੁੱਧਵਾਰ ਨੂੰ ਸਈਅਦ ਮੁਸ਼ਤਾਕ ਅਲੀ ਟਰਾਫੀ 2026 ਦੇ ਗਰੁੱਪ ਬੀ ਮੁਕਾਬਲੇ ਵਿੱਚ ਹਰਿਆਣਾ ਵੱਲੋਂ ਖੇਡਦਿਆਂ ਤਾਮਿਲਨਾਡੂ ਖ਼ਿਲਾਫ਼ ਇਹ ਉਪਲਬਧੀ ਹਾਸਲ ਕੀਤੀ।

ਚਾਹਲ ਨੂੰ ਇਹ ਰਿਕਾਰਡ ਬਣਾਉਣ ਲਈ ਸਿਰਫ਼ ਇੱਕ ਵਿਕਟ ਦੀ ਲੋੜ ਸੀ। ਉਨ੍ਹਾਂ ਨੇ SMAT ਵਿੱਚ ਹਰਿਆਣਾ ਦੇ ਤੀਜੇ ਮੈਚ ਦੌਰਾਨ ਸ਼ਾਨਦਾਰ ਗੇਂਦਬਾਜ਼ੀ ਕਰਦਿਆਂ 16 ਦੌੜਾਂ ਦੇ ਕੇ ਤਿੰਨ ਵਿਕਟਾਂ ਹਾਸਲ ਕੀਤੀਆਂ ਅਤੇ ਇਤਿਹਾਸ ਰਚ ਦਿੱਤਾ।

ਅਮਿਤ ਸਾਤਵਿਕ ਨੂੰ ਆਊਟ ਕਰਕੇ ਰਚਿਆ ਇਤਿਹਾਸ

ਚਾਹਲ ਨੇ ਮੈਚ ਵਿੱਚ ਅਮਿਤ ਸਾਤਵਿਕ ਦੀ ਵਿਕਟ ਲੈ ਕੇ 400 ਵਿਕਟਾਂ ਦਾ ਅੰਕੜਾ ਪਾਰ ਕੀਤਾ। ਅਮਿਤ ਤੋਂ ਇਲਾਵਾ ਉਨ੍ਹਾਂ ਨੇ ਸਾਈ ਕਿਸ਼ੋਰ ਅਤੇ ਮਨਿਮਾਰਨ ਸਿਧਾਰਥ ਨੂੰ ਵੀ ਆਊਟ ਕੀਤਾ।

ਚਾਹਲ ਦੀ ਸ਼ਾਨਦਾਰ ਗੇਂਦਬਾਜ਼ੀ ਦੀ ਬਦੌਲਤ ਹਰਿਆਣਾ ਨੇ ਤਾਮਿਲਨਾਡੂ ਦੀ ਪੂਰੀ ਟੀਮ ਨੂੰ ਸਿਰਫ਼ 124 ਦੌੜਾਂ ‘ਤੇ ਸਮੇਟ ਦਿੱਤਾ।

ਚਾਹਲ ਨੇ ਹਰਿਆਣਾ ਲਈ 71 T20 ਮੈਚਾਂ ਵਿੱਚ 68 ਵਿਕਟਾਂ ਹਾਸਲ ਕੀਤੀਆਂ ਹਨ। ਉੱਥੇ ਹੀ ਭਾਰਤੀ ਟੀਮ ਵੱਲੋਂ ਖੇਡਦਿਆਂ ਉਨ੍ਹਾਂ ਨੇ 98 ਵਿਕਟਾਂ ਆਪਣੇ ਨਾਮ ਕੀਤੀਆਂ ਹਨ।

ਇਸ ਤੋਂ ਇਲਾਵਾ IPL ਵਿੱਚ ਉਹ 233 ਵਿਕਟਾਂ ਲੈ ਚੁੱਕੇ ਹਨ। ਚੈਂਪੀਅਨਜ਼ ਲੀਗ ਵਿੱਚ ਮੁੰਬਈ ਇੰਡੀਅਨਜ਼ ਵੱਲੋਂ ਖੇਡਦਿਆਂ ਉਨ੍ਹਾਂ ਨੇ ਤਿੰਨ ਵਿਕਟਾਂ ਹਾਸਲ ਕੀਤੀਆਂ ਸਨ।

ਸਈਅਦ ਮੁਸ਼ਤਾਕ ਅਲੀ ਟਰਾਫੀ ਵਿੱਚ ਚਾਹਲ ਹਰਿਆਣਾ ਲਈ ਤਿੰਨੇ ਮੈਚ ਖੇਡ ਚੁੱਕੇ ਹਨ। ਇਸ ਦੌਰਾਨ ਉਨ੍ਹਾਂ ਨੇ ਕੁੱਲ ਛੇ ਵਿਕਟਾਂ ਲਈਆਂ ਹਨ। ਪਹਿਲੇ ਮੈਚ ਵਿੱਚ ਉਹ ਕੋਈ ਵਿਕਟ ਹਾਸਲ ਨਹੀਂ ਕਰ ਸਕੇ ਸਨ, ਪਰ ਇਸ ਤੋਂ ਬਾਅਦ ਲਗਾਤਾਰ ਦੋ ਮੈਚਾਂ ਵਿੱਚ ਤਿੰਨ-ਤਿੰਨ ਵਿਕਟਾਂ ਲੈ ਕੇ ਉਨ੍ਹਾਂ ਨੇ ਸ਼ਾਨਦਾਰ ਵਾਪਸੀ ਕੀਤੀ।

ਰਾਸ਼ਿਦ ਖ਼ਾਨ ਸਭ ਤੋਂ ਉੱਪਰ

T20 ਕ੍ਰਿਕਟ ਦੇ ਇਤਿਹਾਸ ਵਿੱਚ ਸਭ ਤੋਂ ਵੱਧ ਵਿਕਟਾਂ ਲੈਣ ਦਾ ਰਿਕਾਰਡ ਅਫ਼ਗਾਨਿਸਤਾਨ ਦੇ ਸਟਾਰ ਗੇਂਦਬਾਜ਼ ਰਾਸ਼ਿਦ ਖ਼ਾਨ ਦੇ ਨਾਮ ਹੈ। ਰਾਸ਼ਿਦ ਨੇ 543 ਮੈਚਾਂ ਵਿੱਚ 743 ਵਿਕਟਾਂ ਹਾਸਲ ਕੀਤੀਆਂ ਹਨ।

ਇਸ ਤੋਂ ਇਲਾਵਾ ਉਹ T20 ਇੰਟਰਨੈਸ਼ਨਲ ਕ੍ਰਿਕਟ ਵਿੱਚ 200 ਵਿਕਟਾਂ ਲੈਣ ਵਾਲੇ ਦੁਨੀਆ ਦੇ ਇਕਲੌਤੇ ਗੇਂਦਬਾਜ਼ ਵੀ ਹਨ।

ਉੱਥੇ ਹੀ ਚਾਹਲ ਤੋਂ ਬਾਅਦ ਭਾਰਤ ਲਈ ਸਭ ਤੋਂ ਵੱਧ T20 ਵਿਕਟਾਂ ਲੈਣ ਦੇ ਮਾਮਲੇ ਵਿੱਚ ਭੁਵਨੇਸ਼ਵਰ ਕੁਮਾਰ ਦੂਜੇ ਨੰਬਰ ‘ਤੇ ਹਨ। ਭੁਵੀ ਨੇ 340 ਮੈਚਾਂ ਵਿੱਚ 366 ਵਿਕਟਾਂ ਹਾਸਲ ਕੀਤੀਆਂ ਹਨ। ਉਹ ਵੀ ਜਲਦੀ ਹੀ 400 ਵਿਕਟਾਂ ਦਾ ਅੰਕੜਾ ਛੂਹ ਸਕਦੇ ਹਨ।

Punjabi Khabarnama

ਜਵਾਬ ਦੇਵੋ

ਤੁਹਾਡਾ ਈ-ਮੇਲ ਪਤਾ ਪ੍ਰਕਾਸ਼ਿਤ ਨਹੀਂ ਕੀਤਾ ਜਾਵੇਗਾ। ਲੋੜੀਂਦੇ ਖੇਤਰਾਂ 'ਤੇ * ਦਾ ਨਿਸ਼ਾਨ ਲੱਗਿਆ ਹੋਇਆ ਹੈ।