ਨਵੀਂ ਦਿੱਲੀ 10 ਨਵੰਬਰ 2026 (ਪੰਜਾਬੀ ਖਬਰਨਾਮਾ ਬਿਊਰੋ) : ਜੇਕਰ ਤੁਹਾਡੇ ਆਧਾਰ ਕਾਰਡ ਵਿੱਚ ਪੁਰਾਣਾ ਜਾਂ ਬੰਦ ਹੋ ਚੁੱਕਾ ਮੋਬਾਈਲ ਨੰਬਰ ਦਰਜ ਹੈ ਤਾਂ ਤੁਹਾਡੇ ਕਈ ਕੰਮ ਰੁਕ ਸਕਦੇ ਹਨ। ਭਾਵੇਂ ਬੈਂਕ ਨਾਲ ਜੁੜਿਆ ਕੋਈ ਕੰਮ ਹੋਵੇ ਜਾਂ ਫਿਰ ਸਰਕਾਰੀ ਯੋਜਨਾਵਾਂ ਦਾ ਲਾਭ ਲੈਣਾ ਹੋਵੇ, ਆਧਾਰ ਕਾਰਡ ਵਿੱਚ ਗਲਤ ਮੋਬਾਈਲ ਨੰਬਰ ਹੋਣ ਕਾਰਨ ਤੁਹਾਨੂੰ ਪਰੇਸ਼ਾਨੀ ਦਾ ਸਾਹਮਣਾ ਕਰਨਾ ਪੈ ਸਕਦਾ ਹੈ।
ਆਧਾਰ ਕਾਰਡ ‘ਚ ਮੋਬਾਈਲ ਨੰਬਰ ਕਿਵੇਂ ਅਪਡੇਟ ਕਰੀਏ
ਜੇਕਰ ਤੁਸੀਂ ਵੀ ਆਪਣੇ ਆਧਾਰ ਕਾਰਡ ਨਾਲ ਜੁੜਿਆ ਮੋਬਾਈਲ ਨੰਬਰ ਬਦਲਣਾ ਚਾਹੁੰਦੇ ਹੋ ਤਾਂ ਤੁਹਾਨੂੰ ਕਿਸੇ ਵੀ ਦਫ਼ਤਰ ਦੇ ਚੱਕਰ ਲਗਾਉਣ ਦੀ ਲੋੜ ਨਹੀਂ ਹੈ। ਤੁਸੀਂ ਆਪਣੇ ਮੋਬਾਈਲ ਫੋਨ ਵਿੱਚ ਅਧਿਕਾਰਤ Aadhaar App ਦੀ ਮਦਦ ਨਾਲ ਇਹ ਕੰਮ ਘਰ ਬੈਠੇ ਕਰ ਸਕਦੇ ਹੋ।
ਮੋਬਾਈਲ ਨੰਬਰ ਅਪਡੇਟ ਕਰਨ ਲਈ ਹੇਠਾਂ ਦਿੱਤੇ ਸਟੈੱਪ ਫਾਲੋ ਕਰੋ
- ਸਭ ਤੋਂ ਪਹਿਲਾਂ ਆਪਣੇ ਮੋਬਾਈਲ ਫੋਨ (Android ਜਾਂ iPhone) ਵਿੱਚ ਅਧਿਕਾਰਤ Aadhaar App ਡਾਊਨਲੋਡ ਕਰੋ।
- ਐਪ ਖੋਲ੍ਹ ਕੇ ਆਪਣੀ ਪਸੰਦ ਦੀ ਭਾਸ਼ਾ ਚੁਣੋ ਅਤੇ ਆਪਣਾ 12 ਅੰਕਾਂ ਵਾਲਾ ਆਧਾਰ ਨੰਬਰ ਦਰਜ ਕਰੋ।
- ਐਪ ਦੀਆਂ ਨਿਯਮਾਂ ਅਤੇ ਸ਼ਰਤਾਂ (Terms & Conditions) ਦੇ ਨਾਲ ਪ੍ਰਾਈਵੇਸੀ ਪਾਲਿਸੀ ਨੂੰ ਸਵੀਕਾਰ ਕਰੋ।
- ਐਪ ਵਿੱਚ ਵਰਤੋਂ ਲਈ ਸਹੀ ਸਿਮ ਕਾਰਡ ਦੀ ਚੋਣ ਕਰੋ ਅਤੇ ਫੇਸ ਆਥੈਂਟੀਕੇਸ਼ਨ (ਚਿਹਰੇ ਦੀ ਸਕੈਨਿੰਗ) ਦੀ ਪ੍ਰਕਿਰਿਆ ਪੂਰੀ ਕਰੋ।
- ਐਪ ਨੂੰ ਸੁਰੱਖਿਅਤ ਰੱਖਣ ਲਈ 6 ਅੰਕਾਂ ਦਾ ਨਵਾਂ ਪਿੰਨ (PIN) ਸੈੱਟ ਕਰੋ, ਤਾਂ ਜੋ ਅੱਗੇ ਆਸਾਨੀ ਨਾਲ ਲੌਗਇਨ ਕਰ ਸਕੋ।
- ਹੁਣ ਐਪ ਵਿੱਚ ਲੌਗਇਨ ਕਰਕੇ ‘Services’ ਸੈਕਸ਼ਨ ਵਿੱਚ ਜਾਓ ਅਤੇ ‘Mobile Number Update’ ਦੇ ਵਿਕਲਪ ‘ਤੇ ਕਲਿੱਕ ਕਰੋ।
- ਆਪਣਾ ਨਵਾਂ ਚਾਲੂ ਮੋਬਾਈਲ ਨੰਬਰ ਦਰਜ ਕਰੋ। ਨਵੇਂ ਨੰਬਰ ‘ਤੇ ਆਏ OTP ਰਾਹੀਂ ਇਸ ਦੀ ਪੁਸ਼ਟੀ ਕਰੋ। ਇਸ ਤੋਂ ਬਾਅਦ ਦੁਬਾਰਾ ਫੇਸ ਆਥੈਂਟੀਕੇਸ਼ਨ ਦੀ ਪ੍ਰਕਿਰਿਆ ਪੂਰੀ ਕਰੋ।
ਨਿਰਧਾਰਤ ਫੀਸ ਆਨਲਾਈਨ ਜਮ੍ਹਾਂ ਕਰਵਾਓ ਅਤੇ ਆਪਣੀ ਅਰਜ਼ੀ ਸਬਮਿਟ ਕਰ ਦਿਓ।
ਕੀ ਪੁਰਾਣੇ ਮੋਬਾਈਲ ਨੰਬਰ ‘ਤੇ ਵੀ ਆਵੇਗਾ OTP
ਇਸ ਗੱਲ ਨੂੰ ਸਮਝਣਾ ਬਹੁਤ ਜ਼ਰੂਰੀ ਹੈ। ਜੇਕਰ ਤੁਸੀਂ ਐਪ ਵਿੱਚ ਉਸੇ ਮੋਬਾਈਲ ਨੰਬਰ ਨਾਲ ਰਜਿਸਟਰਡ ਹੋ, ਜੋ ਪਹਿਲਾਂ ਤੁਹਾਡੇ ਆਧਾਰ ਕਾਰਡ ਨਾਲ ਜੁੜਿਆ ਹੋਇਆ ਸੀ ਤਾਂ ਨਵੇਂ ਨੰਬਰ ‘ਤੇ OTP ਅਤੇ ਫੇਸ ਆਥੈਂਟੀਕੇਸ਼ਨ ਰਾਹੀਂ ਕੰਮ ਹੋ ਸਕਦਾ ਹੈ।
ਪਰ ਜੇਕਰ ਤੁਸੀਂ ਐਪ ਵਿੱਚ ਕੋਈ ਦੂਜਾ ਮੋਬਾਈਲ ਨੰਬਰ ਦਰਜ ਕੀਤਾ ਹੈ ਤਾਂ UIDAI ਦੇ ਨਿਯਮਾਂ ਮੁਤਾਬਕ ਪੁਰਾਣੇ ਅਤੇ ਨਵੇਂ ਦੋਵਾਂ ਨੰਬਰਾਂ ‘ਤੇ OTP ਆ ਸਕਦਾ ਹੈ।
ਇਸ ਤੋਂ ਇਲਾਵਾ, ਜੇਕਰ ਤੁਹਾਡਾ ਪੁਰਾਣਾ ਮੋਬਾਈਲ ਨੰਬਰ ਬੰਦ ਹੋ ਚੁੱਕਾ ਹੈ ਜਾਂ ਤੁਹਾਡੇ ਕੋਲ ਮੌਜੂਦ ਨਹੀਂ ਹੈ ਤਾਂ ਐਪ ਰਾਹੀਂ ਇਹ ਕੰਮ ਨਹੀਂ ਹੋ ਸਕੇਗਾ। ਅਜਿਹੀ ਸਥਿਤੀ ਵਿੱਚ ਤੁਹਾਨੂੰ ਆਪਣੇ ਨਜ਼ਦੀਕੀ ਆਧਾਰ ਸੇਵਾ ਕੇਂਦਰ ਜਾਣਾ ਪਵੇਗਾ। ਹਾਲਾਂਕਿ, ਇਸ ਕੰਮ ਲਈ ਵੀ ਕਿਸੇ ਕਾਗਜ਼ ਜਾਂ ਦਸਤਾਵੇਜ਼ ਦੀ ਲੋੜ ਨਹੀਂ ਪਵੇਗੀ।
ਕਿੰਨੇ ਦਿਨਾਂ ‘ਚ ਅਪਡੇਟ ਹੋਵੇਗਾ ਮੋਬਾਈਲ ਨੰਬਰ
ਅਰਜ਼ੀ ਜਮ੍ਹਾਂ ਕਰਵਾਉਣ ਤੋਂ ਤੁਰੰਤ ਬਾਅਦ ਤੁਹਾਡਾ ਮੋਬਾਈਲ ਨੰਬਰ ਅਪਡੇਟ ਨਹੀਂ ਹੋਵੇਗਾ। UIDAI ਦੇ ਨਿਯਮਾਂ ਮੁਤਾਬਕ ਇਸ ਪ੍ਰਕਿਰਿਆ ਵਿੱਚ 30 ਦਿਨਾਂ ਤੱਕ ਦਾ ਸਮਾਂ ਲੱਗ ਸਕਦਾ ਹੈ।
