ਨਵੀਂ ਦਿੱਲੀ 15 ਸਤੰਬਰ 2026 (ਪੰਜਾਬੀ ਖਬਰਨਾਮਾ ਬਿਊਰੋ) : ਭਾਰਤੀ ਰਿਜ਼ਰਵ ਬੈਂਕ (RBI) ਨੇ ਪਰਿਵਰਤਨਸ਼ੀਲ ਦਰ ਰਿਵਰਸ ਰੈਪੋ (VRRR) ਨਿਲਾਮੀ ਰਾਹੀਂ ਮੰਗਲਵਾਰ ਨੂੰ 3,93,352 ਕਰੋੜ ਰੁਪਏ ਦੀ ਨਕਦੀ ਇਕੱਠੀ ਕੀਤੀ। ਪ੍ਰੈੱਸ ਰਿਲੀਜ਼ ਅਨੁਸਾਰ, ਕੇਂਦਰੀ ਬੈਂਕ ਨੂੰ ਨੋਟੀਫਾਈ ਕੀਤੀ ਗਈ ਪੰਜ ਲੱਖ ਕਰੋੜ ਰੁਪਏ ਦੀ ਰਕਮ ਲਈ 3,93,352 ਕਰੋੜ ਰੁਪਏ ਦੀਆਂ ਬੋਲੀਆਂ ਮਿਲੀਆਂ। ਇਨ੍ਹਾਂ ਬੋਲੀਆਂ ਨੂੰ 5.24 ਫ਼ੀਸਦੀ ਦੀ ‘ਕੱਟ-ਆਫ’ ਦਰ ਅਤੇ ਭਾਰਿਤ ਔਸਤ ਦਰ ’ਤੇ ਸਵੀਕਾਰ ਕੀਤਾ ਗਿਆ।
₹10.73 ਲੱਖ ਕਰੋੜ ਦੀ ਵਾਧੂ ਨਕਦੀ
RBI ਪਿਛਲੇ ਇਕ ਮਹੀਨੇ ਤੋਂ ਬੈਂਕਿੰਗ ਸਿਸਟਮ ‘ਚ ਮੌਜੂਦ ਵਾਧੂ ਨਕਦੀ ਨੂੰ ਆਪਣੇ ਕੋਲ ਲੈਣ ਅਤੇ ਰਾਤੋ-ਰਾਤ ਮਨੀ ਮਾਰਕੀਟ ਦੀਆਂ ਦਰਾਂ ਨੂੰ ਰੈਪੋ ਦਰ ਅਨੁਸਾਰ ਲਿਆਉਣ ਲਈ VRRR ਨਿਲਾਮੀ ਕਰ ਰਿਹਾ ਹੈ। 11 ਸਤੰਬਰ ਤੱਕ ਬੈਂਕਿੰਗ ਸਿਸਟਮ ‘ਚ ਕਰੀਬ 10.73 ਲੱਖ ਕਰੋੜ ਰੁਪਏ ਦੀ ਵਾਧੂ ਨਕਦੀ ਹੋਣ ਦਾ ਅਨੁਮਾਨ ਹੈ।
VRRR ਨਿਲਾਮੀ ਤੋਂ ਇਲਾਵਾ, ਕੇਂਦਰੀ ਬੈਂਕ ਨੇ ਪਿਛਲੇ ਹਫ਼ਤੇ ਸਰਕਾਰੀ ਬਾਂਡਾਂ ਦੀ ਵਿਕਰੀ ਲਈ ਇਕ ਲੱਖ ਕਰੋੜ ਰੁਪਏ ਦੀ ਨੋਟੀਫਾਈ ਕੀਤੀ ਰਕਮ ਦੇ ਤਿੰਨ ਪੜਾਵਾਂ ‘ਚ ਓਪਨ ਮਾਰਕੀਟ ਓਪਰੇਸ਼ਨ (OMO) ਦਾ ਐਲਾਨ ਕੀਤਾ ਹੈ। ਇਸ ਦੀ ਪਹਿਲੀ ਨਿਲਾਮੀ 17 ਸਤੰਬਰ ਨੂੰ ਹੋਵੇਗੀ।
RBI ਨੇ ਕਿਹਾ ਕਿ 50,000 ਕਰੋੜ ਰੁਪਏ ਦੀ ਪਹਿਲੀ ਕਿਸ਼ਤ 17 ਸਤੰਬਰ ਨੂੰ ਜਾਰੀ ਕੀਤੀ ਜਾਵੇਗੀ, ਜਦਕਿ 25,000 ਕਰੋੜ ਰੁਪਏ ਦੀਆਂ ਕਿਸ਼ਤਾਂ 21 ਸਤੰਬਰ ਅਤੇ 28 ਸਤੰਬਰ ਨੂੰ ਜਾਰੀ ਹੋਣਗੀਆਂ। ਬੈਂਕਾਂ ਵੱਲੋਂ FCNR (B) ਡਿਪਾਜ਼ਿਟ ਵੱਡੇ ਪੱਧਰ ’ਤੇ ਇਕੱਠੇ ਕੀਤੇ ਜਾਣ ਨਾਲ ਬੈਂਕਿੰਗ ਸਿਸਟਮ ‘ਚ ਲਿਕਵਿਡਿਟੀ (ਨਕਦੀ) ਵਧ ਗਈ। ਇਸ ਨਾਲ ਸਿਸਟਮ ‘ਚ ਵਿਦੇਸ਼ੀ ਮੁਦਰਾ ਆਈ, ਜਦਕਿ RBI ਨਾਲ ਬਾਅਦ ਵਿੱਚ ਕੀਤੇ ਗਏ ਸਵੈਪ ਰਾਹੀਂ ਬੈਂਕਾਂ ਨੂੰ ਰੁਪਏ ਦੀ ਲਿਕਵਿਡਿਟੀ ਮਿਲੀ।
FCNR (B) ਤਹਿਤ ਆਉਣ ਵਾਲੀ ਵਿਦੇਸ਼ੀ ਮੁਦਰਾ ਤੋਂ ਇਲਾਵਾ, ਮਹੀਨੇ ਦੇ ਅੰਤ ਵਿਚ ਹੋਣ ਵਾਲੇ ਸਰਕਾਰੀ ਖ਼ਰਚਿਆਂ—ਜਿਨ੍ਹਾਂ ਵਿਚ ਤਨਖ਼ਾਹ ਤੇ ਪੈਨਸ਼ਨ ਦੀ ਅਦਾਇਗੀ ਵੀ ਸ਼ਾਮਲ ਹੈ—ਨੇ ਵੀ ਬੈਂਕਿੰਗ ਸਿਸਟਮ ‘ਚ ਲਿਕਵਿਡਿਟੀ ਵਧਾਉਣ ‘ਚ ਯੋਗਦਾਨ ਪਾਇਆ।
