ਨਵੀਂ ਦਿੱਲੀ 25 ਅਗਸਤ 2026 (ਪੰਜਾਬੀ ਖਬਰਨਾਮਾ ਬਿਊਰੋ) – ਆਮ ਆਦਮੀ ਪਾਰਟੀ ਦੇ ਰਾਸ਼ਟਰੀ ਕਨਵੀਨਰ ਅਰਵਿੰਦ ਕੇਜਰੀਵਾਲ ਨੇ ਪੰਜਾਬ ਦੇ ਸਰਕਾਰੀ ਸਕੂਲਾਂ ਨੂੰ ਲੈ ਕੇ ਭਾਰਤੀ ਜਨਤਾ ਪਾਰਟੀ ‘ਤੇ ਤਿੱਖਾ ਹਮਲਾ ਬੋਲਿਆ ਹੈ। ਇੱਕ ਵੀਡੀਓ ਸੁਨੇਹਾ ਜਾਰੀ ਕਰਦਿਆਂ ਕੇਜਰੀਵਾਲ ਨੇ ਭਾਜਪਾ ਲੀਡਰਸ਼ਿਪ ਨੂੰ ਖੁੱਲ੍ਹੀ ਚੁਣੌਤੀ ਦਿੱਤੀ ਹੈ ਕਿ ਉਹ ਗੁਜਰਾਤ ਦੇ 1,000 ਅਤੇ ਪੰਜਾਬ ਦੇ 1,000 ਸਰਕਾਰੀ ਸਕੂਲਾਂ ਦੀ ਸਾਂਝੀ ਜਾਂਚ ਕਰਵਾ ਲੈਣ, ਤਾਂ ਜੋ ਪੂਰਾ ਦੇਸ਼ ਦੇਖ ਸਕੇ ਕਿ ਕਿੱਥੋਂ ਦੀ ਸਿੱਖਿਆ ਪ੍ਰਣਾਲੀ ਬਿਹਤਰ ਹੈ।
ਪੰਜਾਬ ਦੇ ਸਕੂਲਾਂ ਨੂੰ ਬਦਨਾਮ ਕਰਨ ‘ਚ ਲੱਗੀ ਹੈ ਭਾਜਪਾ
ਵੀਡੀਓ ਸੰਨੇਹ ‘ਚ ਅਰਵਿੰਦ ਕੇਜਰੀਵਾਲ ਨੇ ਕਿਹਾ ਕਿ ਅੱਜਕੱਲ੍ਹ ਭਾਜਪਾ ਵਾਲੇ ਪੰਜਾਬ ਦੇ ਸਕੂਲਾਂ ਨੂੰ ਬਦਨਾਮ ਕਰਨ ‘ਚ ਲੱਗੇ ਹੋਏ ਹਨ। ਮੈਂ ਭਾਜਪਾ ਨੂੰ ਚੈਲੰਜ ਕਰਦਾ ਹਾਂ। 30 ਸਾਲਾਂ ਤੋਂ ਤੁਹਾਡੀ ਗੁਜਰਾਤ ‘ਚ ਸਰਕਾਰ ਹੈ ਅਤੇ ਸਾਢੇ ਚਾਰ ਸਾਲਾਂ ਤੋਂ ਸਾਡੀ ਪੰਜਾਬ ‘ਚ ਸਰਕਾਰ ਹੈ।
ਪੰਜਾਬ ਦੇ 1000 ਸਕੂਲਾਂ ਦੀ ਲਿਸਟ ਮੈਂ ਦਿੰਦਾ ਹਾਂ ਅਤੇ ਗੁਜਰਾਤ ਦੇ 1,000 ਸਕੂਲਾਂ ਦੀ ਲਿਸਟ ਤੁਸੀਂ ਦਿਓ। ਪੂਰਾ ਮੀਡੀਆ ਨਾਲ ਚੱਲੇਗਾ, ਭਾਜਪਾ ਵਾਲੇ ਵੀ ਆਉਣ ਅਤੇ ਅਸੀਂ ਵੀ ਜਾਵਾਂਗੇ। ਦੋਵਾਂ ਰਾਜਾਂ ਦੇ ਸਕੂਲਾਂ ਦੀ ਇੰਸਪੈਕਸ਼ਨ ਕਰਦੇ ਹਾਂ ਕਿ ਕਿਹੜੇ ਚੰਗੇ ਹਨ।
ਪੁਰਾਣੇ ਵੀਡੀਓ ਅਤੇ ਫ਼ਰਜ਼ੀ ਤਸਵੀਰਾਂ ਲਗਾਉਣ ਦਾ ਦੋਸ਼
ਕੇਜਰੀਵਾਲ ਨੇ ਦੋਸ਼ ਲਾਇਆ ਕਿ ਜਦੋਂ ਤੋਂ ਵਿਰੋਧੀ ਪਾਰਟੀਆਂ ਨੇ ਭਾਜਪਾ ਸ਼ਾਸਿਤ ਰਾਜਾਂ ਦੇ ਸਕੂਲਾਂ ਦੀ ਬਦਹਾਲੀ ਨੂੰ ਉਜਾਗਰ ਕਰਨਾ ਸ਼ੁਰੂ ਕੀਤਾ ਹੈ, तब ਤੋਂ ਭਾਜਪਾ ਪੰਜਾਬ ਦੇ ਸਕੂਲਾਂ ਨੂੰ ਨਿਸ਼ਾਨਾ ਬਣਾ ਰਹੀ ਹੈ। ਉਨ੍ਹਾਂ ਕਿਹਾ ਕਿ ਇਨ੍ਹਾਂ ਨੇ ਆਪਣੇ ਸਕੂਲ ਤਾਂ ਠੀਕ ਨਹੀਂ ਕੀਤੇ, ਪਰ ਪੰਜਾਬ ਦੇ ਸਕੂਲਾਂ ਨੂੰ ਬਦਨਾਮ ਕਰਨਾ ਸ਼ੁਰੂ ਕਰ ਦਿੱਤਾ।
ਇਹ ਲੋਕ 2018 ਦਾ ਵੀਡੀਓ ਚਲਾ ਕੇ ਕਹਿ ਰਹੇ ਹਨ ਕਿ ਆਮ ਆਦਮੀ ਪਾਰਟੀ ਦਾ ਸਕੂਲ ਖ਼ਰਾਬ ਹੈ। 2018 ‘ਚ ਪੰਜਾਬ ‘ਚ ਕਾਂਗਰਸ ਦੀ ਸਰਕਾਰ ਸੀ ਅਤੇ 2017 ਤੱਕ ਭਾਜਪਾ ਦੀ ਸਾਂਝੇਦਾਰੀ ਵਾਲੀ ਸਰਕਾਰ ਸੀ, ਉਨ੍ਹਾਂ ਨੇ ਸਕੂਲਾਂ ਦੀ ਅਜਿਹੀ ਹਾਲਤ ਕੀਤੀ ਸੀ।
ਸਾਢੇ ਚਾਰ ਸਾਲਾਂ ‘ਚ ਬਦਲੇ 19,200 ਸਕੂਲ
ਪੰਜਾਬ ਸਰਕਾਰ ਦੇ ਸਿੱਖਿਆ ਮਾਡਲ ਦਾ ਵੇਰਵਾ ਦਿੰਦਿਆਂ ਕੇਜਰੀਵਾਲ ਨੇ ਦੱਸਿਆ ਕਿ ਰਾਜ ‘ਚ ਕੁੱਲ ਲਗਭਗ 19,700 ਸਰਕਾਰੀ ਸਕੂਲ ਹਨ। ਇਨ੍ਹਾਂ ‘ਚੋਂ 19,200 ਤੋਂ ਵੱਧ ਸਕੂਲਾਂ ਦਾ ਕਾਇਆਕਲਪ ਕਰਕੇ ਉਨ੍ਹਾਂ ਨੂੰ ਬੇਹੱਦ ਸ਼ਾਨਦਾਰ ਬਣਾ ਦਿੱਤਾ ਗਿਆ ਹੈ। ਬਾਕੀ ਬਚੇ 500 ਸਕੂਲਾਂ ਦਾ ਨਵੀਨੀਕਰਨ ਜਾਰੀ ਹੈ, ਜੋ ਅਗਲੇ ਡੇਢ ਤੋਂ ਦੋ ਸਾਲਾਂ ਦੇ ਅੰਦਰ ਪੂਰਾ ਕਰ ਲਿਆ ਜਾਵੇਗਾ।
ਕੇਜਰੀਵਾਲ ਨੇ ਕਿਹਾ ਕਿ ਪੰਜਾਬ ਦੇ ਸਰਕਾਰੀ ਸਕੂਲਾਂ ਨੂੰ ਸੁਧਾਰਨ ਦਾ ਕੰਮ ਕਿਸੇ ਇੱਕ ਪਾਰਟੀ ਨੇ ਨਹੀਂ, ਸਗੋਂ ਉੱਥੋਂ ਦੇ ਅਧਿਆਪਕਾਂ, ਪ੍ਰਿੰਸੀਪਲਾਂ, ਬੱਚਿਆਂ ਅਤੇ ਮਾਪਿਆਂ ਨੇ ਮਿਲ ਕੇ ਕੀਤਾ ਹੈ। ਉਨ੍ਹਾਂ ਅਪੀਲ ਕੀਤੀ ਕਿ ਪੁਰਾਣੀਆਂ ਤਸਵੀਰਾਂ, ਏਆਈ-ਡਾਕਟਰਡ ਵੀਡੀਓਜ਼ ਅਤੇ ਭਰਮਾਉਣ ਵਾਲੀਆਂ ਪੋਸਟਾਂ ਰਾਹੀਂ ਪੰਜਾਬ ਦੀ ਜਨਤਾ ਅਤੇ ਅਧਿਆਪਕਾਂ ਦੇ ਯਤਨਾਂ ਦਾ ਅਪਮਾਨ ਨਾ ਕੀਤਾ ਜਾਵੇ। ਕੇਜਰੀਵਾਲ ਨੇ ਆਪਣੀ ਗੱਲ ਦਾ ਅੰਤ ਕਰਦਿਆਂ ਦੁਹਰਾਇਆ ਕਿ ਜੇਕਰ ਭਾਜਪਾ ‘ਚ ਹਿੰਮਤ ਹੈ, ਤਾਂ ਉਹ ਉਨ੍ਹਾਂ ਦੇ 1,000 ਬਨਾਮ 1,000 ਸਕੂਲਾਂ ਦੇ ਮੁਆਇਨੇ ਦੀ ਚੁਣੌਤੀ ਨੂੰ ਸਵੀਕਾਰ ਕਰੇ।
