ਅੰਮ੍ਰਿਤਸਰ, 02 ਦਸੰਬਰ 2025 (ਪੰਜਾਬੀ ਖਬਰਨਾਮਾ ਬਿਊਰੋ):- ਪੰਜਾਬ ਦੇ ਕਿਸਾਨ ਸੰਗਠਨ ‘ਕਿਸਾਨ ਮਜ਼ਦੂਰ ਸੰਘਰਸ਼ ਮੋਰਚਾ’ ਨੇ 5 ਦਸੰਬਰ 2025 ਨੂੰ ਦੋ ਘੰਟੇ ਦੇ ਦੇਸ਼-ਵਿਆਪੀ ‘ਰੇਲ ਰੋਕੋ’ ਅੰਦੋਲਨ ਦਾ ਐਲਾਨ ਕਰ ਦਿੱਤਾ ਹੈ। ਕਿਸਾਨ ਆਗੂ ਸਰਵਣ ਸਿੰਘ ਪੰਧੇਰ ਨੇ ਕਿਹਾ ਹੈ ਕਿ ਇਹ ਅੰਦੋਲਨ ਤਜਵੀਜ਼ਸ਼ੁਦਾ ਬਿਜਲੀ ਸੋਧ ਬਿੱਲ 2025 ਤੇ ਹੋਰ ਮਸਲਿਆਂ ਵਿਰੁੱਧ ਆਵਾਜ਼ ਚੁੱਕਣ ਲਈ ਕੀਤਾ ਜਾਵੇਗਾ।
ਇਹ ‘ਰੇਲ ਰੋਕੋ’ ਅੰਦੋਲਨ 5 ਦਸੰਬਰ ਨੂੰ ਦੁਪਹਿਰ 1 ਵਜੇ ਤੋਂ 3 ਵਜੇ ਤਕ ਰਹੇਗਾ, ਜਿਸ ਵਿੱਚ ਕਿਸਾਨਾਂ ਨੂੰ ਰੇਲਵੇ ਟਰੈਕਾਂ ‘ਤੇ ਬੈਠਣ ਦੀ ਯੋਜਨਾ ਹੈ। ਪੰਧੇਰ ਦਾ ਕਹਿਣਾ ਹੈ ਕਿ ਇਹ ਇਕ ਪ੍ਰਤੀਕਾਤਮਕ ਤੇ ਸ਼ਾਂਤੀਪੂਰਨ ਵਿਰੋਧ ਹੈ ਤਾਂ ਜੋ ਕੇਂਦਰ ਤੇ ਸੂਬਾ ਸਰਕਾਰਾਂ ਦਾ ਧਿਆਨ ਕਿਸਾਨਾਂ ਦੀਆਂ ਲੰਬਿਤ ਮੰਗਾਂ ਵੱਲ ਖਿੱਚਿਆ ਜਾ ਸਕੇ। ਜੇ ਉਨ੍ਹਾਂ ਦੀਆਂ ਮੰਗਾਂ ਨਹੀਂ ਮੰਨੀਆਂ ਗਈਆਂ, ਤਾਂ ਅੰਦੋਲਨ ਨੂੰ ਹੋਰ ਅੱਗੇ ਲਿਜਾਣ ਦੀ ਚਿਤਾਵਨੀ ਵੀ ਦਿੱਤੀ ਗਈ ਹੈ।
ਜਾਣੋ ਕੀ ਹਨ ਕਿਸਾਨਾਂ ਦੀਆਂ ਮੰਗਾਂ
ਕਿਸਾਨਾਂ ਤੇ ਮੋਰਚਾ ਆਗੂਆਂ ਮੁਤਾਬਕ ਬਿਜਲੀ ਸੋਧ ਬਿੱਲ 2025 ਦਾ ਤਜਵੀਜ਼ਸ਼ੁਦਾ ਖਰੜਾ ਪੇਂਡੂ ਤੇ ਕਿਸਾਨਾਂ ਲਈ ਨੁਕਸਾਨਦੇਹ ਹੈ। ਉਨ੍ਹਾਂ ਅਨੁਸਾਰ ਇਹ ਬਿੱਲ ਬਿਜਲੀ ਦੇ ਨਿੱਜੀਕਰਨ, ਦਿਹਾਤੀ ਬਿਜਲੀ ਖਪਤਕਾਰਾਂ ਲਈ ਮੁੱਲ ਵਾਧਾ ਤੇ ਪ੍ਰੀਪੇਡ ਮੀਟਰ ਤੇ ਸਮਾਰਟ ਮੀਟਰ ਵਰਗੇ ਪ੍ਰਬੰਧ ਲਿਆਉਣ ਦੀ ਤਿਆਰੀ ਕਰ ਰਿਹਾ ਹੈ।
ਉਹ ਇਸ ਗੱਲ ਦੇ ਵੀ ਵਿਰੋਧੀ ਹਨ ਕਿ ਜਨਤਕ ਜਾਇਦਾਦਾਂ, ਸਰਕਾਰੀ ਜ਼ਮੀਨਾਂ ਆਦਿ ਨੂੰ ਕਥਿਤ ਤੌਰ ‘ਤੇ ਜ਼ਬਰਦਸਤੀ ਵੇਚਣ ਦੀ ਕੋਸ਼ਿਸ਼ ਹੋ ਰਹੀ ਹੈ। ਕਿਸਾਨ ਪੁਰਾਣੇ ਬਿਜਲੀ ਮੀਟਰਾਂ ਦੀ ਮੁੜ ਸਥਾਪਨਾ, ਪ੍ਰੀਪੇਡ ਤੇ ਸਮਾਰਟ ਮੀਟਰਾਂ ਦੀ ਵਾਪਸੀ ਅਤੇ ਬਿਜਲੀ ਵੰਡ ਦੇ ਨਿੱਜੀਕਰਨ ਤੇ ਬਿੱਲ ਵਾਧੇ ਦੀਆਂ ਯੋਜਨਾਵਾਂ ਨੂੰ ਰੱਦ ਕਰਨ ਦੀ ਮੰਗ ਕਰ ਰਹੇ ਹਨ। ਇਸ ਤੋਂ ਇਲਾਵਾ ਖੇਤੀਬਾੜੀ, ਕਿਸਾਨ-ਸਸ਼ਕਤੀਕਰਨ ਅਤੇ ਜਨਤਕ ਤੇ ਸਰਕਾਰੀ ਸਹੂਲਤਾਂ ਦੀ ਸੁਰੱਖਿਆ ਨੂੰ ਲੈ ਕੇ ਉਨ੍ਹਾਂ ਦੀਆਂ ਚਿੰਤਾਵਾਂ ਵੀ ਹਨ।
ਜਾਣੋ 19 ਥਾਵਾਂ, ਜਿੱਥੇ ਹੋਵੇਗਾ ਪ੍ਰਦਰਸ਼ਨ
ਮੋਰਚੇ ਨੇ ਪੰਜਾਬ ਦੇ ਲਗਪਗ 19 ਜ਼ਿਲ੍ਹਿਆਂ ‘ਚ 26 ਵੱਖ-ਵੱਖ ਰੇਲਵੇ ਸਥਾਨਾਂ ‘ਤੇ ਇਸ ‘ਰੇਲ ਰੋਕੋ’ ਦਾ ਪ੍ਰਬੰਧ ਕੀਤਾ ਹੈ। ਇਨ੍ਹਾਂ ਵਿੱਚ ਪ੍ਰਮੁੱਖ ਬਿੰਦੂ ਹੇਠ ਲਿਖੇ ਅਨੁਸਾਰ ਹਨ:
| ਜ਼ਿਲ੍ਹਾ | ਪ੍ਰਦਰਸ਼ਨ ਦੀਆਂ ਥਾਵਾਂ |
| ਅੰਮ੍ਰਿਤਸਰ | ਦੇਵੀਦਾਸਪੁਰਾ ਅਤੇ ਮਜੀਠਾ (ਦਿੱਲੀ–ਅੰਮ੍ਰਿਤਸਰ ਮੁੱਖ ਲਾਈਨ) |
| ਗੁਰਦਾਸਪੁਰ | ਬਟਾਲਾ, ਗੁਰਦਾਸਪੁਰ, ਡੇਰਾ ਬਾਬਾ ਨਾਨਕ (ਅੰਮ੍ਰਿਤਸਰ–ਜੰਮੂ–ਕਸ਼ਮੀਰ ਮਾਰਗ) |
| ਪਠਾਨਕੋਟ | ਪਰਮਾਨੰਦ ਫਾਟਕ |
| ਤਰਨਤਾਰਨ | ਤਰਨਤਾਰਨ ਰੇਲਵੇ ਸਟੇਸ਼ਨ |
| ਫਿਰੋਜ਼ਪੁਰ | ਬਸਤੀ ਟੈਂਕਾਂ ਵਾਲੀ, ਮੱਲਾਂਵਾਲਾ, ਤਲਵੰਡੀ ਭਾਈ |
| ਕਪੂਰਥਲਾ | ਡਡਵਿੰਡੀ ਦੇ ਕੋਲ (ਸੁਲਤਾਨਪੁਰ ਲੋਧੀ) |
| ਜਲੰਧਰ | ਜਲੰਧਰ ਕੈਂਟ |
| ਹੁਸ਼ਿਆਰਪੁਰ | ਟਾਂਡਾ, ਜੰਮੂ-ਕਸ਼ਮੀਰ ਤੇ ਜਲੰਧਰ ਰੇਲ ਮਾਰਗ ਅਤੇ ਪੁਰਾਣਾ ਭੰਗਾਲਾ ਰੇਲਵੇ ਸਟੇਸ਼ਨ |
| ਪਟਿਆਲਾ | ਸ਼ੰਭੂ ਅਤੇ ਬਾੜਾ (ਨਾਭਾ) |
| ਸੰਗਰੂਰ | ਸੁਨਾਮ–ਸ਼ਹੀਦ ਊਧਮ ਸਿੰਘ ਵਾਲਾ |
| ਫਾਜ਼ਿਲਕਾ | ਫਾਜ਼ਿਲਕਾ ਰੇਲਵੇ ਸਟੇਸ਼ਨ |
| ਮੋਗਾ | ਮੋਗਾ ਰੇਲਵੇ ਸਟੇਸ਼ਨ |
| ਬਠਿੰਡਾ | ਰਾਮਪੁਰਾ ਰੇਲਵੇ ਸਟੇਸ਼ਨ |
| ਮੁਕਤਸਰ | ਮਲੋਟ ਤੇ ਮੁਕਤਸਰ ਦੋਵੇਂ |
| ਮਾਲੇਰਕੋਟਲਾ | ਅਹਿਮਦਗੜ੍ਹ |
| ਮਾਨਸਾ | ਮਾਨਸਾ ਰੇਲਵੇ ਸਟੇਸ਼ਨ |
| ਲੁਧਿਆਣਾ | ਸਾਹਨੇਵਾਲ ਰੇਲਵੇ ਸਟੇਸ਼ਨ |
| ਫਰੀਦਕੋਟ | ਫਰੀਦਕੋਟ ਰੇਲਵੇ ਸਟੇਸ਼ਨ |
| ਰੋਪੜ | ਰੋਪੜ ਰੇਲਵੇ ਸਟੇਸ਼ਨ |
