6 ਅਗਸਤ 2024 : ਭਾਰਤੀ ਅਥਲੈਟਿਕਸ ਲਈ ਕਈ ਰਿਕਾਰਡ ਬਣਾਉਣ ਵਾਲੇ ਨੀਰਜ ਚੋਪੜਾ ਆਪਣੇ ਦੂਜੇ ਓਲੰਪਿਕ ਵਿਚ ਆਪਣੇ ਜੈਵਲਿਨ ਨਾਲ ਇਕ ਵਾਰ ਫਿਰ ਇਤਿਹਾਸ ਰਚਣਾ ਚਾਹੁਣਗੇ ਕਿਉਂਕਿ 140 ਕਰੋੜ ਭਾਰਤੀ ਉਸ ਤੋਂ ਇੱਕ ਵਾਰ ਫਿਰ ਪੀਲੇ ਤਗ਼ਮੇ ਦੀ ਉਮੀਦ ਕਰ ਰਹੇ ਹਨ। ਭਾਰਤੀ ਸਮੇਂ ਅਨੁਸਾਰ ਇਹ ਮੁਕਾਬਲਾ ਦੁਪਹਿਰ 3.20 ਵਜੇ ਖੇਡਿਆ ਜਾਵੇਗਾ।
ਨੀਰਜ ਮੰਗਲਵਾਰ ਨੂੰ ਕਿਸ਼ੋਰ ਜੇਨਾ ਦੇ ਨਾਲ ਜੈਵਲਿਨ ਥ੍ਰੋਅ ਕੁਆਲੀਫੀਕੇਸ਼ਨ ਵਿਚ ਹਿੱਸਾ ਲਵੇਗਾ। ਉਸਦੀ ਸ਼ਾਨਦਾਰ ਨਿਰੰਤਰਤਾ ਦੀ ਇਕ ਵਾਰ ਫਿਰ ਪ੍ਰੀਖਿਆ ਹੋਵੇਗੀ ਕਿਉਂਕਿ ਉਹ ਪੂਰੇ ਸੀਜ਼ਨ ਵਿਚ ਮਾਸਪੇਸ਼ੀਆਂ ਦੀ ਸਮੱਸਿਆ ਨਾਲ ਜੂਝਦਾ ਰਿਹਾ ਹੈ।
ਜੇਕਰ ਚੋਪੜਾ ਸੋਨ ਤਗਮਾ ਜਿੱਤਦਾ ਹੈ ਤਾਂ ਉਹ ਖਿਤਾਬ ਬਰਕਰਾਰ ਰੱਖਣ ਵਾਲਾ ਓਲੰਪਿਕ ਇਤਿਹਾਸ ਦਾ ਪੰਜਵਾਂ ਖਿਡਾਰੀ ਬਣ ਜਾਵੇਗਾ। ਇਸ ਨਾਲ ਉਹ ਓਲੰਪਿਕ ਵਿਅਕਤੀਗਤ ਵਰਗ ਵਿਚ ਦੋ ਸੋਨ ਤਗਮੇ ਜਿੱਤਣ ਵਾਲਾ ਪਹਿਲਾ ਭਾਰਤੀ ਵੀ ਬਣ ਜਾਵੇਗਾ।
ਓਲੰਪਿਕ ਪੁਰਸ਼ਾਂ ਦੇ ਜੈਵਲਿਨ ਥ੍ਰੋਅਰਾਂ ਵਿੱਚ ਹੁਣ ਤੱਕ ਐਰਿਕ ਲੈਮਿੰਗ (ਸਵੀਡਨ 1908 ਅਤੇ 1912), ਜੌਨੀ ਮਾਈਰਾ (ਫਿਨਲੈਂਡ 1920 ਅਤੇ 1924), ਜੈਨ ਜ਼ੇਲੇਨਜੀ (ਚੈੱਕ ਗਣਰਾਜ 1992 ਅਤੇ 1996) ਅਤੇ ਐਂਡਰੀਅਸ ਟੀ (ਨਾਰਵੇ 2004 ਅਤੇ 2008) ਸ਼ਾਮਲ ਹਨ। ਇਸ ਸਾਲ ਚੋਪੜਾ ਨੇ ਸਿਰਫ ਤਿੰਨ ਈਵੈਂਟਸ ‘ਚ ਹਿੱਸਾ ਲਿਆ ਪਰ ਉਨ੍ਹਾਂ ਦੇ ਹੋਰ ਮੁਕਾਬਲੇਬਾਜ਼ ਵੀ ਚੰਗਾ ਪ੍ਰਦਰਸ਼ਨ ਨਹੀਂ ਕਰ ਸਕੇ। ਹਾਲਾਂਕਿ ਉਸ ਦੇ ਕੋਚ ਨੇ ਫਿਟਨੈੱਸ ਨੂੰ ਲੈ ਕੇ ਚਿੰਤਾਵਾਂ ਨੂੰ ਖਾਰਜ ਕਰਦੇ ਹੋਏ ਕਿਹਾ ਕਿ ਹੁਣ ਉਸ ਦੇ ਮਾਸਪੇਸ਼ੀਆਂ ਸਬੰਧੀ ਕੋਈ ਸਮੱਸਿਆ ਨਹੀਂ ਹੈ ਅਤੇ ਉਹ ਸਖਤ ਅਭਿਆਸ ਕਰ ਰਿਹਾ ਹੈ। ਭਾਰਤ ਦਾ ਕਿਸ਼ੋਰ ਜੇਨਾ, ਜਿਸ ਨੇ ਪਿਛਲੇ ਸਾਲ 87.54 ਮੀਟਰ ਦੀ ਥਰੋਅ ਨਾਲ ਏਸ਼ਿਆਈ ਖੇਡਾਂ ਲਈ ਕੁਆਲੀਫਾਈ ਕੀਤਾ ਸੀ, ਵੀ ਦੌੜ ਵਿੱਚ ਸ਼ਾਮਲ ਹੈ ਪਰ ਉਦੋਂ ਤੋਂ ਉਹ 80 ਮੀਟਰ ਤੱਕ ਵੀ ਨਹੀਂ ਪਹੁੰਚ ਸਕਿਆ ਹੈ।
