ਨਵੀਂ ਦਿੱਲੀ, 17 ਸਤੰਬਰ, 2025 (ਪੰਜਾਬੀ ਖਬਰਨਾਮਾ ਬਿਊਰੋ ):- ਰਾਹੁਲ ਦ੍ਰਾਵਿੜ ਨੇ ਰਾਜਸਥਾਨ ਰਾਇਲਜ਼ ਦਾ ਹੈੱਡ ਕੋਚ ਬਣਨ ਤੋਂ ਸਿਰਫ਼ ਇੱਕ ਸਾਲ ਬਾਅਦ ਆਪਣੇ ਅਹੁਦੇ ਤੋਂ ਅਸਤੀਫ਼ਾ ਦੇ ਦਿੱਤਾ। ਇਸਦਾ ਮਤਲਬ ਹੈ ਕਿ IPL 2026 ਤੋਂ ਪਹਿਲਾਂ ਰਾਜਸਥਾਨ ਰਾਇਲਜ਼ ਨੂੰ ਨਵਾਂ ਕੋਚ ਲੱਭਣਾ ਪਵੇਗਾ। ਕ੍ਰਿਕਟ ਪ੍ਰੇਮੀਆਂ ਲਈ ਇਹ ਖ਼ਬਰ ਕਿਸੇ ਝਟਕੇ ਤੋਂ ਘੱਟ ਨਹੀਂ। ਦ੍ਰਾਵਿੜ T-20 ਵਰਲਡ ਕਪ ਜਿਤਾਉਣ ਵਾਲੇ ਕੋਚ ਰਹਿ ਚੁੱਕੇ ਹਨ। ਭਾਰਤ ਨੂੰ ਵਿਸ਼ਵ ਚੈਂਪੀਅਨ ਬਣਾਉਣ ਤੋਂ ਬਾਅਦ ਹੁਣ ਜਦੋਂ ਉਨ੍ਹਾਂ ਨੇ ਰਾਜਸਥਾਨ ਰਾਇਲਜ਼ ਨਾਲ ਆਪਣਾ ਨਾਤਾ ਤੋੜ ਲਿਆ ਹੈ ਤਾਂ ਕਈ ਹੋਰ ਫ੍ਰੈਂਚਾਈਜ਼ੀਆਂ ਉਨ੍ਹਾਂ ਨੂੰ ਆਪਣੇ ਨਾਲ ਜੋੜਨ ਲਈ ਉਤਸੁਕ ਹਨ।
ਆਓ ਜਾਣਦੇ ਹਾਂ ਉਹ ਤਿੰਨ ਟੀਮਾਂ ਜਿਨ੍ਹਾਂ ਦੀ ਲਾਈਨ ’ਚ ਦ੍ਰਾਵਿੜ ਹਨ—
1. ਕੋਲਕਾਤਾ ਨਾਈਟ ਰਾਇਡਰਜ਼ (KKR)
ਰਾਜਸਥਾਨ ਰਾਇਲਜ਼ ਤੋਂ ਇਲਾਵਾ KKR ਇਕੱਲੀ ਐਸੀ ਟੀਮ ਹੈ, ਜਿਸਦੇ ਕੋਲ ਇਸ ਵੇਲੇ ਕੋਈ ਹੈੱਡ ਕੋਚ ਨਹੀਂ ਹੈ। ਚੰਦਰਕਾਂਤ ਪੰਡਿਤ 2025 ਵਿੱਚ ਟਾਈਟਲ ਡਿਫੈਂਡ ਕਰਨ ਵਿੱਚ ਨਾਕਾਮ ਰਹੇ। ਕਈ ਖਿਡਾਰੀ ਵੀ ਉਨ੍ਹਾਂ ਨਾਲ ਸੰਤੁਸ਼ਟ ਨਹੀਂ ਸਨ, ਇਸ ਲਈ ਉਨ੍ਹਾਂ ਨੂੰ ਅਹੁਦੇ ਤੋਂ ਹਟਾ ਦਿੱਤਾ ਗਿਆ। ਹੁਣ ਤਿੰਨ ਵਾਰ ਦੀ ਚੈਂਪੀਅਨ ਟੀਮ ਨੂੰ ਨਵੇਂ ਕੋਚ ਦੀ ਲੋੜ ਹੈ ਅਤੇ ਇਸ ਹਾਲਤ ਵਿੱਚ ਦ੍ਰਾਵਿੜ ਤੋਂ ਵਧੀਆ ਚੋਣ ਮੁਸ਼ਕਲ ਹੈ।
2. ਲਖਨਊ ਸੁਪਰ ਜਾਇੰਟਸ (LSG)
ਜਦੋਂ ਤੋਂ ਜਸਟਿਨ ਲੈਂਗਰ ਨੇ ਦੋ ਸਾਲ ਪਹਿਲਾਂ LSG ਦੀ ਕਮਾਨ ਸੰਭਾਲੀ ਹੈ, ਟੀਮ ਪਲੇਆਫ਼ ਵਿੱਚ ਪਹੁੰਚਣ ਵਿੱਚ ਅਸਫਲ ਰਹੀ ਹੈ। ਮਾਲਕ ਸੰਜੀਵ ਗੋਇੰਕਾ ਨੇ IPL 2025 ਤੋਂ ਪਹਿਲਾਂ ਜਹੀਰ ਖਾਨ ਨੂੰ ਟੀਮ ਦਾ ਮੈਨਟਰ ਬਣਾਇਆ ਸੀ ਪਰ ਉਹ ਵੀ ਕੋਈ ਖ਼ਾਸ ਅਸਰ ਨਹੀਂ ਦਿਖਾ ਸਕੇ। ਹੁਣ ਜਦੋਂ ਦ੍ਰਾਵਿੜ ਕਿਸੇ ਟੀਮ ਨਾਲ ਨਹੀਂ ਜੁੜੇ ਹਨ ਤਾਂ ਸੰਭਾਵਨਾ ਹੈ ਕਿ ਲਖਨਊ ਉਨ੍ਹਾਂ ਨੂੰ ਸਾਇਨ ਕਰਨ ਦੀ ਕੋਸ਼ਿਸ਼ ਕਰੇ, ਹਾਲਾਂਕਿ ਇਸਦੀ ਸੰਭਾਵਨਾ ਘੱਟ ਹੀ ਹੈ।
3. ਦਿੱਲੀ ਕੈਪਿਟਲਜ਼ (DC)
ਦਿੱਲੀ ਕੈਪਿਟਲਜ਼ ਨਾਲ ਦ੍ਰਾਵਿੜ ਪਹਿਲਾਂ ਵੀ ਜੁੜੇ ਰਹਿ ਚੁੱਕੇ ਹਨ ਅਤੇ 2016 ਸੀਜ਼ਨ ਵਿੱਚ ਟੀਮ ਦੇ ਮੈਨਟਰ ਰਹੇ ਹਨ। ਇਸ ਵੇਲੇ ਦਿੱਲੀ ਕੈਪਿਟਲਜ਼ ਦੇ ਹੈੱਡ ਕੋਚ ਹੇਮੰਗ ਬਦਾਨੀ ਹਨ ਜੋ ਬਹੁਤ ਜ਼ਿਆਦਾ ਤਜਰਬੇਕਾਰ ਨਹੀਂ ਹਨ। ਸ਼ੁਰੂ ਵਿੱਚ ਚੰਗੀ ਪ੍ਰਦਰਸ਼ਨਕਾਰੀ ਦੇ ਬਾਵਜੂਦ ਟੀਮ IPL 2025 ਵਿੱਚ ਪਲੇਆਫ਼ ਤੱਕ ਨਹੀਂ ਪਹੁੰਚ ਸਕੀ। ਇਸ ਕਾਰਨ ਟੀਮ ਨਵੇਂ ਕੋਚ ਲਈ ਬਦਲਾਅ ਕਰ ਸਕਦੀ ਹੈ।
