24 ਜੂਨ (ਪੰਜਾਬੀ ਖਬਰਨਾਮਾ):ਸਾਊਦੀ ਅਰਬ ਵਿਚ ਹੱਜ ਯਾਤਰਾ ਦੌਰਾਨ ਇਸ ਸਾਲ ਤੇਜ਼ ਗਰਮੀ ਦੇ ਕਾਰਨ ਇਕ ਹਜ਼ਾਰ ਤੋਂ ਵੱਧ ਲੋਕਾਂ ਦੀ ਮੌਤ ਹੋ ਚੁੱਕੀ ਹੈ। ਹੱਜ ਵਿਚ 20 ਲੱਖ ਜਾਇਰੀਨ ਸ਼ਾਮਲ ਹੋਏ ਸਨ। ਮਰਨ ਵਾਲਿਆਂ ਵਿਚ ਜ਼ਿਆਦਾਤਰ ਮਿਸਰ ਦੇ ਰਹਿਣ ਵਾਲੇ ਸਨ। ਸੁਰੱਖਿਆ ਤੇ ਮੈਡੀਕਲ ਸੂਤਰਾਂ ਨੇ ਐਤਵਾਰ ਨੂੰ ਦੱਸਿਆ ਕਿ ਮਰਨ ਵਾਲਿਆਂ ਵਿਚ ਮਿਸਰ ਦੇ ਜ਼ਾਇਰੀਨਾਂ ਦੀ ਗਿਣਤੀ 672 ਹੋ ਗਈ ਹੈ ਅਤੇ 25 ਲਾਪਤਾ ਹਨ। ਹੱਜ ਯਾਤਰਾ ਵਿਚ 236 ਇੰਡੋਨੇਸ਼ੀਆਈ ਜਦਕਿ 98 ਭਾਰਤੀਆਂ ਦੀ ਵੀ ਮੌਤ ਹੋ ਚੁੱਕੀ ਹੈ।
ਮਰਨ ਵਾਲਿਆਂ ਵਿਚ ਟਿਊਨੀਸ਼ੀਆ, ਜਾਰਡਨ, ਈਰਾਨ ਤੇ ਸੇਨੇਗਲ ਦੇ ਲੋਕ ਵੀ ਸ਼ਾਮਲ ਹਨ। ਇਸ ਸਾਲ ਹੱਜ ਯਾਤਰਾ ਦੌਰਾਨ ਮਰਨ ਵਾਲਿਆਂ ਦੀ ਕੁੱਲ ਗਿਣਤੀ 1,114 ਹੋ ਗਈ ਹੈ। ਸਥਿਤੀ ਦੀ ਜਾਂਚ ਕਰਨ ਵਾਲੀ ਮਿਸਰ ਦੀ ਇਕ ਸੰਕਟ ਇਕਾਈ ਨੇ ਸ਼ਨਿੱਚਰਵਾਰ ਨੂੰ ਕਿਹਾ ਕਿ ਉਸਨੇ 16 ਸੈਲਾਨੀ ਕੰਪਨੀਆਂ ਦੇ ਲਾਇਸੈਂਸ ਮੁਅੱਤਲ ਕਰ ਦਿੱਤੇ ਹਨ ਅਤੇ ਉਨ੍ਹਾਂ ਨੂੰ ਸਰਕਾਰੀ ਵਕੀਲ ਕੋਲ ਭੇਜ ਦਿੱਤਾ ਹੈ। ਉਨ੍ਹਾਂ ’ਤੇ ਮੌਤਾਂ ਲਈ ਜ਼ਿੰਮੇਵਾਰ ਹੋਣ ਦਾ ਦੋਸ਼ ਲਗਾਇਆ ਗਿਆ ਹੈ। ਸੰਕਟ ਇਕਾਈ ਨੇ ਕਿਹਾ ਕਿ ਮਰਨ ਵਾਲੇ ਜ਼ਾਇਰੀਨ ਮੁੱਖ ਰੂਪ ਨਾਲ ਅਧਿਕਾਰਕ ਪ੍ਰਣਾਲੀ ਤਹਿਤ ਪੰਜੀਕਿ੍ਰਤ ਨਾ ਹੋਣ ਵਾਲੇ ਯਾਤਰੀ ਸਨ। ਅਧਿਕਾਰਕ ਤੌਰ ’ਤੇ ਪੰਜੀਕਿ੍ਰਤ ਹੱਜ ਯਾਤਰੀਆਂ ਵਿਚ ਪੁਰਾਣੀ ਬਿਮਾਰੀ ਕਾਰਨ 31 ਮੌਤਾਂ ਹੋਣ ਦੀ ਪੁਸ਼ਟੀ ਕੀਤੀ ਗਈ ਹੈ।
