29 ਅਗਸਤ 2024 :ਨਵੀਂ ਦਿੱਲੀ- ਭਾਰਤੀ ਮੁਕਾਬਲੇਬਾਜ਼ੀ ਕਮਿਸ਼ਨ (CCI) ਨੇ ਰਿਲਾਇੰਸ ਅਤੇ ਡਿਜ਼ਨੀ ਇੰਡੀਆ ਦੀਆਂ ਮੀਡੀਆ ਸੰਪਤੀਆਂ ਦੇ ਰਲੇਵੇਂ ਨੂੰ ਮਨਜ਼ੂਰੀ ਦੇ ਦਿੱਤੀ ਹੈ। ਇਹ ਫੈਸਲਾ 28 ਅਗਸਤ 2024 ਨੂੰ ਜਨਤਕ ਕੀਤਾ ਗਿਆ ਸੀ।
ਮਨੀਕੰਟਰੋਲ ਦੀ ਇਕ ਖਬਰ ਮੁਤਾਬਕ ਇਹ ਡੀਲ 70,350 ਕਰੋੜ ਰੁਪਏ ਦੀ ਹੈ। CCI ਵੱਲੋਂ ਜਾਰੀ ਬਿਆਨ ਵਿੱਚ ਕਿਹਾ ਗਿਆ ਹੈ, “ਕਮਿਸ਼ਨ ਨੇ ਰਿਲਾਇੰਸ ਇੰਡਸਟਰੀਜ਼ ਲਿਮਟਿਡ, ਵਾਇਆਕਾਮ18 ਮੀਡੀਆ ਪ੍ਰਾਈਵੇਟ ਲਿਮਟਿਡ, ਡਿਜੀਟਲ18 ਮੀਡੀਆ ਲਿਮਟਿਡ, ਸਟਾਰ ਇੰਡੀਆ ਪ੍ਰਾਈਵੇਟ ਲਿਮਟਿਡ ਅਤੇ ਸਟਾਰ ਟੈਲੀਵਿਜ਼ਨ ਪ੍ਰੋਡਕਸ਼ਨ ਲਿਮਟਿਡ ਦੇ ਪ੍ਰਸਤਾਵਿਤ ਸੁਮੇਲ ਨੂੰ ਮਨਜ਼ੂਰੀ ਦੇ ਦਿੱਤੀ ਹੈ। “ਇਹ ਮਨਜ਼ੂਰੀ ਕੁਝ ਸਵੈ-ਇੱਛਤ ਸੋਧਾਂ ਦੀ ਪਾਲਣਾ ਵਿੱਚ ਦਿੱਤੀ ਗਈ ਹੈ।”
ਰਿਲਾਇੰਸ ਇੰਡਸਟਰੀਜ਼ ਦੀ 47ਵੀਂ ਸਾਲਾਨਾ ਜਨਰਲ ਮੀਟਿੰਗ (ਏ.ਜੀ.ਐਮ.) 29 ਅਗਸਤ ਨੂੰ ਹੈ ਅਤੇ ਇਸ ਤੋਂ ਇੱਕ ਦਿਨ ਪਹਿਲਾਂ ਰਲੇਵੇਂ ਨੂੰ ਮਨਜ਼ੂਰੀ ਦਿੱਤੀ ਗਈ ਹੈ। ਫਰਵਰੀ 2024 ਵਿੱਚ, ਰਿਲਾਇੰਸ ਗਰੁੱਪ ਦੀ ਕੰਪਨੀ Viacom18 ਅਤੇ ਡਿਜ਼ਨੀ ਇੰਡੀਆ ਦੀ ਭਾਰਤੀ ਯੂਨਿਟ ਸਟਾਰ ਇੰਡੀਆ ਨੇ ਰਲੇਵੇਂ ਦਾ ਐਲਾਨ ਕੀਤਾ ਸੀ। ਇਸ ਰਲੇਵੇਂ ਦਾ ਟੀਚਾ ਭਾਰਤ ਦਾ ਸਭ ਤੋਂ ਵੱਡਾ ਟੀਵੀ ਅਤੇ ਡਿਜੀਟਲ ਸਟ੍ਰੀਮਿੰਗ ਪਲੇਟਫਾਰਮ ਬਣਾਉਣਾ ਸੀ।
ਇਸ ਸੌਦੇ ਦੇ ਤਹਿਤ, Viacom18 ਦੇ ਮੀਡੀਆ ਹਿੱਸੇ ਨੂੰ ਸਟਾਰ ਇੰਡੀਆ ਪ੍ਰਾਈਵੇਟ ਲਿਮਟਿਡ ਨਾਲ ਮਿਲਾਇਆ ਜਾਵੇਗਾ। ਇਹ ਅਦਾਲਤ ਦੁਆਰਾ ਪ੍ਰਵਾਨਿਤ ਵਿਵਸਥਾ ਦੇ ਤਹਿਤ ਹੋਵੇਗਾ। ਇਸ ਸਾਂਝੇ ਉੱਦਮ ਦੀ ਕੀਮਤ 70,350 ਕਰੋੜ ਰੁਪਏ ਹੈ ਜਿਸ ਵਿੱਚ ਰਿਲਾਇੰਸ 11,500 ਕਰੋੜ ਰੁਪਏ ਦਾ ਨਿਵੇਸ਼ ਕਰੇਗੀ। ਰਿਲਾਇੰਸ-ਡਿਜ਼ਨੀ ਮਿਲ ਕੇ ਸੋਨੀ, ਨੈੱਟਫਲਿਕਸ ਅਤੇ ਐਮਾਜ਼ਾਨ ਨੂੰ ਚੁਣੌਤੀ ਦੇਣਗੇ। ਇਸ ਉੱਦਮ ਵਿੱਚ 120 ਟੀਵੀ ਚੈਨਲ ਅਤੇ 2 ਸਟ੍ਰੀਮਿੰਗ ਸੇਵਾਵਾਂ ਹੋਣਗੀਆਂ। ਸੰਯੁਕਤ ਉੱਦਮ ਵਿੱਚ ਰਿਲਾਇੰਸ ਇੰਡਸਟਰੀਜ਼ ਦੀ 16.34 ਪ੍ਰਤੀਸ਼ਤ ਹਿੱਸੇਦਾਰੀ ਹੋਵੇਗੀ, ਵਾਇਆਕਾਮ 18 ਦੀ 46.82 ਪ੍ਰਤੀਸ਼ਤ ਹਿੱਸੇਦਾਰੀ ਹੋਵੇਗੀ ਅਤੇ ਡਿਜ਼ਨੀ ਦੀ 36.84 ਪ੍ਰਤੀਸ਼ਤ ਹਿੱਸੇਦਾਰੀ ਹੋਵੇਗੀ। ਇਸ ਲਿਹਾਜ਼ ਨਾਲ ਕੰਪਨੀ ਉੱਤੇ ਮਲਕੀਅਤ ਦਾ ਅਧਿਕਾਰ ਰਿਲਾਇੰਸ ਇੰਡਸਟਰੀਜ਼ ਕੋਲ ਹੋਵੇਗਾ।
ਨਵੀਂ ਕੰਪਨੀ ਦੇ ਬੋਰਡ ‘ਚ 10 ਲੋਕ ਹੋਣਗੇ। ਜਿਸ ਵਿੱਚ ਰਿਲਾਇੰਸ ਦੇ 5, ਡਿਜ਼ਨੀ ਦੇ 3 ਅਤੇ 2 ਸੁਤੰਤਰ ਨਿਰਦੇਸ਼ਕ ਹੋਣਗੇ। ਇਹ ਰਲੇਵਾਂ ਅਗਲੇ ਸਾਲ ਦੇ ਪਹਿਲੇ 6 ਮਹੀਨਿਆਂ ਵਿੱਚ ਪੂਰਾ ਹੋਣ ਦੀ ਉਮੀਦ ਹੈ। ਰਲੇਵੇਂ ਤੋਂ ਬਾਅਦ ਬਣੀ ਕੰਪਨੀ ਦੀ ਚੇਅਰਪਰਸਨ ਨੀਤਾ ਅੰਬਾਨੀ ਹੋਵੇਗੀ। ਇਸ ਦੇ ਨਾਲ ਹੀ ਵਾਲਟ ਡਿਜ਼ਨੀ ਦੇ ਸਾਬਕਾ ਕਾਰਜਕਾਰੀ ਉਦੈ ਸ਼ੰਕਰ ਇਸ ਕੰਪਨੀ ਦੇ ਵਾਈਸ ਚੇਅਰਪਰਸਨ ਹੋਣਗੇ।
