ਅਸਾਮ, 8 ਜਨਵਰੀ, 2025 (ਪੰਜਾਬੀ ਖਬਰਨਾਮਾ ਬਿਊਰੋ ):- ਅਸਾਮ ਦੇ ਦੀਮਾ ਹਸਾਓ ਜ਼ਿਲ੍ਹੇ ਦੇ ਉਮਰਾਂਗਸੋ ਵਿੱਚ 300 ਫੁੱਟ ਡੂੰਘੀ ਕੋਲੇ ਦੀ ਖਾਨ ਵਿੱਚ ਨੌਂ ਮਜ਼ਦੂਰ ਪਿਛਲੇ 48 ਘੰਟਿਆਂ ਤੋਂ ਫਸੇ ਹੋਏ ਹਨ। ਇਸ ਦੇ ਨਾਲ ਹੀ ਤਾਜ਼ਾ ਜਾਣਕਾਰੀ ਅਨੁਸਾਰ ਉਮਰਾਂਗਸੋ ਇਲਾਕੇ ਦੀ 3 ਕਿਲੋ ਕੋਲੇ ਦੀ ਖਾਨ ਵਿੱਚੋਂ ਇੱਕ ਲਾਸ਼ ਬਰਾਮਦ ਹੋਈ ਹੈ। ਖੋਜ ਤੇ ਬਚਾਅ ਕਾਰਜ ਅਜੇ ਵੀ ਜਾਰੀ ਹੈ।
ਦਰਅਸਲ 6 ਜਨਵਰੀ ਨੂੰ ਖਾਨ ਵਿੱਚ ਅਚਾਨਕ ਪਾਣੀ ਭਰ ਗਿਆ ਸੀ। ਮਜ਼ਦੂਰਾਂ ਦੇ ਰੈਸਕਿਊ ਲਈ ਫ਼ੌਜ ਨੂੰ ਲਗਾਇਆ ਗਿਆ ਹੈ। ਮੰਗਲਵਾਰ ਰਾਤ ਆਪਰੇਸ਼ਨ ਰੋਕ ਦਿੱਤਾ ਗਿਆ ਸੀ। ਸਵੇਰੇ ਮੁੜ ਤੋਂ ਰੈਸਕਿਊ ਸ਼ੁਰੂ ਹੋ ਗਿਆ ਹੈ।
ਮਿਲੀ ਜਾਣਕਾਰੀ ਅਨੁਸਾਰ ਭਾਰਤੀ ਸੈਨਾ, ਅਸਾਮ ਰਾਈਫਲਜ਼, ਐੱਨ.ਡੀ.ਆਰ.ਐੱਫ., ਐੱਸ.ਡੀ.ਆਰ.ਐੱਫ. ਟੀਮਾਂ ਤੇ ਹੋਰ ਏਜੰਸੀਆਂ ਦਾ ਸਾਂਝਾ ਬਚਾਅ ਕਾਰਜ ਸੋਮਵਾਰ – 6 ਜਨਵਰੀ ਨੂੰ 3 ਕਿੱਲੋ, ਉਮਰਾਂਗਸੋ ਖੇਤਰ ਵਿੱਚ ਇੱਕ ਕੋਲੇ ਦੀ ਖਾਨ ਵਿੱਚ ਫਸੇ 9 ਲੋਕਾਂ ਨੂੰ ਬਚਾਉਣ ਲਈ ਮੁੜ ਸ਼ੁਰੂ ਕੀਤਾ ਗਿਆ ਹੈ।
ਖਾਨ ਵਿੱਚ ਕੰਮ ਕਰਨ ਵਾਲੇ ਇਕ ਮਾਈਨਰ, ਜਿਸ ਦਾ ਭਰਾ ਵੀ ਫਸਿਆ ਹੋਇਆ ਹੈ। ਉਸ ਨੇ ਕਿਹਾ, ਅਚਾਨਕ ਲੋਕ ਰੌਲਾ ਪਾਉਣ ਲੱਗੇ ਕਿ (ਖਾਨ ਵਿੱਚ) ਪਾਣੀ ਭਰ ਰਿਹਾ ਹੈ। 30-35 ਲੋਕ ਬਾਹਰ ਆ ਗਏ ਪਰ 15-16 ਲੋਕ ਅੰਦਰ ਹੀ ਫਸ ਗਏ।
ਅਚਾਨਕ ਆਇਆ ਪਾਣੀ, ਨਿਕਲਣ ਦਾ ਨਹੀਂ ਮਿਲਿਆ ਮੌਕਾ
ਦੀਮਾ ਹਸਾਓ ਜ਼ਿਲ੍ਹੇ ਦੇ ਐੱਸਪੀ ਮਯੰਕ ਝਾਅ ਨੇ ਦੱਸਿਆ ਕਿ ਖਾਨ ਵਿੱਚ ਕਈ ਮਜ਼ਦੂਰਾਂ ਦੇ ਫਸੇ ਹੋਣ ਦਾ ਖ਼ਦਸ਼ਾ ਹੈ। ਚਸ਼ਮਦੀਦਾਂ ਦੇ ਬਿਆਨਾਂ ਅਨੁਸਾਰ ਅਚਾਨਕ ਪਾਣੀ ਆ ਗਿਆ, ਜਿਸ ਕਾਰਨ ਮਜ਼ਦੂਰ ਖਾਨ ਵਿੱਚੋਂ ਬਾਹਰ ਨਹੀਂ ਆ ਸਕੇ। ਐਮਰਜੈਂਸੀ ਰਿਸਪਾਂਸ ਟੀਮ, ਸਥਾਨਕ ਅਧਿਕਾਰੀਆਂ ਤੇ ਮਾਈਨਿੰਗ ਮਾਹਿਰਾਂ ਦੀਆਂ ਟੀਮਾਂ ਨਾਲ ਰੈਸਕਿਊ ਆਪਰੇਸ਼ਨ ਸ਼ੁਰੂ ਕਰ ਦਿੱਤਾ ਗਿਆ ਹੈ। ਖਾਨ ਵਿੱਚ ਫਸੇ ਮਜ਼ਦੂਰਾਂ ਦਾ ਪਤਾ ਲਗਾਇਆ ਜਾ ਰਿਹਾ ਹੈ।
ਰੈਟ ਹੋਲ ਮਾਈਨਿੰਗ ਕੀ ਹੈ
ਰੈਟ ਦਾ ਮਤਲਬ ਹੈ ਚੂਹਾ, ਹੋਲ ਦਾ ਮਤਲਬ ਹੈ ਮੋਰੀ ਤੇ ਮਾਈਨਿੰਗ ਦਾ ਅਰਥ ਹੈ ਖੁਦਾਈ। ਇਹ ਸਪੱਸ਼ਟ ਹੈ ਕਿ ਮੋਰੀ ਵਿੱਚ ਦਾਖ਼ਲ ਚੂਹੇ ਵਾਂਗ ਖੁਦਾਈ ਕਰਨਾ। ਇਸ ਵਿੱਚ ਪਤਲੀ ਮੋਰੀ ਨਾਲ ਪਹਾੜ ਦੇ ਪਾਸਿਓਂ ਖੁਦਾਈ ਸ਼ੁਰੂ ਕੀਤੀ ਜਾਂਦੀ ਹੈ ਤੇ ਖੰਭਾ ਬਣਾ ਕੇ ਹੌਲੀ-ਹੌਲੀ ਹੈਂਡ ਡਰਿਲਿੰਗ ਮਸ਼ੀਨ ਨਾਲ ਡ੍ਰਿਲ ਕੀਤਾ ਜਾਂਦਾ ਹੈ। ਹੱਥ ਨਾਲ ਹੀ ਮਲਬੇ ਨੂੰ ਬਾਹਰ ਕੱਢਿਆ ਜਾਂਦਾ ਹੈ।
ਰੈਟ ਹੋਲ ਮਾਈਨਿੰਗ ਨਾਂ ਦੀ ਇੱਕ ਪ੍ਰਕਿਰਿਆ ਦੀ ਵਰਤੋਂ ਆਮ ਤੌਰ ‘ਤੇ ਕੋਲੇ ਦੀ ਮਾਈਨਿੰਗ ਵਿੱਚ ਹੁੰਦੀ ਰਹਿੰਦੀ ਹੈ। ਝਾਰਖੰਡ, ਛੱਤੀਸਗੜ੍ਹ ਤੇ ਉੱਤਰ ਪੂਰਬ ਵਿੱਚ ਰੈਟ ਹੋਲਮਾਈਨਿੰਗ ਹੁੰਦੀ ਹੈ ਪਰ ਰੈਟ ਹੋਲ ਮਾਈਨਿੰਗ ਕਾਫ਼ੀ ਖ਼ਤਰਨਾਕ ਕੰਮ ਹੈ, ਇਸ ਲਈ ਇਸ ‘ਤੇ ਕਈ ਵਾਰ ਪਾਬੰਦੀ ਲਗਾਈ ਗਈ ਹੈ।
