ਨਵੀਂ ਦਿੱਲੀ, 19 ਦਸੰਬਰ 2025 (ਪੰਜਾਬੀ ਖਬਰਨਾਮਾ ਬਿਊਰੋ):- ਰੇਗਿਸਤਾਨ ਅਤੇ ਝੁਲਸਾ ਦੇਣ ਵਾਲੀ ਗਰਮੀ ਲਈ ਮਸ਼ਹੂਰ ਸਾਊਦੀ ਅਰਬ ਤੋਂ ਬਰਫ਼ਬਾਰੀ ਦੀ ਵੀਡੀਓ ਸਾਹਮਣੇ ਆਈ ਹੈ। ਸਾਊਦੀ ਵਿੱਚ ਹੋਈ ਬਰਫ਼ਬਾਰੀ ਦੀ ਵੀਡੀਓ ਸੋਸ਼ਲ ਮੀਡੀਆ ‘ਤੇ ਤੇਜ਼ੀ ਨਾਲ ਵਾਇਰਲ ਹੋ ਰਹੀ ਹੈ। ਵੀਡੀਓ ਨੂੰ ਦੇਖ ਕੇ ਕੁਝ ਯੂਜ਼ਰਜ਼ ਹੈਰਾਨ ਰਹਿ ਗਏ, ਕਿਉਂਕਿ ਰੇਗਿਸਤਾਨ ਵਾਲੀ ਜ਼ਮੀਨ ਅਚਾਨਕ ਬਰਫ਼ ਨਾਲ ਢਕ ਗਈ।
ਦਰਅਸਲ, ‘ਸਾਊਦੀ ਗਜ਼ਟ’ ਦੀ ਰਿਪੋਰਟ ਅਨੁਸਾਰ, ਹਾਲ ਹੀ ਵਿੱਚ ਸਾਊਦੀ ਅਰਬ ਦੇ ਤਬੂਕ (Tabuk) ਖੇਤਰ ਅਤੇ ਟ੍ਰੋਜੇਨਾ (Trojena) ਵਿੱਚ ਬਰਫ਼ਬਾਰੀ ਹੋਈ ਹੈ। ਤਬੂਕ ਖੇਤਰ ਅਤੇ ਟ੍ਰੋਜੇਨਾ ਵਿੱਚ ਹੋਈ ਬਰਫ਼ਬਾਰੀ ਤੋਂ ਬਾਅਦ ਸਾਹਮਣੇ ਆਈਆਂ ਤਸਵੀਰਾਂ ਨੇ ਸਭ ਨੂੰ ਹੈਰਾਨ ਕਰ ਦਿੱਤਾ ਹੈ। ਇੱਥੇ ਹੋਈ ਬਰਫ਼ਬਾਰੀ ਨੂੰ ਲੋਕ ਕੁਦਰਤ ਦਾ ਕਰਿਸ਼ਮਾ ਦੱਸ ਰਹੇ ਹਨ।
ਤਾਪਮਾਨ ਮਾਇਨਸ 4 ਡਿਗਰੀ ਸੈਲਸੀਅਸ ਤੱਕ ਪਹੁੰਚਿਆ
ਸਾਊਦੀ ਗਜ਼ਟ ਮੁਤਾਬਕ ਪਿਛਲੇ ਬੁੱਧਵਾਰ ਨੂੰ ਬੀਰ ਬਿਨ ਹਿਰਮਾਸ, ਅਲ-ਉਯੈਨਾ, ਹਲਾਤ ਅੰਮਾਰ, ਤਬੂਕ ਅਤੇ ਸ਼ਿਗਰੀ ਵਿੱਚ ਬਰਫ਼ਬਾਰੀ ਹੋਈ। ਬਰਫ਼ਬਾਰੀ ਕਾਰਨ ਪੂਰਾ ਇਲਾਕਾ ਕਿਸੇ ‘ਵਿੰਟਰ ਵੰਡਰਲੈਂਡ’ ਵਾਂਗ ਦਿਖਾਈ ਦੇਣ ਲੱਗਾ। ਇਸ ਦੌਰਾਨ ਇੱਥੋਂ ਦਾ ਤਾਪਮਾਨ ਡਿੱਗ ਕੇ -4°C ਤੱਕ ਪਹੁੰਚ ਗਿਆ।
ਸੰਘਣੀ ਧੁੰਦ ਨੇ ਵਧਾਈ ਠਿਠੁਰਨ
ਆਲਮ ਇਹ ਹੋਇਆ ਕਿ ਉਬੜ-ਖਾਬੜ ਰੇਗਿਸਤਾਨੀ ਪਹਾੜ ਪੂਰੀ ਤਰ੍ਹਾਂ ਸਫੈਦ ਚਾਦਰ ਵਿੱਚ ਲਿਪਟ ਗਏ। ਇਸ ਦੌਰਾਨ ਇੱਥੇ ਨਾ ਸਿਰਫ਼ ਬਰਫ਼ਬਾਰੀ ਹੋਈ, ਸਗੋਂ ਪੂਰੇ ਇਲਾਕੇ ਵਿੱਚ ਸੰਘਣੀ ਧੁੰਦ ਅਤੇ ਤੇਜ਼ ਹਵਾਵਾਂ ਨੇ ਜ਼ਬਰਦਸਤ ਠੰਢ ਵਧਾ ਦਿੱਤੀ।
ਸਾਊਦੀ ਵਿੱਚ ਬਰਫ਼ਬਾਰੀ ਹੋਣਾ ਕੋਈ ਨਵੀਂ ਗੱਲ ਨਹੀਂ
ਰੇਗਿਸਤਾਨ ਵਾਲੇ ਸਾਊਦੀ ਅਰਬ ਤੋਂ ਆਈ ਵੀਡੀਓ ਨੇ ਸੋਸ਼ਲ ਮੀਡੀਆ ‘ਤੇ ਹਲਚਲ ਮਚਾ ਦਿੱਤੀ ਹੈ, ਕਿਉਂਕਿ ਕੁਝ ਲੋਕਾਂ ਨੂੰ ਲੱਗ ਰਿਹਾ ਹੈ ਕਿ ਇੱਥੇ ਬਰਫ਼ਬਾਰੀ ਹੋਣਾ ਕੋਈ ਅਨੋਖੀ ਘਟਨਾ ਹੈ। ਹਾਲਾਂਕਿ, ਇਹ ਕੋਈ ਨਵੀਂ ਗੱਲ ਨਹੀਂ ਹੈ, ਕਿਉਂਕਿ ਤਬੂਕ ਖੇਤਰ ਦੀ ਉਚਾਈ ਸਮੁੰਦਰ ਤਲ ਤੋਂ ਲਗਪਗ 2,600 ਮੀਟਰ ਤੋਂ ਵੱਧ ਹੈ। ਉਚਾਈ ਕਾਰਨ ਇੱਥੋਂ ਦਾ ਮੌਸਮ ਸਰਦੀਆਂ ਵਿੱਚ ਕਾਫੀ ਠੰਢਾ ਹੋ ਜਾਂਦਾ ਹੈ ਅਤੇ ਹਰ ਸਾਲ ਹਲਕੀ ਜਾਂ ਭਾਰੀ ਬਰਫ਼ਬਾਰੀ ਹੁੰਦੀ ਹੈ।
