02 ਨਵੰਬਰ 2026 (ਪੰਜਾਬੀ ਖਬਰਨਾਮਾ ਬਿਊਰੋ) : ਕੇਂਦਰ ਸਰਕਾਰ ਨੇ ਕਰਮਚਾਰੀ ਭਵਿੱਖ ਨਿਧੀ ਸੰਗਠਨ (EPFO) ਤਹਿਤ ਪੀਐੱਫ ਦੀ ਗਣਨਾ ਲਈ ਤਨਖ਼ਾਹ ਦੀ ਸੀਮਾ 15,000 ਰੁਪਏ ਤੋਂ ਵਧਾ ਕੇ 25,000 ਰੁਪਏ ਕਰ ਦਿੱਤੀ ਹੈ। ਇਸ ਬਦਲਾਅ ਕਾਰਨ ਕਈ ਕਰਮਚਾਰੀਆਂ ਦੀ ਹੱਥ ਵਿੱਚ ਆਉਣ ਵਾਲੀ ਤਨਖ਼ਾਹ (ਟੇਕ-ਹੋਮ ਸੈਲਰੀ) ਘੱਟ ਹੋ ਸਕਦੀ ਹੈ।
ਨਵੇਂ ਨਿਯਮ ਮੁਤਾਬਕ, ਪਹਿਲਾਂ ਲਾਜ਼ਮੀ ਪੀਐੱਫ ਲਈ ਤਨਖ਼ਾਹ ਵਿੱਚੋਂ ਹਰ ਮਹੀਨੇ 1,800 ਰੁਪਏ ਕੱਟੇ ਜਾਂਦੇ ਸਨ, ਪਰ ਹੁਣ ਇਹ ਰਕਮ ਵਧ ਕੇ 3,000 ਰੁਪਏ ਹੋ ਗਈ ਹੈ। ਹਾਲਾਂਕਿ, ਇਸ ਕਾਰਨ ਘਬਰਾਉਣ ਦੀ ਲੋੜ ਨਹੀਂ ਹੈ, ਕਿਉਂਕਿ ਕੱਟੀ ਗਈ ਰਕਮ ਤੁਹਾਡੇ ਆਪਣੇ ਪੀਐੱਫ ਖਾਤੇ ਵਿੱਚ ਹੀ ਜਮ੍ਹਾਂ ਹੁੰਦੀ ਹੈ। ਅੱਜ ਭਾਵੇਂ ਤੁਹਾਡੀ ਹੱਥ ਵਿੱਚ ਆਉਣ ਵਾਲੀ ਤਨਖ਼ਾਹ ਘੱਟ ਹੋ ਰਹੀ ਹੈ, ਪਰ ਇਸ ਨਾਲ ਭਵਿੱਖ ਲਈ ਤੁਹਾਡੀ ਬੱਚਤ ਵਧੇਗੀ।
ਇਸ ਤੋਂ ਇਲਾਵਾ, ਤੁਹਾਡੀ ਤਨਖ਼ਾਹ ਵਿੱਚੋਂ ਜਿੰਨੀ ਵਾਧੂ ਰਕਮ ਕੱਟੀ ਜਾ ਰਹੀ ਹੈ, ਕੰਪਨੀ ਨੂੰ ਵੀ ਆਪਣੀ ਤਰਫ਼ੋਂ ਪੀਐੱਫ ਅਤੇ ਪੈਨਸ਼ਨ ਖਾਤੇ ਵਿੱਚ ਉਨੀ ਹੀ ਵਾਧੂ ਰਕਮ ਜਮ੍ਹਾਂ ਕਰਵਾਉਣੀ ਪਵੇਗੀ। ਇਸ ਤਰ੍ਹਾਂ ਹਰ ਮਹੀਨੇ ਤੁਹਾਡੇ ਪੀਐੱਫ ਅਤੇ ਪੈਨਸ਼ਨ ਖਾਤੇ ਵਿੱਚ ਕੁੱਲ 2,400 ਰੁਪਏ ਵਾਧੂ ਜਮ੍ਹਾਂ ਹੋਣਗੇ। ਇਸ ਵਿੱਚ 1,200 ਰੁਪਏ ਤੁਹਾਡੀ ਤਨਖ਼ਾਹ ਵਿੱਚੋਂ ਅਤੇ 1,200 ਰੁਪਏ ਕੰਪਨੀ ਵੱਲੋਂ ਵਾਧੂ ਦਿੱਤੇ ਜਾਣਗੇ।
ਇਸ ਜਮ੍ਹਾਂ ਰਕਮ ’ਤੇ EPFO ਵੱਲੋਂ ਸਾਲਾਨਾ ਲਗਭਗ 8.25 ਫ਼ੀਸਦੀ ਦੀ ਦਰ ਨਾਲ ਚੱਕਰਵਰਧੀ ਵਿਆਜ ਮਿਲੇਗਾ। ਇਸ ਨਾਲ ਰਿਟਾਇਰਮੈਂਟ ਸਮੇਂ ਤੁਹਾਡਾ ਫੰਡ ਪਹਿਲਾਂ ਦੇ ਮੁਕਾਬਲੇ ਵੱਡਾ ਹੋ ਸਕਦਾ ਹੈ।
ਪੀਐੱਫ ਕਟੌਤੀ ਦਾ ਦਾਇਰਾ ਵਧਿਆ
ਪਹਿਲਾਂ ਕੰਪਨੀ ਤੁਹਾਡੇ ਪੈਨਸ਼ਨ ਖਾਤੇ (EPS) ਵਿੱਚ ਵੱਧ ਤੋਂ ਵੱਧ 1,250 ਰੁਪਏ ਪ੍ਰਤੀ ਮਹੀਨਾ ਜਮ੍ਹਾਂ ਕਰਵਾ ਸਕਦੀ ਸੀ। ਇਹ ਰਕਮ 15,000 ਰੁਪਏ ਦੀ ਤਨਖ਼ਾਹ ਸੀਮਾ ਦਾ 8.33 ਫ਼ੀਸਦੀ ਸੀ। ਹੁਣ ਨਵੀਂ ਸੀਮਾ 25,000 ਰੁਪਏ ਹੋਣ ਨਾਲ ਕੰਪਨੀ ਹਰ ਮਹੀਨੇ ਤੁਹਾਡੇ ਪੈਨਸ਼ਨ ਫੰਡ ਵਿੱਚ 2,082.50 ਰੁਪਏ ਜਮ੍ਹਾਂ ਕਰਵਾਏਗੀ।
ਪਹਿਲਾਂ 15,000 ਰੁਪਏ ਦੀ ਵੇਜ ਲਿਮਟ ਮੁਤਾਬਕ ਕਰਮਚਾਰੀ ਦਾ ਹਿੱਸਾ 1,800 ਰੁਪਏ ਅਤੇ ਕੰਪਨੀ ਦਾ ਕੁੱਲ ਹਿੱਸਾ ਵੀ 1,800 ਰੁਪਏ ਹੁੰਦਾ ਸੀ। ਇਸ ਤਰ੍ਹਾਂ ਦੋਵਾਂ ਦੇ ਹਿੱਸੇ ਮਿਲਾ ਕੇ ਹਰ ਮਹੀਨੇ 3,600 ਰੁਪਏ ਜਮ੍ਹਾਂ ਹੁੰਦੇ ਸਨ। ਹੁਣ 25,000 ਰੁਪਏ ਦੀ ਨਵੀਂ ਸੀਮਾ ਮੁਤਾਬਕ ਕੁੱਲ 6,000 ਰੁਪਏ ਜਮ੍ਹਾਂ ਹੋਣਗੇ। ਇਸ ਵਿੱਚ ਕੰਪਨੀ ਵੱਲੋਂ 1,200 ਰੁਪਏ ਵਾਧੂ ਦਿੱਤੇ ਜਾਣਗੇ।
ਦੋ ਵੱਖ-ਵੱਖ ਖਾਤਿਆਂ ਵਿੱਚ ਜਮ੍ਹਾਂ ਹੁੰਦਾ ਹੈ ਕੰਪਨੀ ਦਾ ਹਿੱਸਾ
ਕੰਪਨੀ ਵੱਲੋਂ 25,000 ਰੁਪਏ ਦੀ ਤਨਖ਼ਾਹ ਦੇ ਹਿਸਾਬ ਨਾਲ 12 ਫ਼ੀਸਦੀ ਯੋਗਦਾਨ, ਯਾਨੀ 3,000 ਰੁਪਏ, ਇੱਕੋ ਖਾਤੇ ਵਿੱਚ ਜਮ੍ਹਾਂ ਨਹੀਂ ਹੁੰਦੇ। ਇਹ ਰਕਮ ਦੋ ਵੱਖ-ਵੱਖ ਖਾਤਿਆਂ ਵਿੱਚ ਵੰਡੀ ਜਾਂਦੀ ਹੈ।
1. ਪੀਐੱਫ (EPF) ਖਾਤਾ: ਕੰਪਨੀ ਦੇ 3,000 ਰੁਪਏ ਦੇ ਯੋਗਦਾਨ ਵਿੱਚੋਂ 3.67 ਫ਼ੀਸਦੀ ਹਿੱਸਾ ਕਰਮਚਾਰੀ ਦੇ ਪੀਐੱਫ ਖਾਤੇ ਵਿੱਚ ਜਾਂਦਾ ਹੈ। 25,000 ਰੁਪਏ ਦੇ ਹਿਸਾਬ ਨਾਲ ਇਹ ਰਕਮ 917.50 ਰੁਪਏ ਬਣਦੀ ਹੈ।
2. ਪੈਨਸ਼ਨ (EPS) ਖਾਤਾ: ਬਾਕੀ 8.33 ਫ਼ੀਸਦੀ ਹਿੱਸਾ ਕਰਮਚਾਰੀ ਦੇ ਪੈਨਸ਼ਨ ਖਾਤੇ ਵਿੱਚ ਜਮ੍ਹਾਂ ਹੁੰਦਾ ਹੈ। 25,000 ਰੁਪਏ ਦੀ ਤਨਖ਼ਾਹ ਦੇ ਹਿਸਾਬ ਨਾਲ ਇਹ ਰਕਮ 2,082.50 ਰੁਪਏ ਬਣਦੀ ਹੈ।
