ਵਾਸ਼ਿੰਗਟਨ 02 ਨਵੰਬਰ 2026 (ਪੰਜਾਬੀ ਖਬਰਨਾਮਾ ਬਿਊਰੋ) : ਯੂਕਰੇਨ ਦੇ ਰਾਸ਼ਟਰਪਤੀ ਵੋਲੋਦੀਮੀਰ ਜ਼ੈਲੇਂਸਕੀ ਨੇ ਕਿਹਾ ਹੈ ਕਿ ਉਨ੍ਹਾਂ ਦਾ ਦੇਸ਼ ਰੂਸੀ ਤੇਲ ਰਿਫਾਇਨਰੀਆਂ ’ਤੇ ਹਮਲੇ ਰੋਕਣ ਲਈ ਤਿਆਰ ਹੈ, ਬਸ਼ਰਤੇ ਅਮਰੀਕਾ ਕੀਵ ਨੂੰ ਸ਼ਕਤੀਸ਼ਾਲੀ ਪੈਟ੍ਰਿਯਟ ਏਅਰ ਡਿਫੈਂਸ ਇੰਟਰਸੈਪਟਰ ਮਿਜ਼ਾਈਲਾਂ ਤੁਰੰਤ ਮੁਹੱਈਆ ਕਰਵਾਏ।
ਅਮਰੀਕੀ ਰਾਸ਼ਟਰਪਤੀ ਡੋਨਾਲਡ ਟਰੰਪ ਲਗਾਤਾਰ ਦੋਵਾਂ ਦੇਸ਼ਾਂ ’ਤੇ ਇੱਕ-ਦੂਜੇ ਦੇ ਊਰਜਾ ਢਾਂਚਿਆਂ ’ਤੇ ਹਮਲੇ ਰੋਕਣ ਲਈ ਦਬਾਅ ਬਣਾ ਰਹੇ ਹਨ, ਤਾਂ ਜੋ ਵਿਸ਼ਵ ਪੱਧਰ ’ਤੇ ਊਰਜਾ ਦੀਆਂ ਵਧਦੀਆਂ ਕੀਮਤਾਂ ਅਤੇ ਅਮਰੀਕਾ ਵਿੱਚ ਮਹਿੰਗਾਈ ਨੂੰ ਕਾਬੂ ਕੀਤਾ ਜਾ ਸਕੇ।
ਜ਼ੈਲੇਂਸਕੀ ਨੇ ਟਰੰਪ ਸਾਹਮਣੇ ਕਿਉਂ ਰੱਖੀ ਪੈਟ੍ਰਿਯਟ ਮਿਜ਼ਾਈਲਾਂ ਦੀ ਮੰਗ?
ਅਮਰੀਕੀ ਨਿਊਜ਼ ਚੈਨਲ ਫੌਕਸ ਨਿਊਜ਼ ਮੁਤਾਬਕ, ਜ਼ੇਲੇਂਸਕੀ ਨੇ ਦੱਸਿਆ ਕਿ ਉਨ੍ਹਾਂ ਨੇ ਇਸ ਮੁੱਦੇ ’ਤੇ ਰਾਸ਼ਟਰਪਤੀ ਡੋਨਲਡ ਟਰੰਪ ਅਤੇ ਉਨ੍ਹਾਂ ਦੀ ਟੀਮ ਨਾਲ ਕਈ ਵਾਰ ਵਿਸਥਾਰ ਨਾਲ ਚਰਚਾ ਕੀਤੀ ਹੈ। ਉਨ੍ਹਾਂ ਕਿਹਾ ਕਿ ਰੂਸ ਯੂਕਰੇਨ ਦੇ ਬਿਜਲੀ ਗਰਿੱਡ, ਗੈਸ ਸਪਲਾਈ ਅਤੇ ਰਿਫਾਇਨਰੀਆਂ ’ਤੇ ਲਗਾਤਾਰ ਹਮਲੇ ਕਰਕੇ ਆਮ ਨਾਗਰਿਕਾਂ ਦੀ ਜਾਨ ਲੈ ਰਿਹਾ ਹੈ। ਅਜਿਹੇ ਵਿੱਚ ਯੂਕਰੇਨ ਲਈ ਜਵਾਬੀ ਕਾਰਵਾਈ ਨਾ ਕਰਨਾ ਅਸੰਭਵ ਹੈ।
ਜ਼ੈਲੇਂਸਕੀ ਨੇ ਟਰੰਪ ਪ੍ਰਸ਼ਾਸਨ ਸਾਹਮਣੇ ਦੋ ਬਦਲ ਰੱਖਦਿਆਂ ਕਿਹਾ ਕਿ ਜੇਕਰ ਅਮਰੀਕਾ ਚਾਹੁੰਦਾ ਹੈ ਕਿ ਰੂਸੀ ਤੇਲ ਸੋਧਕ ਪਲਾਂਟਾਂ ’ਤੇ ਹਮਲੇ ਬੰਦ ਹੋਣ ਤਾਂ ਜਾਂ ਤਾਂ ਰੂਸ ਯੂਕਰੇਨ ਦੇ ਊਰਜਾ ਗਰਿੱਡ ’ਤੇ ਬੰਬਾਰੀ ਰੋਕੇ ਜਾਂ ਫਿਰ ਅਮਰੀਕਾ ਯੂਕਰੇਨ ਨੂੰ ਪੈਟ੍ਰਿਯਟ ਮਿਜ਼ਾਈਲਾਂ ਮੁਹੱਈਆ ਕਰਵਾਏ।
ਜ਼ੈਲੇਂਸਕੀ ਨੇ ਸਪੱਸ਼ਟ ਕੀਤਾ ਕਿ ਜੇਕਰ ਵਾਸ਼ਿੰਗਟਨ ਇੱਕ ਮਹੀਨੇ ਲਈ ਇਹ ਮਿਜ਼ਾਈਲ ਪ੍ਰਣਾਲੀਆਂ ਮੁਹੱਈਆ ਕਰਵਾਉਂਦਾ ਹੈ ਤਾਂ ਯੂਕਰੇਨ ਵੀ ਇੰਨੇ ਹੀ ਸਮੇਂ ਲਈ ਰੂਸੀ ਰਿਫਾਇਨਰੀਆਂ ’ਤੇ ਹਮਲੇ ਪੂਰੀ ਤਰ੍ਹਾਂ ਰੋਕ ਦੇਵੇਗਾ। ਉਨ੍ਹਾਂ ਇਹ ਵੀ ਕਿਹਾ ਕਿ ਯੂਕਰੇਨ ਇਸ ਲਈ ਪੈਸੇ ਦੇਣ ਨੂੰ ਤਿਆਰ ਹੈ ਅਤੇ ਉਹ ਸਿਰਫ਼ ਮੁਫ਼ਤ ਸਹਾਇਤਾ ’ਤੇ ਨਿਰਭਰ ਨਹੀਂ ਰਹਿਣਾ ਚਾਹੁੰਦਾ।
ਟਰੰਪ ’ਤੇ ਦਬਾਅ ਬਣਾਉਣ ਦੇ ਦੋਸ਼ਾਂ ਨੂੰ ਨਕਾਰਿਆ
ਜਦੋਂ ਜ਼ੈਲੇਂਸਕੀ ਤੋਂ ਪੁੱਛਿਆ ਗਿਆ ਕਿ ਕੀ ਉਨ੍ਹਾਂ ਦੀ ਇਸ ਮੰਗ ਨੂੰ ਰਾਸ਼ਟਰਪਤੀ ਟਰੰਪ ’ਤੇ ਦਬਾਅ ਬਣਾਉਣ ਦੀ ਕੋਸ਼ਿਸ਼ ਵਜੋਂ ਦੇਖਿਆ ਜਾ ਸਕਦਾ ਹੈ ਤਾਂ ਉਨ੍ਹਾਂ ਇਸ ਤੋਂ ਸਪੱਸ਼ਟ ਇਨਕਾਰ ਕੀਤਾ। ਉਨ੍ਹਾਂ ਕਿਹਾ ਕਿ ਭਾਈਵਾਲਾਂ ਵਿਚਕਾਰ ਸੱਚ ਸਾਂਝਾ ਕਰਨ ਵਿੱਚ ਉਨ੍ਹਾਂ ਨੂੰ ਕਿਸੇ ਵੀ ਤਰ੍ਹਾਂ ਦੀ ਝਿਜਕ ਜਾਂ ਚਿੰਤਾ ਨਹੀਂ ਹੈ।
ਰੂਸੀ ਡਰੋਨਾਂ ਅਤੇ ਬੈਲਿਸਟਿਕ ਮਿਜ਼ਾਈਲਾਂ ਨੂੰ ਹਵਾ ਵਿੱਚ ਹੀ ਨਸ਼ਟ ਕਰਨ ਲਈ ਪੈਟ੍ਰਿਯਟ ਮਿਜ਼ਾਈਲਾਂ ਯੂਕਰੇਨ ਦੇ ਸਭ ਤੋਂ ਅਹਿਮ ਰੱਖਿਆ ਹਥਿਆਰਾਂ ਵਿੱਚੋਂ ਇੱਕ ਹਨ। ਹਾਲਾਂਕਿ ਟਰੰਪ ਪ੍ਰਸ਼ਾਸਨ ਨੇ ਸ਼ੁੱਕਰਵਾਰ ਨੂੰ ਯੂਕਰੇਨ ਨੂੰ 500 ਪੈਟ੍ਰਿਯਟ ਮਿਜ਼ਾਈਲਾਂ ਦੀ ਵਿਕਰੀ ਨੂੰ ਮਨਜ਼ੂਰੀ ਦੇ ਦਿੱਤੀ ਹੈ, ਪਰ ਜ਼ੈਲੇਂਸਕੀ ਨੇ ਚਿਤਾਵਨੀ ਦਿੱਤੀ ਕਿ ਇਨ੍ਹਾਂ ਹਥਿਆਰਾਂ ਦੀ ਅਸਲ ਸਪਲਾਈ ਪੂਰੀ ਹੋਣ ਵਿੱਚ ਕਈ ਸਾਲ ਲੱਗ ਸਕਦੇ ਹਨ।
ਯੂਕਰੇਨ ਵਿੱਚ ਇੰਟਰਸੈਪਟਰ ਮਿਜ਼ਾਈਲਾਂ ਦੀ ਕਮੀ
ਯੂਕਰੇਨੀ ਅਧਿਕਾਰੀ ਪਿਛਲੇ ਕਈ ਹਫ਼ਤਿਆਂ ਤੋਂ ਚਿਤਾਵਨੀ ਦੇ ਰਹੇ ਹਨ ਕਿ ਉਨ੍ਹਾਂ ਕੋਲ ਦੁਸ਼ਮਣ ਦੀਆਂ ਮਿਜ਼ਾਈਲਾਂ ਨੂੰ ਰੋਕਣ ਵਾਲੇ ਇੰਟਰਸੈਪਟਰਾਂ ਦਾ ਭੰਡਾਰ ਤੇਜ਼ੀ ਨਾਲ ਘਟ ਰਿਹਾ ਹੈ। ਜ਼ੇਲੇਂਸਕੀ ਨੇ ਸੁਝਾਅ ਦਿੱਤਾ ਕਿ ਅਮਰੀਕਾ ਅਤੇ ਯੂਰਪੀ ਸਹਿਯੋਗੀ ਆਪਣੇ ਮੌਜੂਦਾ ਭੰਡਾਰ ਵਿੱਚੋਂ ਤੁਰੰਤ ਯੂਕਰੇਨ ਨੂੰ ਮਿਜ਼ਾਈਲਾਂ ਦੇ ਸਕਦੇ ਹਨ। ਬਾਅਦ ਵਿੱਚ ਸ਼ੁੱਕਰਵਾਰ ਨੂੰ ਮਨਜ਼ੂਰ ਕੀਤੇ ਗਏ ਨਵੇਂ ਸਮਝੌਤੇ ਰਾਹੀਂ ਇਸ ਭੰਡਾਰ ਦੀ ਭਰਪਾਈ ਕੀਤੀ ਜਾ ਸਕਦੀ ਹੈ।
ਇਸ ਦੌਰਾਨ, ਯੂਕਰੇਨ ਜੰਗ ਦਾ ਸਭ ਤੋਂ ਲੰਬਾ ਜੰਗਬੰਦੀ ਸਮਝੌਤਾ, ਜੋ ਸਿਰਫ਼ ਪੂਰਬੀ ਖੇਰਸਨ ਖੇਤਰ ਤੱਕ ਸੀਮਤ ਸੀ, ਐਤਵਾਰ ਨੂੰ ਖ਼ਤਮ ਹੋ ਗਿਆ। ਰੂਸ ਨੇ ਇਸ ਨੂੰ ਅੱਗੇ ਵਧਾਉਣ ਦੇ ਪ੍ਰਸਤਾਵ ਨੂੰ ਰੱਦ ਕਰ ਦਿੱਤਾ।
ਦੂਜੇ ਪਾਸੇ, ਅਮਰੀਕਾ ਦੀ ਵਿਚੋਲਗੀ ਹੇਠ ਰੂਸ ਅਤੇ ਯੂਕਰੇਨ ਵਿਚਕਾਰ ਸ਼ਾਂਤੀ ਵਾਰਤਾ ਇਸੇ ਮਹੀਨੇ ਮੁੜ ਸ਼ੁਰੂ ਹੋਣ ਦੀ ਸੰਭਾਵਨਾ ਹੈ। ਇਹ ਵਾਰਤਾ ਫਰਵਰੀ ਵਿੱਚ ਅਮਰੀਕਾ ਅਤੇ ਇਜ਼ਰਾਈਲ ਵੱਲੋਂ ਈਰਾਨ ’ਤੇ ਕੀਤੇ ਗਏ ਸਾਂਝੇ ਹਮਲਿਆਂ ਤੋਂ ਬਾਅਦ ਅਮਲੀ ਤੌਰ ’ਤੇ ਰੁਕੀ ਹੋਈ ਸੀ।
