‘ਵੈਭਵ ਤੂਫ਼ਾਨ ਹੈ, ਜੋ ਉਸ ਨੂੰ ਸੁੱਟੇਗਾ, ਉਹ ਖ਼ੁਦ ਡਿੱਗ ਜਾਵੇਗਾ’; ਸੂਰਿਆਵੰਸ਼ੀ ਦੇ ਬਚਪਨ ਦੇ ਕੋਚ ਨੇ ਕੱਢੀ ਰੱਜ ਕੇ ਭੜਾਸ

ਨਵੀਂ ਦਿੱਲੀ 13 ਅਕਤੂਬਰ 2026 (ਪੰਜਾਬੀ ਖਬਰਨਾਮਾ ਬਿਊਰੋ) : ਵੈਸਟਇੰਡੀਜ਼ ਖਿਲਾਫ ਚੱਲ ਰਹੀ ਪੰਜ ਮੈਚਾਂ ਦੀ ਟੀ-20 ਸੀਰੀਜ਼ ਦੌਰਾਨ ਵੈਭਵ ਸੂਰਿਆਵੰਸ਼ੀ ਲਗਾਤਾਰ ਟੀਮ ਤੋਂ ਬਾਹਰ ਹੀ ਰਹੇ ਹਨ। ਟੀਮ ਇੰਡੀਆ ਦੀ ਪਲੇਇੰਗ ਇਲੈਵਨ ਵਿੱਚ ਵੈਭਵ ਨੂੰ ਲਗਾਤਾਰ ਮੌਕੇ ਨਾ ਮਿਲਣ ਕਾਰਨ ਉਨ੍ਹਾਂ ਦੇ ਬਚਪਨ ਦੇ ਕੋਚ ਮਨੀਸ਼ ਓਝਾ ਕਾਫੀ ਨਾਰਾਜ਼ ਹਨ। ਉਨ੍ਹਾਂ ਨੇ ਮੁੱਖ ਕੋਚ ਗੌਤਮ ਗੰਭੀਰ ਅਤੇ ਟੀਮ ਪ੍ਰਬੰਧਨ ਦੀ ਸਖ਼ਤ ਆਲੋਚਨਾ ਕਰਦਿਆਂ ਉਨ੍ਹਾਂ ‘ਤੇ ਤਾਨਾਸ਼ਾਹੀ ਰਵੱਈਆ ਅਪਣਾਉਣ ਦਾ ਦੋਸ਼ ਲਗਾਇਆ ਹੈ।

ਜ਼ਿਕਰਯੋਗ ਹੈ ਕਿ ਵੈਭਵ ਨੂੰ ਪਹਿਲਾਂ ਏਸ਼ੀਆਈ ਖੇਡਾਂ ਦੌਰਾਨ ਮੌਕਾ ਮਿਲਿਆ ਸੀ, ਜਦੋਂ ਸੰਜੂ ਸੈਮਸਨ ਤੀਜੇ ਨੰਬਰ ‘ਤੇ ਬੱਲੇਬਾਜ਼ੀ ਕਰ ਰਹੇ ਸਨ। ਹਾਲਾਂਕਿ, ਵੈਸਟਇੰਡੀਜ਼ ਖਿਲਾਫ ਸੂਰਿਆਵੰਸ਼ੀ ਨੂੰ ਬਾਹਰ ਰੱਖਿਆ ਗਿਆ ਅਤੇ ਸੈਮਸਨ ਨੇ ਦੁਬਾਰਾ ਪਾਰੀ ਦੀ ਸ਼ੁਰੂਆਤ ਕਰਨੀ ਸ਼ੁਰੂ ਕਰ ਦਿੱਤੀ। ਸੰਜੂ ਦੇ ਲਗਾਤਾਰ ਵਧੀਆ ਪ੍ਰਦਰਸ਼ਨ ਨੂੰ ਦੇਖਦੇ ਹੋਏ ਉਨ੍ਹਾਂ ਨੂੰ ਟੀਮ ਤੋਂ ਬਾਹਰ ਕਰਨਾ ਪ੍ਰਬੰਧਨ ਲਈ ਵੀ ਆਸਾਨ ਫੈਸਲਾ ਨਹੀਂ ਹੈ। ਨਤੀਜੇ ਵਜੋਂ, ਵੈਭਵ ਲਈ ਫਿਲਹਾਲ ਕੋਈ ਥਾਂ ਖਾਲੀ ਨਜ਼ਰ ਨਹੀਂ ਆਉਂਦੀ, ਜਿਸ ਕਾਰਨ ਉਨ੍ਹਾਂ ਦੇ ਕੋਚ ਕਾਫੀ ਗੁੱਸੇ ਵਿੱਚ ਹਨ।

ਵੈਭਵ ਸੂਰਿਆਵੰਸ਼ੀ ਦੇ ਕੋਚ ਨੇ ਗੁੱਸਾ ਕੀਤਾ ਜ਼ਾਹਰ

‘ਸਪੋਰਟਸ ਨਾਵ’ ਨਾਲ ਗੱਲ ਕਰਦਿਆਂ ਵੈਭਵ ਦੇ ਬਚਪਨ ਦੇ ਕੋਚ ਮਨੀਸ਼ ਓਝਾ ਨੇ ਕਿਹਾ, “ਮੇਰੀ ਨਜ਼ਰ ਵਿੱਚ ਵੈਭਵ ਇੱਕ ਤੂਫ਼ਾਨ ਵਾਂਗ ਹੈ। ਜੋ ਵੀ ਉਸਦਾ ਮੁਕਾਬਲਾ ਕਰਨ ਦੀ ਕੋਸ਼ਿਸ਼ ਕਰੇਗਾ, ਉਹ ਦੇਰ-ਸਵੇਰ ਢਹਿ-ਢੇਰੀ ਹੋ ਜਾਵੇਗਾ। ਇਸ ਟੀਮ ਪ੍ਰਬੰਧਨ ਦਾ ਮੰਨਣਾ ਜਾਪਦਾ ਹੈ ਕਿ ਖਿਡਾਰੀਆਂ ਨੂੰ ਬੈਂਚ ‘ਤੇ ਬਿਠਾ ਕੇ ਹੀ ਉਨ੍ਹਾਂ ਨੂੰ ਤਿਆਰ ਕੀਤਾ ਜਾਂਦਾ ਹੈ। ਕ੍ਰਿਕਟ ਦੇ ਹੋਰ ਵੀ ਕਈ ਦਿੱਗਜ ਹਨ; ਜੇਕਰ ਤੁਸੀਂ ਉਨ੍ਹਾਂ ਨਾਲ ਗੱਲ ਕਰੋਗੇ ਤਾਂ ਉਹ ਕਹਿਣਗੇ ਕਿ ਅਗਲੀ ਪੀੜ੍ਹੀ ਨੂੰ ਤਿਆਰ ਕਰਨ ਲਈ ਉਨ੍ਹਾਂ ਨੂੰ ਮੈਚ ਦੀਆਂ ਚੁਣੌਤੀਪੂਰਨ ਸਥਿਤੀਆਂ ਵਿੱਚ ਉਤਾਰਨਾ ਜ਼ਰੂਰੀ ਹੈ। ਕੋਈ ਵੀ ਖਿਡਾਰੀ ਸਿਰਫ਼ ਬੈਂਚ ‘ਤੇ ਬੈਠ ਕੇ ਵਿਕਾਸ ਨਹੀਂ ਕਰ ਸਕਦਾ।”

ਓਝਾ ਨੇ ਗੰਭੀਰ ਦੀ ਅਗਵਾਈ ਵਾਲੇ ਟੀਮ ਪ੍ਰਬੰਧਨ ਨੂੰ ਤਾਨਾਸ਼ਾਹ ਕਰਾਰ ਦਿੱਤਾ। ਉਨ੍ਹਾਂ ਦਾ ਮੰਨਣਾ ਹੈ ਕਿ ਪ੍ਰਬੰਧਨ ਨੇ ਵੈਭਵ ਨੂੰ ਮੌਕਾ ਨਾ ਦੇਣ ਦਾ ਫੈਸਲਾ ਪਹਿਲਾਂ ਹੀ ਕਰ ਲਿਆ ਹੈ। ਉਨ੍ਹਾਂ ਕਿਹਾ, “ਅਜਿਹਾ ਲੱਗਦਾ ਹੈ ਕਿ ਉਨ੍ਹਾਂ ਨੇ ਉਸ ਬੱਚੇ ਨੂੰ ਮੌਕਾ ਨਾ ਦੇਣ ਦਾ ਮਨ ਬਣਾ ਲਿਆ ਹੈ। ਉਹ ਉਸਨੂੰ ਬਾਹਰ ਰੱਖਣਾ ਚਾਹੁੰਦੇ ਹਨ ਅਤੇ ਉਸ ਲਈ ਮੁਸ਼ਕਲਾਂ ਖੜ੍ਹੀਆਂ ਕਰਨਾ ਚਾਹੁੰਦੇ ਹਨ। ਉਹ ਬਾਹਰ ਬੈਠਾ ਹੈ ਅਤੇ ਸਿਰਫ਼ ਡਰਿੰਕਸ ਪਹੁੰਚਾਉਣ ਦਾ ਕੰਮ ਕਰ ਰਿਹਾ ਹੈ। ਮੈਨੂੰ ਲੱਗਦਾ ਵੈਭਵ ਨੂੰ ਏਸ਼ੀਆਈ ਖੇਡਾਂ ਵਿੱਚ ਅਭਿਸ਼ੇਕ ਸ਼ਰਮਾ ਦੇ ਨਾਲ ਪਾਰੀ ਦੀ ਸ਼ੁਰੂਆਤ ਕਰਨ ਦਾ ਮੌਕਾ ਮਿਲਿਆ। ਉਸਨੇ ਸੈਮੀਫਾਈਨਲ ਵਿੱਚ ਸ਼੍ਰੀਲੰਕਾ ਵਿਰੁੱਧ 38 ਦੌੜਾਂ ਬਣਾਈਆਂ ਪਰ ਉਹ ਇਸਨੂੰ ਵੱਡੇ ਸਕੋਰ ਵਿੱਚ ਤਬਦੀਲ ਨਹੀਂ ਕਰ ਸਕਿਆ। ਇਸ ਤੋਂ ਇਲਾਵਾ, ਪਾਕਿਸਤਾਨ ਵਿਰੁੱਧ ਫਾਈਨਲ ਮੈਚ ਵਿੱਚ ਉਹ 15 ਦੌੜਾਂ ਬਣਾ ਕੇ ਆਊਟ ਹੋ ਗਿਆ। ਹੁਣ, ਉਸਨੂੰ ਵੈਸਟਇੰਡੀਜ਼ ਵਿਰੁੱਧ ਸੀਰੀਜ਼ ਵਿੱਚ ਮੌਕਾ ਨਹੀਂ ਦਿੱਤਾ ਗਿਆ ਹੈ।