ਨਵੀਂ ਦਿੱਲੀ 06 ਅਕਤੂਬਰ 2026 (ਪੰਜਾਬੀ ਖਬਰਨਾਮਾ ਬਿਊਰੋ) : ਹਰਮਨਪ੍ਰੀਤ ਕੌਰ ਨੇ ਮੰਗਲਵਾਰ ਨੂੰ ਤਿੰਨਾਂ ਫਾਰਮੈਟਾਂ ’ਚ ਭਾਰਤੀ ਮਹਿਲਾ ਕ੍ਰਿਕਟ ਟੀਮ ਦੀ ਕਪਤਾਨੀ ਛੱਡਣ ਦਾ ਫੈਸਲਾ ਕੀਤਾ। ਉਨ੍ਹਾਂ ਨੇ ਇੰਸਟਾਗ੍ਰਾਮ ‘ਤੇ ਇੱਕ ਭਾਵੁਕ ਪੋਸਟ ਲਿਖਦੇ ਹੋਏ ਦੱਸਿਆ ਕਿ ਹੁਣ ਉਹ ਟੀਮ ਦੀ ਕਪਤਾਨੀ ਨਹੀਂ ਕਰਨਗੇ। ਅਜਿਹੇ ’ਚ ਸਵਾਲ ਇਹ ਹੈ ਕਿ ਹਰਮਨਪ੍ਰੀਤ ਤੋਂ ਬਾਅਦ ਟੀਮ ਦੀ ਕਮਾਨ ਕਿਸਨੂੰ ਮਿਲੇਗੀ? ਇਸ ਦੇ ਨਾਲ ਇਹ ਸਵਾਲ ਵੀ ਹੈ ਕਿ ਕੀ ਟੀਮ ਮੈਨੇਜਮੈਂਟ ਪਹਿਲਾਂ ਵਾਂਗ ਤਿੰਨਾਂ ਫਾਰਮੈਟਾਂ ਲਈ ਇੱਕ ਹੀ ਕਪਤਾਨ ‘ਤੇ ਭਰੋਸਾ ਕਰੇਗਾ ਜਾਂ ਫਾਰਮੈਟ ਦੇ ਹਿਸਾਬ ਨਾਲ ਵੱਖ-ਵੱਖ ਕਪਤਾਨ ਨਿਯੁਕਤ ਕੀਤੇ ਜਾਣਗੇ। ਹਰਮਨਪ੍ਰੀਤ ਕੌਰ ਤੋਂ ਬਾਅਦ ਕਪਤਾਨੀ ਦੀ ਦੌੜ ’ਚ ਕੁਝ ਵੱਡੇ ਨਾਮ ਸ਼ਾਮਲ ਹਨ। ਆਓ ਜਾਣਦੇ ਹਾਂ ਉਨ੍ਹਾਂ ਬਾਰੇ।
ਇਨ੍ਹਾਂ ਖਿਡਾਰੀਆਂ ਵਿਚਕਾਰ ਹੈ ਕਪਤਾਨੀ ਦੀ ਦੌੜ
ਸਮ੍ਰਿਤੀ ਮੰਧਾਨਾ
ਹਰਮਨਪ੍ਰੀਤ ਕੌਰ ਦੀ ਥਾਂ ਲੈਣ ਦੀ ਦੌੜ ’ਚ ਸਭ ਤੋਂ ਅੱਗੇ ਜੋ ਨਾਮ ਹੈ, ਉਹ ਸਮ੍ਰਿਤੀ ਮੰਧਾਨਾ ਦਾ ਹੈ। ਮੰਧਾਨਾ ਟੀਮ ਦੀ ਉਪ-ਕਪਤਾਨ ਹਨ ਤੇ ਹਰਮਨਪ੍ਰੀਤ ਕੌਰ ਦੀ ਗੈਰ-ਮੌਜੂਦਗੀ ’ਚ ਕਪਤਾਨੀ ਦੀ ਜ਼ਿੰਮੇਵਾਰੀ ਵੀ ਨਿਭਾ ਚੁੱਕੀਆਂ ਹਨ। ਉਹ ਅਜਿਹੀ ਖਿਡਾਰਨ ਹਨ, ਜਿਨ੍ਹਾਂ ਕੋਲ ਸਮਾਂ ਤੇ ਪ੍ਰਤਿਭਾ ਦੋਵੇਂ ਹਨ। ਵੁਮੈਨਜ਼ ਪ੍ਰੀਮੀਅਰ ਲੀਗ ’ਚ ਉਹ ਰਾਇਲ ਚੈਲੰਜਰਜ਼ ਬੈਂਗਲੁਰੂ ਦੀ ਕਪਤਾਨੀ ਕਰ ਚੁੱਕੀਆਂ ਹਨ ਤੇ ਟੀਮ ਨੂੰ ਖਿਤਾਬ ਵੀ ਜਿਤਾ ਚੁੱਕੀਆਂ ਹਨ।
ਜੇਮਿਮਾ ਰੋਡ੍ਰਿਗਜ਼
ਮੰਧਾਨਾ ਤੋਂ ਬਾਅਦ ਜੇਕਰ ਕੋਈ ਨਾਮ ਆਉਂਦਾ ਹੈ ਤਾਂ ਉਹ ਜੇਮਿਮਾ ਰੋਡ੍ਰਿਗਜ਼ ਦਾ ਹੈ। ਸੱਜੇ ਹੱਥ ਦੀ ਇਹ ਬੱਲੇਬਾਜ਼ ਲੰਬੇ ਸਮੇਂ ਤੋਂ ਟੀਮ ਦਾ ਹਿੱਸਾ ਹਨ ਤੇ ਲੀਡਰਸ਼ਿਪ ਗਰੁੱਪ ’ਚ ਵੀ ਸ਼ਾਮਲ ਹਨ। ਉਨ੍ਹਾਂ ਕੋਲ ਦਿੱਲੀ ਕੈਪੀਟਲਜ਼ ਦੀ ਮਹਿਲਾ ਟੀਮ ਦੀ ਕਪਤਾਨੀ ਕਰਨ ਦਾ ਤਜਰਬਾ ਵੀ ਹੈ। ਅਜਿਹੇ ’ਚ ਮੰਧਾਨਾ ਤੋਂ ਇਲਾਵਾ ਟੀਮ ਕੋਲ ਜੇਮਿਮਾ ਦੇ ਰੂਪ ’ਚ ਵੀ ਇੱਕ ਮਜ਼ਬੂਤ ਵਿਕਲਪ ਹੈ।
ਰਿਚਾ ਘੋਸ਼
ਟੀਮ ਦੀ ਧਮਾਕੇਦਾਰ ਬੱਲੇਬਾਜ਼ ਤੇ ਵਿਕਟਕੀਪਰ ਰਿਚਾ ਘੋਸ਼ ਵੀ ਕਪਤਾਨੀ ਦੀ ਦੌੜ ’ਚ ਸ਼ਾਮਲ ਇੱਕ ਨਾਮ ਹਨ। ਵਿਕਟਾਂ ਦੇ ਪਿੱਛੇ ਤੋਂ ਉਨ੍ਹਾਂ ਦੀ ਖੇਡ ਦੀ ਸਮਝ ਦੀ ਹਰ ਕਿਸੇ ਨੇ ਸ਼ਲਾਘਾ ਕੀਤੀ ਹੈ। ਉਹ ਪਰਿਪੱਕ ਖਿਡਾਰਨ ਹਨ ਤੇ ਲੀਡਰਸ਼ਿਪ ਗਰੁੱਪ ਦਾ ਹਿੱਸਾ ਵੀ ਹਨ। ਰਿਚਾ ਦੇ ਰੂਪ ’ਚ ਵੀ ਟੀਮ ਮੈਨੇਜਮੈਂਟ ਕੋਲ ਇੱਕ ਵਧੀਆ ਵਿਕਲਪ ਮੌਜੂਦ ਹੈ।
ਦੀਪਤੀ ਸ਼ਰਮਾ
ਜੇਕਰ ਹਰਮਨਪ੍ਰੀਤ ਕੌਰ ਵਾਂਗ ਕਿਸੇ ਤਜਰਬੇਕਾਰ ਖਿਡਾਰਨ ਦੀ ਭਾਲ ਕੀਤੀ ਜਾਂਦੀ ਹੈ ਤਾਂ ਦੀਪਤੀ ਸ਼ਰਮਾ ਵੀ ਇੱਕ ਢੁਕਵਾਂ ਬਦਲ ਹੋ ਸਕਦੀਆਂ ਹਨ। ਉਨ੍ਹਾਂ ਨੇ ਭਾਰਤੀ ਮਹਿਲਾ ਕ੍ਰਿਕਟ ਨੂੰ ਅੱਗੇ ਵਧਦੇ ਦੇਖਿਆ ਹੈ ਤੇ ਇਸ ’ਚ ਅਹਿਮ ਯੋਗਦਾਨ ਵੀ ਦਿੱਤਾ ਹੈ। ਦੀਪਤੀ ਕੋਲ ਕਾਫ਼ੀ ਤਜਰਬਾ ਹੈ। ਉਹ ਵੁਮੈਨਜ਼ ਪ੍ਰੀਮੀਅਰ ਲੀਗ ’ਚ ਯੂਪੀ ਵਾਰਿਅਰਜ਼ ਦੀ ਕਪਤਾਨੀ ਵੀ ਕਰ ਚੁੱਕੀਆਂ ਹਨ।
ਸ਼ੇਫਾਲੀ ਵਰਮਾ
ਜੇਕਰ ਟੀਮ ਵੱਖ-ਵੱਖ ਫਾਰਮੈਟਾਂ ਲਈ ਵੱਖਰੀ ਕਪਤਾਨੀ ਬਾਰੇ ਸੋਚਦੀ ਹੈ ਤਾਂ ਸ਼ੇਫਾਲੀ ਵਰਮਾ ਟੀ20 ’ਚ ਇਹ ਜ਼ਿੰਮੇਵਾਰੀ ਸੰਭਾਲ ਸਕਦੀਆਂ ਹਨ। ਉਹ ਲਗਭਗ ਪੰਜ ਸਾਲ ਤੋਂ ਟੀਮ ਦਾ ਹਿੱਸਾ ਹਨ ਤੇ ਆਪਣੀ ਬੱਲੇਬਾਜ਼ੀ ਨਾਲ ਕਮਾਲ ਦਿਖਾ ਚੁੱਕੀਆਂ ਹਨ। ਘਰੇਲੂ ਕ੍ਰਿਕਟ ’ਚ ਉਨ੍ਹਾਂ ਕੋਲ ਕਪਤਾਨੀ ਦਾ ਤਜਰਬਾ ਵੀ ਹੈ।
