06 ਅਕਤੂਬਰ 2026 (ਪੰਜਾਬੀ ਖਬਰਨਾਮਾ ਬਿਊਰੋ) : ਇਜ਼ਰਾਈਲ ਦੀ ਸੁਰੱਖਿਆ ਏਜੰਸੀ ‘ਸ਼ਿਨ ਬੇਤ’ ਨੇ ਪੁੱਛਗਿੱਛ ਕਰਨ ਵਾਲਿਆਂ ਨੂੰ ਸੰਯੁਕਤ ਅਰਬ ਅਮੀਰਾਤ (UAE) ਭੇਜਿਆ ਹੈ। ਉਹ ਫ਼ਲਾਈਦੁਬਈ ਦੇ ਕੋ-ਪਾਇਲਟ ਹਮਾਮ ਅਲ-ਹੰਮਾਮੀ ਤੋਂ ਪੁੱਛਗਿੱਛ ’ਚ ਸ਼ਾਮਲ ਹੋਣਗੇ, ਜਿਸ ‘ਤੇ ਪਿਛਲੇ ਹਫ਼ਤੇ ਫ਼ਲਾਈਟ ’ਚ ਅੱਤਵਾਦੀ ਹਮਲਾ ਕਰਨ ਦੀ ਕੋਸ਼ਿਸ਼ ਦਾ ਦੋਸ਼ ਹੈ।
‘ਟਾਈਮਜ਼ ਆਫ਼ ਇਜ਼ਰਾਈਲ’ ਦੀ ਰਿਪੋਰਟ ’ਚ ਜਾਂਚ ਨਾਲ ਜੁੜੇ ਦੋ ਇਜ਼ਰਾਈਲੀ ਅਧਿਕਾਰੀਆਂ ਦੇ ਹਵਾਲੇ ਨਾਲ ਦੱਸਿਆ ਗਿਆ ਕਿ ਅਲ-ਹੰਮਾਮੀ ਨੇ ਯੂਏਈ ਦੇ ਪੁੱਛਗਿੱਛ ਕਰਨ ਵਾਲਿਆਂ ਨੂੰ ਦੱਸਿਆ ਕਿ ਉਸਨੇ ਦੁਬਈ ਦੀ ਕੰਪਨੀ ਫ਼ਲਾਈਦੁਬਈ ’ਚ ਨੌਕਰੀ ਪਾਉਣ ਤੋਂ ਪਹਿਲਾਂ ਹੀ ‘ਬੇਨ ਗੁਰੀਅਨ ਏਅਰਪੋਰਟ’ ‘ਤੇ ਫ਼ਲਾਈਟ ਨੂੰ ਕ੍ਰੈਸ਼ ਕਰਨ ਦੀ ਯੋਜਨਾ ਬਣਾ ਲਈ ਸੀ।
ਗਾਜ਼ਾ ਦਾ ਬਦਲਾ ਲੈਣਾ ਚਾਹੁੰਦਾ ਸੀ ਹੰਮਾਮੀ
ਚੈਨਲ 12 ਨੇ ਵੀ ਦੋ ਇਜ਼ਰਾਈਲੀ ਅਧਿਕਾਰੀਆਂ ਦਾ ਹਵਾਲਾ ਦਿੰਦੇ ਹੋਏ ਦੱਸਿਆ ਕਿ ਅਲ-ਹੰਮਾਮੀ ਨੇ ਕਿਹਾ ਕਿ ਉਹ ਗਾਜ਼ਾ ਦਾ ਬਦਲਾ ਲੈਣ ਲਈ ਅਜਿਹਾ ਕਰ ਰਿਹਾ ਸੀ ਅਤੇ ਸ਼ਹੀਦ ਹੋ ਕੇ ਮਰਨਾ ਚਾਹੁੰਦਾ ਸੀ। ਯੂਏਈ ਦੀ ਜਾਂਚ ਦੀ ਜਾਣਕਾਰੀ ਰੱਖਣ ਵਾਲੇ ਇੱਕ ਸੂਤਰ ਨੇ ਦੱਸਿਆ ਕਿ ਅਲ-ਹੰਮਾਮੀ ਨੇ ਇਸ ਸਾਲ ਦੇ ਸ਼ੁਰੂ ਵਿੱਚ ਤੇਲ ਅਵੀਵ ਲਈ ਇੱਕ ਉਡਾਣ ਭਰੀ ਸੀ ਅਤੇ ਉਸ ਜਹਾਜ਼ ਨੂੰ ਹਾਈਜੈਕ ਕਰਕੇ ਕ੍ਰੈਸ਼ ਕਰਨ ਬਾਰੇ ਸੋਚਿਆ ਸੀ, ਪਰ ਉਹ ਅਜਿਹਾ ਕਰ ਨਹੀਂ ਸਕਿਆ।
ਜਾਣਕਾਰੀ ਜੁਟਾਉਣ ਤੋਂ ਬਾਅਦ ਫ਼ਲਾਈਦੁਬਈ ’ਚ ਨੌਕਰੀ ਲਈ ਕੀਤਾ ਅਪਲਾਈ
ਚੈਨਲ 12 ਨੇ ਦੋ ਸੂਤਰਾਂ ਦਾ ਹਵਾਲਾ ਦਿੰਦੇ ਹੋਏ ਦੱਸਿਆ ਕਿ ਮੋਸਾਦ ਦੇ ਇੱਕ ਅਧਿਕਾਰੀ ਨੇ ਐਤਵਾਰ ਨੂੰ ਇਜ਼ਰਾਈਲੀ ਕੈਬਿਨੇਟ ਮੰਤਰੀਆਂ ਨੂੰ ਦੱਸਿਆ ਕਿ ਅਲ-ਹੰਮਾਮੀ ਨੇ ਹਾਲ ਹੀ ਦੇ ਸਾਲਾਂ ਵਿੱਚ ਇਜ਼ਰਾਈਲ ਦੇ ਵਿਰੋਧੀ ਕਈ ਦੇਸ਼ਾਂ ਦੀਆਂ ਛੋਟੀਆਂ-ਛੋਟੀਆਂ ਯਾਤਰਾਆਂ ਕੀਤੀਆਂ ਸਨ। ਉਸਨੇ ਤੇਲ ਅਵੀਵ ਲਈ ਉਡਾਣ ਭਰਨ ਵਾਲੀਆਂ ਏਅਰਲਾਈਨਜ਼ ਬਾਰੇ ਪਤਾ ਕਰਨ ਤੋਂ ਬਾਅਦ ਫ਼ਲਾਈਦੁਬਈ ਵਿੱਚ ਨੌਕਰੀ ਲਈ ਅਪਲਾਈ ਕੀਤਾ ਸੀ।
ਯੂਏਈ ਦੇ ਪ੍ਰੌਸੀਕਿਊਟਰ ਜਨਰਲ ਨੇ ਇਸ ਘਟਨਾ ਨੂੰ ਅੱਤਵਾਦੀ ਹਮਲਾ ਦੱਸਿਆ ਹੈ। ਇਟਲੀ ਦੇ ਅਖ਼ਬਾਰ ‘ਕੋਰੀਏਰੇ ਡੇਲਾ ਸੇਰਾ’ ਦੀ ਰਿਪੋਰਟ ਅਨੁਸਾਰ, ਕੈਪਟਨ ਸਮਿਤ ‘ਤੇ ਹਮਲਾ ਕਰਨ ਤੋਂ ਕੁਝ ਦੇਰ ਪਹਿਲਾਂ ਹੀ ਅਲ-ਹੰਮਾਮੀ ਨੇ ਨਮਾਜ਼ ਲਈ ਬ੍ਰੇਕ ਮੰਗੀ ਸੀ।
