ਨਵੀਂ ਦਿੱਲੀ 16 ਸਤੰਬਰ 2026 (ਪੰਜਾਬੀ ਖਬਰਨਾਮਾ ਬਿਊਰੋ) : ਜ਼ਮੀਨ ਦੇ ਟੁਕੜੇ ‘ਤੇ ਲਗਾਈ ਗਈ ਬਿਜਲੀ ਵਾਲੀ ਵਾੜ ਦੇ ਸੰਪਰਕ ‘ਚ ਆਉਣ ਨਾਲ 12 ਸਾਲ ਦੇ ਬੱਚੇ ਦੀ ਮੌਤ ਦੇ ਮਾਮਲੇ ‘ਚ ਦਿੱਲੀ ਹਾਈ ਕੋਰਟ ਨੇ ਇੱਕ ਵਿਅਕਤੀ ਨੂੰ ਜ਼ਮਾਨਤ ਦੇਣ ਤੋਂ ਇਨਕਾਰ ਕਰ ਦਿੱਤਾ।
ਜ਼ਮਾਨਤ ਪਟੀਸ਼ਨ ਖ਼ਾਰਜ ਕਰਦਿਆਂ ਜਸਟਿਸ ਗਿਰੀਸ਼ ਕਥਪਾਲੀਆ ਦੀ ਬੈਂਚ ਨੇ ਕਿਹਾ ਕਿ ਬਿਜਲੀ ਅਧਿਕਾਰੀਆਂ ਤੋਂ ਮਨਜ਼ੂਰੀ ਲਏ ਬਿਨਾਂ ਵਾੜ ‘ਚ ਬਿਜਲੀ ਦਾ ਕਨੈਕਸ਼ਨ ਦਿੱਤਾ ਗਿਆ ਸੀ।
ਬਿਨਾਂ ਮਨਜ਼ੂਰੀ ਵਾੜ ‘ਚ ਦਿੱਤਾ ਬਿਜਲੀ ਕਨੈਕਸ਼ਨ
ਬੈਂਚ ਨੇ ਕਿਹਾ ਕਿ ਬਿਜਲੀ ਵਾਲੀ ਵਾੜ ਲਗਾਉਣਾ ਬੇਹੱਦ ਖ਼ਤਰਨਾਕ ਕੰਮ ਸੀ। ਦੋਸ਼ੀ ਇਹ ਕਹਿ ਕੇ ਜ਼ਿੰਮੇਵਾਰੀ ਤੋਂ ਭੱਜ ਨਹੀਂ ਸਕਦਾ ਕਿ ਉਸ ਨੂੰ ਪਤਾ ਨਹੀਂ ਸੀ ਕਿ ਵਾੜ ਦੇ ਸੰਪਰਕ ‘ਚ ਆਉਣ ਨਾਲ ਕਿਸੇ ਵਿਅਕਤੀ ਦੀ ਮੌਤ ਹੋ ਸਕਦੀ ਹੈ।
ਕਰਨ ਸਿੰਘ ‘ਤੇ ਗ਼ੈਰ-ਕਾਨੂੰਨੀ ਵਾੜ ਦਾ ਦੋਸ਼
ਪ੍ਰੋਸੀਕਿਊਸ਼ਨ (ਸਰਕਾਰੀ ਪੱਖ) ਨੇ ਜ਼ਮਾਨਤ ਪਟੀਸ਼ਨ ਦਾ ਵਿਰੋਧ ਕੀਤਾ। ਉਨ੍ਹਾਂ ਦਾ ਕਹਿਣਾ ਸੀ ਕਿ ਦੋਸ਼ੀ ਕਰਨ ਸਿੰਘ ਨੇ ਜ਼ਮੀਨ ‘ਤੇ ਗ਼ੈਰ-ਕਾਨੂੰਨੀ ਤਰੀਕੇ ਨਾਲ ਬਿਜਲੀ ਵਾਲੀ ਵਾੜ ਲਗਾਈ ਸੀ। ਸਰਕਾਰੀ ਪੱਖ ਮੁਤਾਬਕ, ਵਾੜ ‘ਚ 220 ਤੋਂ 225 ਵੋਲਟ ਦਾ ਕਰੰਟ ਸੀ।
ਕਰੰਟ ਦੀ ਲਪੇਟ ‘ਚ ਆਇਆ ਸੀ ਬੱਚਾ
ਜਾਣਕਾਰੀ ਮੁਤਾਬਕ, ਜ਼ਮੀਨ ‘ਤੇ ਲਗਾਈ ਗਈ ਬਿਜਲੀ ਵਾਲੀ ਵਾੜ ਦੇ ਸੰਪਰਕ ‘ਚ ਆਉਣ ਤੋਂ ਬਾਅਦ 12 ਸਾਲਾ ਬੱਚੇ ਦੀ ਮੌਤ ਹੋ ਗਈ ਸੀ। ਇਸੇ ਮਾਮਲੇ ‘ਚ ਦੋਸ਼ੀ ਨੇ ਜ਼ਮਾਨਤ ਲਈ ਹਾਈ ਕੋਰਟ ਦਾ ਰੁਖ਼ ਕੀਤਾ ਸੀ, ਜਿਸ ਨੂੰ ਬੈਂਚ ਨੇ ਖ਼ਾਰਜ ਕਰ ਦਿੱਤਾ।
