ਨਵੀਂ ਦਿੱਲੀ 12 ਮਈ 2026 (ਪੰਜਾਬੀ ਖਬਰਨਾਮਾ ਬਿਊਰੋ) : ਕੇਂਦਰ ਸਰਕਾਰ ਜਲਦੀ ਹੀ ‘ਮੇਡ ਇਨ ਇੰਡੀਆ’ ਬ੍ਰਾਂਡਿੰਗ ਸਕੀਮ ਲਾਂਚ ਕਰਨ ਦੀ ਤਿਆਰੀ ‘ਚ ਹੈ। ਇਸ ਦੀ ਤਿਆਰੀ ਜ਼ੋਰਾਂ ‘ਤੇ ਹੈ। ਇਸ ਬ੍ਰਾਂਡਿੰਗ ਸਕੀਮ ਨੂੰ ਲਾਂਚ ਕਰਨ ਦਾ ਮਕਸਦ ਗਲੋਬਲ ਪੱਧਰ ‘ਤੇ ਭਾਰਤ ਦੇ ਉਤਪਾਦਾਂ ਨੂੰ ਇਕ ਨਵੀਂ ਪਛਾਣ ਦੇਣਾ ਹੈ। ਇਸ ਯੋਜਨਾ ਦਾ ਕੀ ਅਤੇ ਕਿਹੋ ਜਿਹਾ ਅਸਰ ਹੋ ਸਕਦਾ ਹੈ, ਇਸ ਨੂੰ ਦੇਖਣ ਲਈ ਸਟੀਲ ਸੈਕਟਰ ‘ਚ ਇਸ ਨੂੰ ਪਾਇਲਟ ਪ੍ਰੋਜੈਕਟ ਵਜੋਂ ਚਲਾਇਆ ਗਿਆ ਸੀ। ਇਸ ਦਾ ਹੁੰਗਾਰਾ ਬਹੁਤ ਵਧੀਆ ਮਿਲਿਆ ਹੈ। ਅਜਿਹੇ ‘ਚ ਹੁਣ ਇਸ ਪਹਿਲ ਨੂੰ ਅੱਗੇ ਵਧਾਇਆ ਜਾ ਸਕਦਾ ਹੈ।
‘ਮੇਡ ਇਨ ਇੰਡੀਆ’ ਬ੍ਰਾਂਡਿੰਗ ਦਾ ਫਰੇਮਵਰਕ ਉਦਯੋਗ ਅਤੇ ਅੰਦਰੂਨੀ ਵਪਾਰ ਪ੍ਰੋਤਸਾਹਨ ਵਿਭਾਗ (DPIIT) ਨੇ ਲਗਪਗ ਤਿਆਰ ਕਰ ਲਿਆ ਹੈ। ਵੱਖ-ਵੱਖ ਉਦਯੋਗਾਂ ਨਾਲ ਸਲਾਹ-ਮਸ਼ਵਰੇ ਤੋਂ ਬਾਅਦ ਇਸ ਨੂੰ ਸ਼ੁਰੂ ਕੀਤੇ ਜਾਣ ਦੀ ਉਮੀਦ ਹੈ। ਡੀਪੀਆਈਆਈਟੀ (DPIIT) ਦੇ ਸਕੱਤਰ ਅਮਰਦੀਪ ਸਿੰਘ ਭਾਟੀਆ ਨੇ ਕਿਹਾ ਕਿ ਜਲਦੀ ਹੀ ਇਸ ਨੂੰ ਲਾਂਚ ਕੀਤਾ ਜਾ ਸਕਦਾ ਹੈ।
ਸਕੱਤਰ ਨੇ ਦਿੱਤੀ ਜਾਣਕਾਰੀ
ਡੀਪੀਆਈਆਈਟੀ ਦੇ ਸੈਕਟਰੀ ਅਮਰਦੀਪ ਸਿੰਘ ਭਾਟੀਆ ਨੇ ਕਿਹਾ, “Made in India ਬ੍ਰਾਂਡ ਸਕੀਮ ਕਾਫ਼ੀ ਸਮੇਂ ਤੋਂ ਤਿਆਰ ਸੀ ਤੇ ਆਖਰਕਾਰ ਇਸ ਨੂੰ ਲਾਂਚ ਕੀਤਾ ਜਾ ਰਿਹਾ ਹੈ। ਅਸੀਂ ਸਟੀਲ ਸੈਕਟਰ ਦੇ ਨਾਲ ਇੱਕ ਪਾਇਲਟ ਰਨ ਕੀਤਾ ਸੀ, ਜੋ ਕਿ ਕਾਫ਼ੀ ਉਤਸ਼ਾਹਜਨਕ ਰਿਹਾ ਹੈ। ਅਸੀਂ ਇੰਡਸਟਰੀ ਦੇ ਨਾਲ ਹੋਰ ਚਰਚਾ ਕਰਾਂਗੇ ਕਿ ਕਿਹੜੇ-ਕਿਹੜੇ ਸੈਕਟਰਾਂ ਵਿੱਚ ਅਸੀਂ ਇਸ ਨੂੰ ਲਾਗੂ ਕਰ ਸਕਦੇ ਹਾਂ, ਪਰ ਇਸ ਦਾ ਫਰੇਮਵਰਕ ਤਿਆਰ ਹੈ।”
ਕਿਹੜੇ ਖੇਤਰਾਂ ‘ਚ ਲਾਗੂ ਹੋਵੇਗੀ Made in India ਬ੍ਰਾਂਡ ਸਕੀਮ?
ਕਾਨਫੈਡਰੇਸ਼ਨ ਆਫ ਇੰਡੀਅਨ ਇੰਡਸਟਰੀ (CII) ਦੇ ਸੰਮੇਲਨ ‘ਚ ਬੋਲਦਿਆਂ ਭਾਟੀਆ ਨੇ ਕਿਹਾ ਕਿ ਉਦਯੋਗਿਕ ਪ੍ਰਤੀਨਿਧੀਆਂ ਨਾਲ ਚਰਚਾ ਰਾਹੀਂ ਉਨ੍ਹਾਂ ਖੇਤਰਾਂ ਦੀ ਪਛਾਣ ਕਰਨ ਵਿੱਚ ਮਦਦ ਮਿਲੇਗੀ ਜਿਨ੍ਹਾਂ ਨੂੰ ਬ੍ਰਾਂਡਿੰਗ ਮੁਹਿੰਮ ਦੇ ਤਹਿਤ ਲਿਆਂਦਾ ਜਾ ਸਕਦਾ ਹੈ।
ਸਕੱਤਰ ਅਮਰਦੀਪ ਸਿੰਘ ਭਾਟੀਆ ਨੇ ਦੱਸਿਆ ਕਿ ਸਰਕਾਰ ਨੇ ਉਨ੍ਹਾਂ ਉਤਪਾਦਾਂ ਦੀ ਵੀ ਪਛਾਣ ਕੀਤੀ ਹੈ ਜੋ ਜਾਂ ਤਾਂ ਭਾਰਤ ਵਿੱਚ ਨਹੀਂ ਬਣਦੇ ਜਾਂ ਫਿਰ ਲੋੜੀਂਦੀ ਮਾਤਰਾ ਵਿੱਚ ਪੈਦਾ ਨਹੀਂ ਹੁੰਦੇ। ਇਨ੍ਹਾਂ ਵਿੱਚ ਆਟੋਮੋਬਾਈਲ ਅਤੇ ਮੋਟਰਸਾਈਕਲ ਨਿਰਮਾਣ ਵਿੱਚ ਵਰਤੇ ਜਾਣ ਵਾਲੇ ਅਜਿਹੇ ਪੁਰਜ਼ੇ ਸ਼ਾਮਲ ਹਨ, ਜਿੱਥੇ ਅਜੇ ਵੀ ਤਕਨੀਕੀ ਕਮੀਆਂ ਮੌਜੂਦ ਹਨ।
ਭਾਰਤ ‘ਚ ਮੈਨੂਫੈਕਚਰਿੰਗ ਨੂੰ ਪ੍ਰਤੀਯੋਗੀ ਬਣਾਉਣ ਲਈ ਸਰਕਾਰ ਵੱਲੋਂ ਚੁੱਕੇ ਗਏ ਕਦਮਾਂ ਬਾਰੇ ਗੱਲ ਕਰਦਿਆਂ ਉਨ੍ਹਾਂ ਕਿਹਾ, “ਇੱਕ ਹੋਰ ਖੇਤਰ ਜਿਸ ‘ਤੇ ਅਸੀਂ ਕੰਮ ਕਰ ਰਹੇ ਹਾਂ, ਉਹ ਹੈ 100 ਹੋਰ ਉਤਪਾਦਾਂ ਨੂੰ ਲਿਆਉਣਾ, ਜਿਨ੍ਹਾਂ ਦਾ ਨਿਰਮਾਣ ਜਾਂ ਤਾਂ ਅਜੇ ਭਾਰਤ ਵਿੱਚ ਨਹੀਂ ਹੋ ਰਿਹਾ, ਜਾਂ ਫਿਰ ਜਿਨ੍ਹਾਂ ਦਾ ਨਿਰਮਾਣ ਇਸ ਸਮੇਂ ਲੋੜੀਂਦੀ ਮਾਤਰਾ ਵਿੱਚ ਨਹੀਂ ਹੋ ਰਿਹਾ।”
ਅਧਿਕਾਰੀਆਂ ਅਨੁਸਾਰ, ਕੇਂਦਰ ਸਰਕਾਰ ਵਿਚਕਾਰਲੇ ਵਸਤੂਆਂ (Intermediate Goods) ਦੇ ਉਤਪਾਦਨ ਨੂੰ ਵਧਾਉਣ ਅਤੇ MSME ਦੀ ਸਮਰੱਥਾ ਵਧਾਉਣ ਵਿੱਚ ਮਦਦ ਕਰਨ ‘ਤੇ ਵੀ ਧਿਆਨ ਕੇਂਦਰਿਤ ਕਰ ਰਹੀ ਹੈ।
