ਨਵੀਂ ਦਿੱਲੀ, 02 ਜਨਵਰੀ 2025 (ਪੰਜਾਬੀ ਖਬਰਨਾਮਾ ਬਿਊਰੋ):- ਸ਼ੁੱਕਰਵਾਰ ਨੂੰ ਘਰੇਲੂ ਸ਼ੇਅਰ ਬਾਜ਼ਾਰ ‘ਚ ਜ਼ਬਰਦਸਤ ਤੇਜ਼ੀ ਦੇਖਣ ਨੂੰ ਮਿਲੀ। ਸਕਾਰਾਤਮਕ ਗਲੋਬਲ ਸੰਕੇਤਾਂ ਤੇ ਵੱਡੇ ਸ਼ੇਅਰਾਂ ‘ਚ ਖਰੀਦਦਾਰੀ ਕਾਰਨ ਸੈਂਸੈਕਸ ਤੇ ਨਿਫਟੀ ਦੋਵੇਂ ਹੀ ਅੱਧੇ ਫੀਸਦ ਤੋਂ ਵੱਧ ਦੇ ਵਾਧੇ ਨਾਲ ਕਾਰੋਬਾਰ ਕਰਦੇ ਨਜ਼ਰ ਆਏ। ਨਿਫਟੀ ਨੇ ਅੱਜ ਆਪਣਾ ਨਵਾਂ ਆਲ-ਟਾਈਮ ਹਾਈ (All Time High) ਬਣਾਇਆ। ਇਹ 182.00 ਅੰਕ ਜਾਂ 0.70% ਦੀ ਤੇਜ਼ੀ ਨਾਲ 26,328.55 ‘ਤੇ ਬੰਦ ਹੋਇਆ। ਉੱਥੇ ਹੀ ਸੈਂਸੈਕਸ 573.41 ਅੰਕ ਉਛਲ ਕੇ 85,762.01 ‘ਤੇ ਬੰਦ ਹੋਇਆ। ਨਿਫਟੀ ਦਾ ਪਿਛਲਾ ਆਲ-ਟਾਈਮ ਹਾਈ 26,326 ਸੀ।
ਨਿਫਟੀ-50 ਪੈਕ ਟਚ ਹਿੰਡਾਲਕੋ ਇੰਡਸਟਰੀਜ਼, ਕੋਲ ਇੰਡੀਆ ਤੇ ਭਾਰਤ ਇਲੈਕਟ੍ਰੋਨਿਕਸ ਸਭ ਤੋਂ ਵੱਧ ਵਾਧੇ ਵਾਲੇ ਸ਼ੇਅਰ ਰਹੇ, ਜਿਨ੍ਹਾਂ ਵਿਚ ਕਰੀਬ 2 ਪ੍ਰਤੀਸ਼ਤ ਤਕ ਦੀ ਤੇਜ਼ੀ ਆਈ। ਦੂਜੇ ਪਾਸੇ, ਆਈਟੀਸੀ (ITC) ਅਤੇ ਬਜਾਜ ਆਟੋ ‘ਚ ਕਮਜ਼ੋਰੀ ਦੇਖੀ ਗਈ ਤੇ ਇਹ ਸ਼ੇਅਰ 4 ਪ੍ਰਤੀਸ਼ਤ ਤਕ ਟੁੱਟੇ।
ਦਸੰਬਰ ਤਿਮਾਹੀ ਦੇ ਸਕਾਰਾਤਮਕ ਕਾਰੋਬਾਰੀ ਅਪਡੇਟਸ ਤੋਂ ਬਾਅਦ ਸ਼ੁੱਕਰਵਾਰ ਨੂੰ ਬੈਂਕ ਸ਼ੇਅਰਾਂ ‘ਚ ਜ਼ੋਰਦਾਰ ਖਰੀਦਦਾਰੀ ਦੇਖਣ ਨੂੰ ਮਿਲੀ, ਜਿਸ ਨਾਲ ਬੈਂਕ ਨਿਫਟੀ ਇੰਡੈਕਸ ਇਕ ਨਵੇਂ ਰਿਕਾਰਡ ਪੱਧਰ ‘ਤੇ ਪਹੁੰਚ ਗਿਆ। ਬੈਂਕ ਨਿਫਟੀ 0.73 ਫੀਸਦੀ ਵਧ ਕੇ 60,152.35 ਦੇ ਆਲ ਟਾਈਮ ਹਾਈ ‘ਤੇ ਪਹੁੰਚ ਗਿਆ, ਜਿਸ ਨੇ 1 ਦਸੰਬਰ, 2025 ਨੂੰ ਦਰਜ ਕੀਤੇ ਗਏ ਆਪਣੇ ਪਿਛਲੇ ਸਿਖਰ 60,114.30 ਨੂੰ ਪਾਰ ਕਰ ਲਿਆ ਹੈ।
ਨਿਫਟੀ ਪੀਐੱਸਯੂ (PSU) ਬੈਂਕ ਇੰਡੈਕਸ ‘ਚ 1.08 ਪ੍ਰਤੀਸ਼ਤ ਦਾ ਵਾਧਾ ਦਰਜ ਕੀਤਾ ਗਿਆ ਜਦੋਂਕਿ ਨਿਫਟੀ ਪ੍ਰਾਈਵੇਟ ਬੈਂਕ ਇੰਡੈਕਸ ‘ਚ 0.56 ਪ੍ਰਤੀਸ਼ਤ ਦਾ ਵਾਧਾ ਹੋਇਆ। ਦੋਵਾਂ ਇੰਡੈਕਸਾਂ ਨੇ ਕਾਰੋਬਾਰੀ ਸੈਸ਼ਨ ਦੌਰਾਨ ਆਪਣੇ ਜੀਵਨਕਾਲ ਦੇ ਨਵੇਂ ਉੱਚ ਪੱਧਰਾਂ ਨੂੰ ਛੋਹਿਆ।
ਬੈਂਕ ਨਿਫਟੀ ‘ਚ ਸਭ ਤੋਂ ਵੱਧ ਭੱਜਣ ਵਾਲੇ ਸ਼ੇਅਰ
ਯੈੱਸ ਬੈਂਕ (Yes Bank), ਬੈਂਕ ਨਿਫਟੀ ‘ਚ ਸਭ ਤੋਂ ਵੱਧ ਲਾਭ ਕਮਾਉਣ ਵਾਲਾ ਸ਼ੇਅਰ ਰਿਹਾ, ਜਿਸ ਦੇ ਸ਼ੇਅਰ NSE ‘ਤੇ 3 ਪ੍ਰਤੀਸ਼ਤ ਤੋਂ ਵੱਧ ਵਧ ਕੇ 22.15 ਰੁਪਏ ‘ਤੇ ਪਹੁੰਚ ਗਏ। ਯੂਨੀਅਨ ਬੈਂਕ ਆਫ ਇੰਡੀਆ ਤੇ ਇੰਡਸਇੰਡ ਬੈਂਕ ਦੇ ਸ਼ੇਅਰਾਂ ‘ਚ ਲੜੀਵਾਰ 2.09 ਪ੍ਰਤੀਸ਼ਤ ਅਤੇ 1.39 ਪ੍ਰਤੀਸ਼ਤ ਦਾ ਵਾਧਾ ਦਰਜ ਕੀਤਾ ਗਿਆ। ਪੰਜਾਬ ਨੈਸ਼ਨਲ ਬੈਂਕ (PNB), ICICI ਬੈਂਕ ਅਤੇ ਬੈਂਕ ਆਫ਼ ਬੜੌਦਾ ਵੀ ਲਾਭ ਵਾਲੇ ਸ਼ੇਅਰਾਂ ਵਿੱਚ ਸ਼ਾਮਲ ਸਨ।
ਬਾਜ਼ਾਰ ‘ਚ ਤੇਜ਼ੀ ਦੇ 5 ਪ੍ਰਮੁੱਖ ਕਾਰਨ
1. ਆਲਮੀ ਬਾਜ਼ਾਰਾਂ ਤੋਂ ਮਿਲੇ ਮਜ਼ਬੂਤ ਸੰਕੇਤ
ਏਸ਼ਿਆਈ ਬਾਜ਼ਾਰਾਂ ‘ਚ ਦੱਖਣੀ ਕੋਰੀਆ ਦਾ ਕੋਸਪੀ, ਚੀਨ ਦਾ ਸ਼ੰਘਾਈ ਕੰਪੋਜ਼ਿਟ ਤੇ ਹਾਂਗਕਾਂਗ ਦਾ ਹੈਂਗ ਸੈਂਗ ਵਾਧੇ ਨਾਲ ਕਾਰੋਬਾਰ ਕਰ ਰਹੇ ਸਨ। ਅਮਰੀਕੀ ਵਾਅਦਾ ਬਾਜ਼ਾਰ (US Futures) ਵੀ 0.7% ਤਕ ਵਧੇ ਹੋਏ ਸਨ।
2. ਵੱਡੇ ਸ਼ੇਅਰਾਂ ‘ਚ ਖਰੀਦਦਾਰੀ
ਲਾਰਜ-ਕੈਪ ਸ਼ੇਅਰਾਂ ‘ਚ ਨਿਵੇਸ਼ਕਾਂ ਦੀ ਖਰੀਦਦਾਰੀ ਜਾਰੀ ਰਹੀ। ਰਿਲਾਇੰਸ ਇੰਡਸਟਰੀਜ਼ ਦਾ ਸ਼ੇਅਰ ਕਰੀਬ 1 ਪ੍ਰਤੀਸ਼ਤ ਚੜ੍ਹਿਆ, ਜਿਸ ਨੇ ਬਾਜ਼ਾਰ ਨੂੰ ਮਜ਼ਬੂਤੀ ਦਿੱਤੀ।
3. ਦਸੰਬਰ ਤਿਮਾਹੀ ਦੇ ਨਤੀਜਿਆਂ ਨੂੰ ਲੈ ਕੇ ਉਮੀਦਾਂ
ਇਕਨੌਮਿਕਸ ਰਿਸਰਚ ਦੇ ਫਾਊਂਡਰ ਤੇ ਰਿਸਰਚ ਹੈੱਡ ਜੀ ਚੋਕਲਿੰਗਮ ਨੇ ਰਾਇਟਰਜ਼ ਨੂੰ ਕਿਹਾ ਕਿ ਆਟੋ ਕੰਪਨੀਆਂ ਦੀ ਮਾਸਿਕ ਵਿਕਰੀ ਦੇ ਅੰਕੜੇ ਤੇ ਹੋਰ ਸੈਕਟਰਾਂ ਦੇ ਬਿਜ਼ਨੈੱਸ ਅਪਡੇਟ ਦਸੰਬਰ ਤਿਮਾਹੀ ਵਿੱਚ ਚੰਗੀ ਕਮਾਈ ਦੇ ਸੰਕੇਤ ਦੇ ਰਹੇ ਹਨ।
4. ਰੁਪਏ ‘ਚ ਮਜ਼ਬੂਤੀ
ਡਾਲਰ ਦੇ ਮੁਕਾਬਲੇ ਰੁਪਿਆ 6 ਪੈਸੇ ਮਜ਼ਬੂਤ ਹੋ ਕੇ 89.92 ‘ਤੇ ਪਹੁੰਚ ਗਿਆ। ਆਰ.ਬੀ.ਆਈ. (RBI) ਵੱਲੋਂ 90 ਦੇ ਪੱਧਰ ਨੂੰ ਬਚਾ ਕੇ ਰੱਖਣ ਦੀ ਕੋਸ਼ਿਸ਼ ਕੀਤੀ ਜਾ ਰਹੀ ਹੈ।
5. ਆਟੋ ਸ਼ੇਅਰਾਂ ‘ਚ ਲਗਾਤਾਰ ਖਰੀਦਦਾਰੀ
ਦਸੰਬਰ ਮਹੀਨੇ ਦੇ ਵਿਕਰੀ ਅੰਕੜੇ ਜਾਰੀ ਹੋਣ ਤੋਂ ਬਾਅਦ ਨਿਫਟੀ ਆਟੋ ਇੰਡੈਕਸ ਕਰੀਬ 1% ਚੜ੍ਹਿਆ ਤੇ ਲਗਾਤਾਰ ਚੌਥੇ ਦਿਨ ਵਾਧਾ ਦਰਜ ਕੀਤਾ।
