ਚੰਡੀਗੜ੍ਹ, 3 ਜਨਵਰੀ, 2025 (ਪੰਜਾਬੀ ਖਬਰਨਾਮਾ ਬਿਊਰੋ ):- ਸਾਲ 2025 ਦਾ ਬਾਕਸ ਆਫਿਸ ਧਮਾਕੇ ਨਾਲ ਸ਼ੁਰੂ ਹੋਣ ਜਾ ਰਿਹਾ ਹੈ, ਕਿਉਂਕਿ ਇਸ ਸਾਲ ਦੇ ਪਹਿਲੇ ਮਹੀਨੇ ਗਲੋਬਲ ਸਟਾਰ ਬਣ ਚੁੱਕੇ ਰਾਮ ਚਰਨ ਆਪਣੀ ਨਵੀਂ ਫਿਲਮ ਨਾਲ ਦਰਸ਼ਕਾਂ ਦੇ ਵਿਚਕਾਰ ਆ ਰਹੇ ਹਨ। ਸਾਊਥ ਦੇ ਸੁਪਰਸਟਾਰ ਰਾਮ ਚਰਨ ਆਪਣੀ ਫਿਲਮ ‘ਗੇਮ ਚੇਂਜਰ’ ਨੂੰ ਲੈ ਕੇ ਕਾਫੀ ਸਮੇਂ ਤੋਂ ਸੁਰਖ਼ੀਆਂ ‘ਚ ਸਨ। ਇਸ ਫਿਲਮ ‘ਚ ਉਨ੍ਹਾਂ ਨਾਲ ਕਿਆਰਾ ਅਡਵਾਨੀ ਮੁੱਖ ਭੂਮਿਕਾ ‘ਚ ਨਜ਼ਰ ਆਵੇਗੀ।
ਆਰਆਰਆਰ ਤੋਂ ਬਾਅਦ ਅੱਲੂ ਅਰਜੁਨ ਦੀ ਇਹ ਫਿਲਮ ਪੂਰੇ ਭਾਰਤ ਵਿੱਚ ਰਿਲੀਜ਼ ਹੋ ਰਹੀ ਹੈ। ਕੱਲ੍ਹ ਤੇਲਗੂ ਤੋਂ ਬਾਅਦ ਹੁਣ ਹਿੰਦੀ ਦਰਸ਼ਕਾਂ ਲਈ ਡੱਬ ਕੀਤਾ ਟ੍ਰੇਲਰ ਵੀ ਰਿਲੀਜ਼ ਕੀਤਾ ਗਿਆ, ਜਿਸ ਨੂੰ 17 ਘੰਟਿਆਂ ਵਿੱਚ 13 ਕਰੋੜ ਤੋਂ ਵੱਧ ਵਿਊਜ਼ ਮਿਲ ਚੁੱਕੇ ਹਨ। ਫਿਲਮ ਨੂੰ ਕਿੰਨਾ ਪਿਆਰ ਮਿਲੇਗਾ ਇਹ ਤਾਂ ਰਿਲੀਜ਼ ਹੋਣ ਤੋਂ ਬਾਅਦ ਹੀ ਪਤਾ ਲੱਗੇਗਾ ਪਰ ਨਿਰਮਾਤਾਵਾਂ ਨੇ ਇਸ ਨੂੰ ਦਰਸ਼ਕਾਂ ਲਈ ਵਿਜ਼ੂਅਲ ਟ੍ਰੀਟ ਬਣਾਉਣ ਲਈ ਫਿਲਮ ‘ਤੇ ਕਾਫੀ ਪੈਸਾ ਖ਼ਰਚ ਕੀਤਾ ਹੈ। ਮੇਕਰਸ ਨੇ ਸਿਰਫ ਚਾਰ ਗੀਤਾਂ ‘ਤੇ ਇੰਨਾ ਪੈਸਾ ਖ਼ਰਚ ਕੀਤਾ ਹੈ ਕਿ ਸ਼ਾਇਦ ਅਕਸ਼ੈ ਕੁਮਾਰ ਅਤੇ ਸੰਨੀ ਦਿਓਲ ਵਰਗੇ ਸਿਤਾਰੇ ਦੋ ਫਿਲਮ ਬਣਾ ਸਕਦੇ ਹਨ।
ਗੇਮ ਚੇਂਜਰ ਦੇ ਇਨ੍ਹਾਂ 4 ਗੀਤਾਂ ‘ਤੇ ਮੇਕਰਸ ਨੇ ਕਰੋੜਾਂ ਕੀਤੇ ਖ਼ਰਚ
ਰਾਮ ਚਰਨ ਅਤੇ ਕਿਆਰਾ ਅਡਵਾਨੀ ਸਟਾਰਰ ਇਹ ਫਿਲਮ ਬਾਕਸ ਆਫਿਸ ‘ਤੇ ਪੁਸ਼ਪਾ 2 ਦੀ ਖੇਡ ਨੂੰ ਖ਼ਤਮ ਕਰਨ ‘ਚ ਸਫਲ ਰਹੇਗੀ ਜਾਂ ਨਹੀਂ, ਇਹ ਕਹਿਣਾ ਥੋੜ੍ਹਾ ਮੁਸ਼ਕਿਲ ਹੈ ਪਰ ਬਜਟ ਦੇ ਲਿਹਾਜ਼ ਨਾਲ ਇਸ ਨੇ ਆਪਣਾ ਬੈਂਡ ਜ਼ਰੂਰ ਵਜਾ ਦਿੱਤਾ ਹੈ। ਪ੍ਰੋਡਕਸ਼ਨ ਕੰਪਨੀ ਸ਼੍ਰੀ ਵੈਂਕਟੇਸ਼ਵਰ ਕ੍ਰਿਏਸ਼ਨ ਨੇ ਗੇਮ ਚੇਂਜਰ ਦੇ ਚਾਰ ਗੀਤਾਂ ‘ਤੇ ਕਰੋੜਾਂ ਰੁਪਏ ਖ਼ਰਚ ਕੀਤੇ ਹਨ।
ਰਾਮ ਚਰਨ ਨੂੰ ਐਕਸ਼ਨ ਰੂਪ ‘ਚ ਦੇਖ ਕੇ ਦਿਲ ਖੁਸ਼ ਹੋ ਜਾਵੇਗਾ
ਟਰੇਡ ਐਨਾਲਿਸਟ ਤਰਨ ਆਦਰਸ਼ ਨੇ ਆਪਣੇ ਅਧਿਕਾਰਤ ਐਕਸ ਅਕਾਊਂਟ ‘ਤੇ ਇਕ ਪੋਸਟ ਸ਼ੇਅਰ ਕੀਤੀ ਹੈ। ਇਸ ਪੋਸਟ ‘ਚ ਉਨ੍ਹਾਂ ਦੱਸਿਆ ਕਿ ‘ਗੇਮ ਚੇਂਜਰ’ ਦੇ ਚਾਰ ਗੀਤ ‘ਜਾਰਾਗੰਡੀ’, ‘ਰਾ ਮਚਾ-ਮਚਾ’, ‘ਨਾਨਾ ਯਾਰਾਨਾ’ ਅਤੇ ‘ਢੋਪ’ ਸਮੇਤ ਇਕੱਲੇ ਸੰਗੀਤ ਦਾ ਬਜਟ 75 ਕਰੋੜ ਰੁਪਏ ਦੇ ਕਰੀਬ ਹੈ।
‘ਗੇਮ ਚੇਂਜਰ’ ਪੁਸ਼ਪਾ 2 ਦਾ ਕਰ ਦੇਵੇਗੀ ਕੰਮ ਤਮਾਮ !
ਖ਼ਬਰਾਂ ਮੁਤਾਬਕ ਇਸ ਫਿਲਮ ਦਾ ਕੁੱਲ ਬਜਟ 450 ਕਰੋੜ ਦੇ ਕਰੀਬ ਹੈ, ਜਦੋਂ ਕਿ ਅੱਲੂ ਅਰਜੁਨ ਦੀ ਪੁਸ਼ਪਾ 2 ਕਰੀਬ 400 ਕਰੋੜ ਰੁਪਏ ‘ਚ ਬਣੀ ਸੀ। ਇਸ ਸਮੇਂ ਪਿਛਲੇ ਸਾਲ 5 ਦਸੰਬਰ ਨੂੰ ਰਿਲੀਜ਼ ਹੋਈ ਫਿਲਮ ‘ਪੁਸ਼ਪਾ 2’ ਗਲੋਬਲ ਅਤੇ ਭਾਰਤੀ ਬਾਕਸ ਆਫਿਸ ‘ਤੇ ਮਜ਼ਬੂਤੀ ਨਾਲ ਬਿਰਾਜਮਾਨ ਹੈ।
ਇੱਥੋਂ ਤੱਕ ਕਿ ਨਾਨਾ ਪਾਟੇਕਰ ਦੀ ਵਨਵਾਸ ਅਤੇ ਵਰੁਣ ਧਵਨ ਦੀ ਬੇਬੀ ਜੌਨ ਵਰਗੀਆਂ ਫਿਲਮਾਂ ਵੀ ਹਿੰਦੀ ਬਾਕਸ ਆਫਿਸ ‘ਤੇ ਪੁਸ਼ਪਾ 2 ਨੂੰ ਹਿੱਲਾ ਨਹੀਂ ਸਕੀਆਂ। ਹੁਣ ਇਹ ਦੇਖਣਾ ਦਿਲਚਸਪ ਹੋਵੇਗਾ ਕਿ 10 ਜਨਵਰੀ ਨੂੰ ਰਿਲੀਜ਼ ਹੋਣ ਵਾਲੀ ‘ਗੇਮ ਚੇਂਜਰ’ ਬਾਕਸ ਆਫਿਸ ਦੀ ਨੁਹਾਰ ਬਦਲ ਸਕੇਗੀ ਜਾਂ ਨਹੀਂ। ਜ਼ਿਕਰਯੋਗ ਹੈ ਕਿ ਦੱਖਣ ਦੇ ਨਿਰਦੇਸ਼ਕ ਸ਼ੰਕਰ ਨੇ ਫਿਲਮ ਦੇ ਨਿਰਦੇਸ਼ਨ ਦੀ ਜ਼ਿੰਮੇਵਾਰੀ ਸੰਭਾਲੀ ਹੈ। ਫਿਲਮ ‘ਚ ਰਾਮ ਚਰਨ ਡਬਲ ਰੋਲ ‘ਚ ਨਜ਼ਰ ਆਉਣਗੇ।
