14 ਜੂਨ (ਪੰਜਾਬੀ ਖਬਰਨਾਮਾ):ਥੋਕ ਬਾਜ਼ਾਰ ਦੀਆਂ ਕੀਮਤਾਂ ‘ਤੇ ਆਧਾਰਿਤ ਮਹਿੰਗਾਈ ਦਰ (WPI Inflation) ਦੇ ਨਵੇਂ ਅੰਕੜੇ ਸਾਹਮਣੇ ਆ ਗਏ ਹਨ। ਅਪ੍ਰੈਲ ਦੇ ਮੁਕਾਬਲੇ ਮਈ ਮਹੀਨੇ ‘ਚ ਇਹ ਦੁੱਗਣੇ ਤੋਂ ਜ਼ਿਆਦਾ ਵਧਿਆ ਹੈ ਅਤੇ ਕੁੱਲ ਮਿਲਾ ਕੇ 15 ਮਹੀਨਿਆਂ ਦੇ ਉੱਚ ਪੱਧਰ ‘ਤੇ ਪਹੁੰਚ ਗਿਆ ਹੈ। ਆਉਣ ਵਾਲੇ ਸਮੇਂ ਵਿੱਚ ਹੋ ਸਕਦਾ ਹੈ ਕਿ ਥੋਕ ਮਹਿੰਗਾਈ ਦਾ ਅਸਰ ਦੇਸ਼ ਦੇ ਆਮ ਲੋਕਾਂ ਅਤੇ ਪ੍ਰਚੂਨ ਬਾਜ਼ਾਰ ‘ਤੇ ਵੀ ਨਜ਼ਰ ਆਵੇ, ਫਿਰ ਦੇਖਣਾ ਹੋਵੇਗਾ ਕਿ ਆਰਬੀਆਈ ਇਸ ਸਬੰਧੀ ਕੀ ਫੈਸਲਾ ਲੈਂਦਾ ਹੈ।
ਮਈ ਮਹੀਨੇ ‘ਚ ਦੇਸ਼ ਅੰਦਰ ਥੋਕ ਮਹਿੰਗਾਈ ਦਰ 2.61 ਫੀਸਦੀ ਰਹੀ ਹੈ। ਇਹ ਅਪ੍ਰੈਲ ਦੇ 1.26 ਫੀਸਦੀ ਤੋਂ ਲਗਭਗ ਦੁੱਗਣਾ ਵਾਧੂ ਹੈ। ਜਦੋਂ ਕਿ ਪਿਛਲੇ ਸਾਲ ਮਈ ਵਿੱਚ ਦੇਸ਼ ਦੀ ਥੋਕ ਮਹਿੰਗਾਈ ਦਰ ਜ਼ੀਰੋ ਤੋਂ ਵੀ ਘੱਟ ਯਾਨੀ ਨਕਾਰਾਤਮਕ ਸੀ। ਇਹ -3.61% ਰਹੀ ਸੀ।
ਮਹਿੰਗੀਆਂ ਸਬਜ਼ੀਆਂ ਨੇ ਪਾਇਆ ਸੀ ਜੇਬ ਤੇ ਡਾਕਾ
ਆਮ ਆਦਮੀ ਦੀ ਜੇਬ ‘ਤੇ ਸਭ ਤੋਂ ਵੱਡਾ ਡਾਕਾ ਮਹਿੰਗੀਆਂ ਸਬਜ਼ੀਆਂ ਦੀਆਂ ਕੀਮਤਾਂ ਨੇ ਪਾਇਆ ਹੈ। ਆਲੂ, ਪਿਆਜ਼ ਅਤੇ ਹੋਰ ਸਬਜ਼ੀਆਂ ਦੀਆਂ ਥੋਕ ਕੀਮਤਾਂ ਵਿੱਚ ਭਾਰੀ ਵਾਧਾ ਦੇਖਿਆ ਗਿਆ। ਮਈ ਮਹੀਨੇ ‘ਚ ਸਬਜ਼ੀਆਂ ਦੀ ਮਹਿੰਗਾਈ ਦਰ 32.42 ਫੀਸਦੀ ਰਹੀ ਹੈ। ਅਪ੍ਰੈਲ ‘ਚ ਇਹ ਅੰਕੜਾ 23.60 ਫੀਸਦੀ ਸੀ। ਮਈ ‘ਚ ਪਿਆਜ਼ ਦੀ ਮਹਿੰਗਾਈ ਦਰ 58.05 ਫੀਸਦੀ ਅਤੇ ਆਲੂ ਦੀ ਮਹਿੰਗਾਈ ਦਰ 64.05 ਫੀਸਦੀ ਰਹੀ ਹੈ।
ਵਣਜ ਅਤੇ ਉਦਯੋਗ ਮੰਤਰਾਲੇ ਨੇ ਸ਼ੁੱਕਰਵਾਰ ਨੂੰ ਮਈ ਲਈ WPI Inflation ਦੇ ਅੰਕੜੇ ਜਾਰੀ ਕੀਤੇ ਹਨ। ਇਸ ਵਿੱਚ ਖੁਰਾਕੀ ਮਹਿੰਗਾਈ ਦੇ ਅੰਕੜੇ ਵੀ ਸਾਹਮਣੇ ਆਏ ਹਨ। ਅੰਕੜਿਆਂ ਮੁਤਾਬਕ, ਖੁਰਾਕੀ ਵਸਤਾਂ ਦੀ ਮਹਿੰਗਾਈ ਦਰ ਮਈ ‘ਚ 9.82 ਫੀਸਦੀ ਸੀ, ਜਦੋਂ ਕਿ ਅਪ੍ਰੈਲ ‘ਚ ਇਹ 7.74 ਫੀਸਦੀ ਸੀ। ਸਭ ਤੋਂ ਵੱਧ ਮਹਿੰਗਾਈ ਦਾਲਾਂ ਦੀਆਂ ਕੀਮਤਾਂ ‘ਚ ਦੇਖਣ ਨੂੰ ਮਿਲੀ ਹੈ। ਮਈ ‘ਚ ਦਾਲਾਂ ਦੀ ਮਹਿੰਗਾਈ ਦਰ 21.95 ਫੀਸਦੀ ਰਹੀ ਹੈ।
ਈਂਧਨ ਤੋਂ ਬਿਜਲੀ ਤੱਕ ਮਹਿੰਗਾ
ਮਈ ਮਹੀਨੇ ‘ਚ ਈਂਧਨ ਯਾਨੀ ਪੈਟਰੋਲ-ਡੀਜ਼ਲ ਤੋਂ ਲੈ ਕੇ ਮਹਿੰਗੀ ਬਿਜਲੀ ਮਹਿੰਗੀ ਹੋਣ ਨਾਲ ਆਮ ਆਦਮੀ ਦੀ ਜੇਬ ‘ਤੇ ਅਸਰ ਪਿਆ ਹੈ। ਈਂਧਨ ਅਤੇ ਬਿਜਲੀ ਖੇਤਰ ਦੀ ਮਹਿੰਗਾਈ ਦਰ ਮਈ ‘ਚ 1.35 ਫੀਸਦੀ ਸੀ। ਇਸ ਤੋਂ ਇਲਾਵਾ ਨਿਰਮਿਤ ਉਤਪਾਦਾਂ ਦੀ ਸ਼੍ਰੇਣੀ ‘ਚ ਮਹਿੰਗਾਈ ਦਰ 0.78 ਫੀਸਦੀ ਰਹੀ ਹੈ।
ਸਮਝਣ ਵਾਲੀ ਗੱਲ ਇਹ ਹੈ ਕਿ ਮਈ ਵਿੱਚ ਥੋਕ ਮਹਿੰਗਾਈ ਦੇ ਅੰਕੜੇ ਇਸੇ ਮਹੀਨੇ ਦੇ ਪ੍ਰਚੂਨ ਮਹਿੰਗਾਈ ਦੇ ਅੰਕੜਿਆਂ ਦੇ ਉਲਟ ਹਨ। ਮਈ ‘ਚ ਪ੍ਰਚੂਨ ਮਹਿੰਗਾਈ ਦਰ ਘੱਟ ਕੇ 4.75 ਫੀਸਦੀ ‘ਤੇ ਆ ਗਈ, ਜੋ ਇਕ ਸਾਲ ‘ਚ ਸਭ ਤੋਂ ਹੇਠਲੇ ਪੱਧਰ ‘ਤੇ ਹੈ। ਭਾਰਤੀ ਰਿਜ਼ਰਵ ਬੈਂਕ (ਆਰਬੀਆਈ) ਆਪਣੀ ਮੁਦਰਾ ਨੀਤੀ ਤਿਆਰ ਕਰਦੇ ਸਮੇਂ ਮੁੱਖ ਤੌਰ ‘ਤੇ ਪ੍ਰਚੂਨ ਮਹਿੰਗਾਈ ਨੂੰ ਧਿਆਨ ਵਿੱਚ ਰੱਖਦਾ ਹੈ।
