11 ਨਵੰਬਰ 2024 ਕਿਸੇ ਨੂੰ ਵੀ ਅਚਾਨਕ ਪੈਸੇ ਦੀ ਲੋੜ ਪੈ ਸਕਦੀ ਹੈ। ਜੇ ਤੁਹਾਡੇ ਕੋਲ ਬਚਤ ਜਾਂ ਐਮਰਜੈਂਸੀ ਫੰਡ ਨਹੀਂ ਹੈ, ਤਾਂ ਤੁਹਾਨੂੰ ਕਰਜ਼ਾ ਲੈਣਾ ਪੈਂਦਾ ਹੈ। ਅੱਜਕੱਲ੍ਹ ਬੈਂਕ ਆਪਣੇ ਗਾਹਕਾਂ ਨੂੰ ਪ੍ਰੀਅਪਰੂਵਡ ਲੋਨ ਦੀ ਪੇਸ਼ਕਸ਼ (Personal Loan) ਕਰਦੇ ਹਨ। ਇਸ ਨਾਲ ਗਾਹਕਾਂ ਨੂੰ ਪਲਾਂ ‘ਚ ਲੋਨ ਮਿਲ ਸਕਦਾ ਹੈ। ਜ਼ਿਕਰਯੋਗ ਹੈ ਕਿ ਪਰਸਨਲ ਲੋਨ ਸਭ ਤੋਂ ਵੱਧ ਵਿਆਜ ਦਰ ਵਾਲਾ ਲੋਨ ਹੈ। ਜੇਕਰ ਤੁਸੀਂ ਚਾਹੋ ਤਾਂ ਪਰਸਨਲ ਲੋਨ ਦੀ ਬਜਾਏ ਓਵਰਡ੍ਰਾਫਟ ਦੀ ਸੁਵਿਧਾ ਵੀ ਲੈ ਸਕਦੇ ਹੋ। ਬੈਂਕ ਆਪਣੇ ਗਾਹਕਾਂ ਨੂੰ ਓਵਰਡਰਾਫਟ ਦੀ ਪੇਸ਼ਕਸ਼ ਕਰਦੇ ਹਨ। ਆਓ ਜਾਣਦੇ ਹਾਂ ਓਵਰਡਰਾਫਟ ਕੀ ਹੈ।
ਓਵਰਡਰਾਫਟ ਦੀ ਸਹੂਲਤ (Overdraft facility) ਪ੍ਰਾਈਵੇਟ ਜਾਂ ਸਰਕਾਰੀ ਬੈਂਕਾਂ ਦੋਵਾਂ ਵਿੱਚ ਉਪਲਬਧ ਹੈ। ਜ਼ਿਆਦਾਤਰ ਬੈਂਕ ਕਰੰਟ ਅਕਾਊਂਟ, ਸੈਲਰੀ ਅਕਾਊਂਟ ਅਤੇ ਫਿਕਸਡ ਡਿਪਾਜ਼ਿਟ ‘ਤੇ ਓਵਰਡ੍ਰਾਫਟ ਦੀ ਸਹੂਲਤ ਪ੍ਰਦਾਨ ਕਰਦੇ ਹਨ, ਤਾਂ ਜੋ ਗਾਹਕ ਲੋੜ ਪੈਣ ‘ਤੇ ਕੈਸ਼ ਦੀ ਵਰਤੋਂ ਕਰ ਸਕਣ। ਇਹ ਇੱਕ ਤਰ੍ਹਾਂ ਦਾ ਕਰਜ਼ਾ ਹੈ, ਜੋ ਉਸ ਬੈਂਕ ਤੋਂ ਮਿਲਦਾ ਹੈ ਜਿੱਥੇ ਤੁਹਾਡਾ ਖਾਤਾ ਹੈ। ਕਈ ਬੈਂਕ ਆਪਣੇ ਖਾਤਾ ਧਾਰਕਾਂ ਨੂੰ ਸ਼ੇਅਰਾਂ, ਬਾਂਡ ਅਤੇ ਬੀਮਾ ਪਾਲਿਸੀਆਂ ਦੇ ਵਿਰੁੱਧ ਓਵਰਡਰਾਫਟ ਦੀ ਸਹੂਲਤ ਵੀ ਪ੍ਰਦਾਨ ਕਰਦੇ ਹਨ। ਓਵਰਡਰਾਫਟ ਦੀ ਸਹੂਲਤ ਦੇ ਨਾਲ, ਤੁਸੀਂ ਲੋੜ ਪੈਣ ‘ਤੇ ਬੈਂਕ ਤੋਂ ਪੈਸੇ ਲੈ ਸਕਦੇ ਹੋ ਅਤੇ ਬਾਅਦ ਵਿੱਚ ਵਾਪਸ ਕਰ ਸਕਦੇ ਹੋ।
ਓਵਰਡਰਾਫਟ ਕਿਵੇਂ ਮਿਲਦਾ ਹੈ, ਆਓ ਜਾਣਦੇ ਹਾਂ: ਕੁਝ ਗਾਹਕਾਂ ਨੂੰ ਪਹਿਲਾਂ ਹੀ ਓਵਰਡਰਾਫਟ ਦੀ ਸਹੂਲਤ ਮਿਲਦੀ ਹੈ ਅਤੇ ਕੁਝ ਨੂੰ ਬਾਅਦ ਵਿੱਚ ਬੈਂਕ ਤੋਂ ਮਨਜ਼ੂਰੀ ਲੈਣੀ ਪੈਂਦੀ ਹੈ। ਗਾਹਕ ਇਸ ਸਹੂਲਤ ਲਈ ਆਨਲਾਈਨ ਜਾਂ ਵਿਅਕਤੀਗਤ ਤੌਰ ‘ਤੇ ਬੈਂਕ ਜਾ ਕੇ ਅਪਲਾਈ ਕਰ ਸਕਦੇ ਹਨ। ਕੁਝ ਬੈਂਕ ਸ਼ੁਰੂ ਵਿੱਚ ਗਾਹਕਾਂ ਤੋਂ ਪ੍ਰੋਸੈਸਿੰਗ ਫੀਸ ਵੀ ਲੈਂਦੇ ਹਨ। ਓਵਰਡਰਾਫਟ ਸਹੂਲਤ ਦੋ ਤਰ੍ਹਾਂ ਦੀ ਹੁੰਦੀ ਹੈ, ਸਕਿਓਰਡ ਤੇ ਅਨਸਕਿਓਰਡ। ਸਕਿਓਰਡ ਸਹੂਲਤ ਦਾ ਮਤਲਬ ਹੈ ਕਿ ਪੈਸੇ ਨੂੰ ਸਕਿਓਰਿਟੀ ਵਜੋਂ ਲੈਣ ਤੋਂ ਪਹਿਲਾਂ, ਤੁਸੀਂ ਸ਼ੇਅਰ, ਬਾਂਡ, ਐੱਫ.ਡੀ., ਮਕਾਨ, ਬੀਮਾ ਪਾਲਿਸੀ, ਤਨਖਾਹ ਜਾਂ ਮੋਰਟਗੇਜ ਦੇ ਕੇ ਬੈਂਕ ਤੋਂ ਓਵਰਡ੍ਰਾਫਟ ਦੀ ਸਹੂਲਤ ਲੈ ਸਕਦੇ ਹੋ। ਜਦੋਂ ਕਿ, ਜੇਕਰ ਅਸੀਂ ਅਨਸਕਿਓਰਡ ਓਵਰਡਰਾਫਟ ਸਹੂਲਤ ਬਾਰੇ ਗੱਲ ਕਰਦੇ ਹਾਂ, ਤਾਂ ਇਹ ਉਦੋਂ ਲਿਆ ਜਾਂਦਾ ਹੈ ਜਦੋਂ ਤੁਹਾਡੇ ਕੋਲ ਗਿਰਵੀ ਰੱਖਣ ਲਈ ਕੁਝ ਨਹੀਂ ਹੁੰਦਾ ਅਤੇ ਪੈਸੇ ਦੀ ਲੋੜ ਹੁੰਦੀ ਹੈ। ਅਜਿਹੇ ‘ਚ ਬਿਨਾਂ ਸਕਿਓਰਿਟੀ ਦੇ ਬੈਂਕ ਤੋਂ ਪੈਸੇ ਲਏ ਜਾ ਸਕਦੇ ਹਨ।
ਓਵਰਡਰਾਫਟ ਵਿੱਚ ਕਿੰਨੇ ਪੈਸੇ ਮਿਲਦੇ ਹਨ: ਇਸ ਦੇ ਲਈ ਹਰ ਬੈਂਕ ਦੇ ਆਪਣੇ ਨਿਯਮ ਹਨ। ਇਹ ਪੂਰੀ ਤਰ੍ਹਾਂ ਇਸ ਗੱਲ ‘ਤੇ ਨਿਰਭਰ ਕਰਦਾ ਹੈ ਕਿ ਤੁਸੀਂ ਬੈਂਕ ਨੂੰ ਕਿਹੜਾ Collateral ਦਿੱਤਾ ਹੈ। ਜ਼ਿਆਦਾਤਰ ਬੈਂਕ ਤਨਖ਼ਾਹ ਅਤੇ ਐਫਡੀ ਦੇ ਬਦਲੇ ਓਵਰਡਰਾਫਟ ਸਹੂਲਤ ਲੈਣ ਲਈ ਜ਼ਿਆਦਾ ਪੈਸੇ ਦਿੰਦੇ ਹਨ ਅਤੇ ਸੀਮਾ ਵੀ ਵੱਧ ਰੱਖਦੇ ਹਨ। ਜੇਕਰ ਤੁਹਾਡੀ ਪੇਮੈਂਟ ਹਿਸਟਰੀ ਚੰਗੀ ਹੈ ਤਾਂ ਬੈਂਕ ਓਵਰਡਰਾਫਟ ਵਿੱਚ ਤੁਹਾਡੀ ਤਨਖ਼ਾਹ ਤੋਂ ਦੋ ਤੋਂ ਤਿੰਨ ਗੁਣਾ ਦਿੰਦੇ ਹਨ। ਓਵਰਡਰਾਫਟ ਰਾਹੀਂ ਪੈਸੇ ਉਧਾਰ ਲੈਣਾ ਕਿਸੇ ਵੀ ਕ੍ਰੈਡਿਟ ਕਾਰਡ ਜਾਂ ਨਿੱਜੀ ਕਰਜ਼ੇ ਨਾਲੋਂ ਸਸਤਾ ਹੈ। ਓਵਰਡਰਾਫਟ ਵਿੱਚ, ਤੁਸੀਂ ਦੂਜੇ ਕਰਜ਼ਿਆਂ ਨਾਲੋਂ ਘੱਟ ਵਿਆਜ ਦਿੰਦੇ ਹੋ। ਨਾਲ ਹੀ, ਉਧਾਰ ਲਏ ਗਏ ਪੈਸੇ ‘ਤੇ ਵਿਆਜ ਦਾ ਭੁਗਤਾਨ ਸਿਰਫ ਉਸ ਸਮੇਂ ਲਈ ਕਰਨਾ ਪੈਂਦਾ ਹੈ ਜਿਸ ਲਈ ਪੈਸਾ ਉਧਾਰ ਲਿਆ ਗਿਆ ਹੈ।
